Энэ удаагийн дугаартаа ая зохиогч, продьюсер Б.Ангирмаатай ярилцлаа.-Ярилцлагаа таны сүүлийн үеийн уран бүтээлийн сонин хачнаас хуваалцаж эхэлье?
-Яг одоогоор “Киви” хамтлагтайгаа л ажиллаж байна. Д.Уламбаяр / Ука/ маань саяхан эх орондоо ирлээ. Эргээд уран бүтээлийн ажилдаа эрчимтэй орлоо. “Осеаn gгеу” студитэй хамтран шинэ уран бүтээлүүддээ ороод байна. Мөн шинэхэн клипээ “Вlаск zеbrа” студиэр хийлгэж байна. Цомгийн ажил гэхээсээ илүү шинэ дуунууддаа илүү ач холбогдол өгч байгаа юм.
Мөн Улаанбаатар хотоор аялан тоглолт хийж эхлээд байна. Өнгөрсөн долоо хоногт гэхэд л “Маrque 27” клубт тоглолоо. Өнөөдөр “VLVT” клубт тоглоно. Үүний дараа “Centro”, “Mint” клубуудэд мөн тоглохоор яригдаж байна. Сүүлд хамтлагийн гишүүн Ц.Намуун “Оnе mоmеnt” шинэ цомгоо гаргалаа. Энэ цомгийн дуунуудыг клипжүүлэх ажил мөн явагдаж байна. “Киви” хамтлагийн бүх тоглолтуудыг “Арвайн үндэс” компани ивээн тэтгэж, хамтран ажилладаг. Энэ удаагийн тоглолтуудад ч хамтран ажиллаж байна.
-“Маrque 27”-д болсон тоглолт маш амжилттай боллоо. Энэхүү Улаанбаатар хотдоо тоглох тоглолтуудын бэлтгэл ажил хэзээнээс эхэлсэн бэ. Өмнө нь төлөвлөгдсөн ажил байв уу?
-Бүх зүйл бэлэн, бүгд бэлтгэлтэй байсан л даа. Укаг явахаас өмнө бид хөдөө орон нутгаар, тэр дундаа баруун аймгуудаар нэлээд удаан аялан тоглолтоор явсан шүү дээ. Энэ удаагийн тоглолт бол бүх зүйлээ сэргээсэн тоглолт байлаа.
Манай охид өөрсдөө их хурдтай ажилладаг юм. Тэр ч утгаараа Ука маань ирсэн даруйдаа л бэлтгэлдээ орж, тоглолтоо амжилттай хийж байна. “Киви” хамтлаг олон удаа тоглолт хийсэн. Тэр тоглолтууд, цомгуудынхаа хамгийн шилдэг, хит дуунуудыг сонгож энэ тоглолтондоо дуулж байгаа учраас үзэгчдэд илүү хүрч байх шиг байна. Тоглолт болгон дээр 26 дуу дуулж байгаа.
-Өмнө нь хамтлагийн ахлагч Ука бие даасан цомгоо гаргасан. Өнгөрсөн сард Намуунаа цомгоо гаргалаа. Тэгвэл П.Алтанцэцэг / Агий/-ийн цомог хэзээ гарах бол. Төлөвлөж байна уу?
-Уг санаа байгаа юм. Харин Агий өөрөө сайн бодож байж болъё гээд хойш тавиад байна л даа. Уг нь Агийгийн цомгийг их онцлоготой гаргахаар төлөвлөж байгаа. Дандаа уянгын, дуэт дуунуудаас бүрдсэн цомог байлгахаар ярилцаж байгаа. Өмнө нь дуучин Б.Амархүүтэй хамтран дуулж байсан шүү дээ. Энэ цуврал тоглолтыг дууссаны дараа энэ талаар ярилцана.
-Хамтлагийн гишүүн Намуунааг эхний цомгоо эзэмшсэн мэргэжлийнхээ дагуу төгөлдөр хуурын бүтээлүүдээр гаргах болов уу гэж бодож байлаа?
-Тэгэлгүй яахав. Тийм санаа ч байсан. Гэхдээ магистраа төгсөхдөө аяндаа их олон тоглолтууд хийх шаардлагатай болох юм билээ. Тэндээс нь бид шилдэг гэснийг түүвэрлэж гаргахаар хүлээж байна.
-“Киви” хамтлагийн өдий болтол уран бүтээлээ хийж байгаа нь хатуу продьюсертэй нь холбоотой, гэр бүл зохиохыг нь хүртэл хориглодог гэж ярьцгаадаг. Гэтэл үүнийг Ука ээж болсноор няцаалаа шүү дээ?
