Төр түмнийхээ төлөө би юм хиймээр байна
Цүнх дүүрэн мөнгө хэрэгтэй байна
Чигээ олоогүй ганзагын наймаачдыг
Чингис шиг нэгтгээд компани байгуулмаар байна
Гэрт гадаагүй архидсан хүмүүсийг
Гитлер шиг зандраад ажилд зүтгүүлмээр байна
Тэгшхэн шилбэтэй хөөрхөн охидыг
Тэвэрч аваад эх шигээ хайрламаар байна
Тэвхгэр биетэй аархуу залуусын
Тээрхий хавьд нь ганц өшиглөмөөр байна
Төр түмнийхээ төлөө би юм хиймээр байна
Цүнх дүүрэн мөнгө хэрэгтэй байна
Орон гэргүй тэнэмэл жаалуудыг
Одонцор болгож урлагт мөнхөлмөөр байна
Олон хүүхэдтэй зүдэрсэн эхчүүдийг
Онгоцонд суулгаад Америк үзүүлмээр байна
Бядгүй болсон туранхай өвгөдийг
Бялдаржуулах төвд үнэгүй илгээмээр байна
Ядарч туйлдсан хөөрхий эмгэдийг
Янзын тансаг бааранд суулгамаар байна
Төр түмнийхээ төлөө би юм хиймээр байна
Цүнх дүүрэн мөнгө хэрэгтэй байна
Улсын хөрөнгөөр баяжсан луйварчдыг
Уран аргаар улайтал илчилмээр байна
Урт гартай хулгайч, дээрэмчдийг
Улаанбаатараас зайлуулж Ирак руу цөлмөөр байна
Ирэх сонгуулиар мөнгө олдвол
Их хуралд би суудал эзэлмээр байна
Эрх мэдлийн оргилд хүрчихвэл
Энэ улсыг бар болгомоор байна
Төр түмнийхээ төлөө би юм хиймээр байна
Цүнх дүүрэн мөнгө хэрэгтэй байна аа!
ЕГӨӨДСӨН Б.ОЙДОВ
