Амтат жимстэй тараг буюу yogurt хийхэд танд зөвхөн хэдхэн төрлийн бэлэн бүтээгдэхүүн байхад л хангалттай. Тослог багатай тараг болон шинэхэн жимс жимсгэнэ, мөн самар байхад тун амттай амттан бэлтгэж болно.
Органик тарагтай бүх төрлийн самрыг хольж хэрэглэж болдгийг та мэдэх үү? Самар нь дотроо маш олон төрлийн эрдэс бодис агуулсан байдаг тул таны эрүүл мэндэд тустай.
Мөн жимстэй тараг хийхэд тоор, интоор, ханборгоцой, усан үзэм, аньс, нэрс, банана зэрэг дуртай жимсээ сонгож болох боловч зөөлөн чанартай жимс сонгох нь илүү тохиромжтой. Харин киви, лийр, жүрж зэрэг исгэлэн жимс тохиромжгүй бөгөөд тарагтай холиход исгэлэн гашуун амттай болж гашлах тал бий. Тиймээс зөөлөн, чихэрлэг амттай жимс сонгоорой.
Жимсийг хүйтэн усаар угааж, хальс ясыг цэвэрлээд жижиглэн хэрчинэ.
Ингээд аяганы ёроолд эхлээд бага зэрэг тараг, жимс, самар, тараг, жимс, самар, тараг гэх дарааллаар хийж шууд идэж болно. Элсэн чихэр хийх хэрэггүй.
Жимс нь хангалттай чихэрлэг амттай тул тарагны амтыг тэнцвэржүүлнэ.
Эсвэл илүү боловсруулж идэж болно. Ингэхийн тулд угааж цэвэрлээд жижиглэн хэрчсэн жимс жимсгэнийг автомат холигчинд хийж миксэрдэж задлана. Үүний дараа таргыг бага багаар хийж үргэлжлүүлэн миксэрдэнэ.
Ингээд гэрийн нөхцөлд гар аргаар хийсэн жимстэй тараг маань бэлэн боллоо. Ингэж таргыг боловсруулж идэх нь эрүүл мэнд, гоо сайхан, илүүдэл жин хасахад тустай бөгөөд хүүхдэд хийж өгөхөд ч тохиромжтой. Учир нь үйлдвэрийн аргаар хийж, савалсан yogurt нь хүний эрүүл мэндэд муу нөлөөтэй байдаг. Хүнс, химийн будаг, тогтворжуулагч орц зэрэг нь жимс, тарагны байгалийн бүтцийг ихээхэн гэмтээдэг тул байнга идэхэд тохиромжгүй. Харин өөрийн гараар энэхүү жорыг ашиглан жимстэй амтат тараг хийж идэх нь органик бөгөөд эрүүл юм.
Эх сурвалж: 1000jor.mn