“Исламын улс” алан хядах бүлэглэлийн дайчид олон улсын цахим ертөнцийн тэргүүлэх компани Твиттерийг үүсгэн байгуулагчдын нэг Жек Дорси болон тус компанийн ажилчдын амь насанд нь заналхийлжээ хэмээн NBC мэдээллээ.
Учир нь тус компани нийгмийн сүлжээн дэх “Исламын улс” алан хядах бүлэглэлийн аккаунт, жиргээ, зураг болон видео бичлэгүүдийг устгах бодлого явуулж байгаа нь тэдний дургүйцлийг хүргэжээ.
“Бидний эсрэг виртуал дайн та нарын эсрэг жинхэнэ дайнд хүргэж мэднэ” хэмээн компанийн удирдлагад хандан хэт даврагчид мэдэгджээ.
Түүнчлэн тэд дэлхий нийтэд тархсан өөрийн дайчдыг энэ үйлсэд нэгдэхийг уриалж байгаа юм.
Сүүлийн үед янз бүрийн алан хядах бүлэглэл тэр дундаа “Исламын улс” нийгмийн сүлжээг ашиглан хэт даврах үзэл, хүчирхийлэлд уриалах, Европын иргэдийг эгнээндээ элсүүлдэг болсон.
Үүнээс урьдчилан сэргийлэх зорилгоор Твиттерийн удирдлага алан хядагчдын аккаунтыг хааж байгаа юм.
Эх сурвалж: NBC
Х.Көгершин | GoGo.mn