-Хамтлаг байгуулагдсан эхний гурван жил тийм гэрээтэй байсан нь үнэн л дээ. Найз залуутай байж болно, боловсролоо дээшлүүлж болно. Харин жирэмслэлт байж болохгүй гэж. Манай гурав ч өөрсдөө тийм л бодолтой байсан. Эхний ээлжинд ажлаа, уран бүтээлээ хийе, урлагийн төлөө зүтгэе гэсэн эрмэлзэл нь тэр хэрээрээ харагдаж байсан байхгүй юу.
Харин сая яг л цаг хугацаа нь болсон байсан. Тэрийг хүмүүс ойлгох л хэрэгтэй. “Киви” хамтлаг байгуулагдаад арван жил болчихсон л байна шүү дээ. Энэ хугацаанд маш их хөдөлмөрлөж, энэ тайзанд үнэхээр чин сэтгэлээ зориуллаа. Одоо бол би Намуунаа, Агий хоёрыгоо ч хүүхэдтэй болоосой гэж хүсч байгаа шүү.
Яахав дээ, эднийхээ хөлийг нь дөрөөнд, гарыг нь ганзаганд хүргэхийн тулд, нэр хүнд, байр суурь эзлүүлэхийн тулд чанга хандаж, дэглэм тогтоосон. Түүнийгээ л дагасан. Гэхдээ энэ бол байх л асуудал. Харин сүүлийн үед улам зөөлрөөд л байна. Охид маань ч өөрсдөө намайг оролцуулахгүйгээр биеэ даагаад ажиллачихдаг ч болж. Нэг үгээр эвээ олчихсон гэх юмуу даа. Миний оролцоо улам л багасч байна шүү.
-Анх энэ гурван охиныг сонгож хамтлаг бүрдүүлэхдээ өдий хүртэл зүтгэж чадна гэдэгт нь итгэж байсан уу?
-Мэдээж хүнд зорилго гэж байна шүү дээ. Миний зорилго энэ байсан. Итгэл байсан учраас л анх зориглож хийсэн. Би ч өөрөө тууштэй ажилласан. Ямарваа ажилд үнэн сэтгэлээсээ хандаж ажиллавал түүний үр дүн гардаг гэдэгт би итгэдэг.
-“Киви” хамтлагтай зэрэгцээд “Банана” гэж хамтлаг бас байгуулагдаж байсан. Продьюсерээр нь бас та ажиллаж байсан байх аа?
-“Банана” хамтлагийг би санаачлан байгуулсан. Харин Б.Наранзун дуу, хөгжим тал дээр нь хамтран ажилладаг байлаа. Эрэгтэй хамтлаг болоод ч тэр үү Б.Наранзунд хариуцуулсан нь дээр юм шиг санагдсан л даа. Ажиллахад нь илүү амар. Хамтлагийн нэрээ “Hotspot” болгон өөрчилж, эхний цомгоо гаргасан шүү дээ. боловсролтой, дажгүй залуус.
-Сүүлийн үед “Осеаn gгеу”-н залуустай хамтран ажиллаж байгаа. Их шинэлэг байгаа болоод л та хамтран ажиллаж байгаа байх?
-“Осеаn gгеу”-н хоёр залууг их шахаж, хөглөж байгаа шүү. Өдөр болгон студи дээр нь очиж шаардлага тавьж, ажлыг үр дүнтэй, чанартай, шинэлэг хийлгэж сургах гэж оролдож байна. Өөрсдөө ч их соргог залуус. Бид гурав их санаа нийлдэг юм.
-Ингэхэд “Киви” хамтлагийн уран бүтээлүүдийн хичнээн хувь нь таны уран бүтээл байдаг вэ?
-Мэдэхгүй ээ, тоолж үзээгүй шүү дээ. “Багшийнхаа энэ дууг дуулчихаарай” гээд хэлэх үе байна. Манай гурав ч “Багшаа энэ дууг чинь дуулъя’’ гээд авах үе бий. Шинэ дуу зохиочихоод дуучнаа сонгож байх үед өөрсдөд нь таалагдвал аваад л дуулчихна.
-Та өөрийнхөө уран бүтээлийн тоглолтыг хийхгүй юмуу. Уг нь нэг хэсэг тийм сураг гарч гарсан шүү дээ?
-Олон хүмүүс ятгаад л байгаа юм. Бодоод л байна. Яагаад ч юм сүрдээд, хулганаад, залхуураад байна л даа. өөрийнхөө юманд нэг л хөдөлж өгөхгүй юм. Загасчны морь усгүй гэдэг шиг надад өөрт олигтой дуулчих дуу алга. Тэгсэн мөртлөө зохиосон дуунууд нэлээд их байгаад байдаг. Ер нь жаахан залхуураад л байгаа юмуу даа. “Миний юм яах вэ, тэгэж байгаад болно биз” гэж бодоод л бусдын төлөө гүйгээд байгаа юм шиг. Бусдын төлөө сэтгэл гаргаж ажиллачихаад тэрнийхээ үр дүнг харж сэтгэлийн таашаал авах сайхан. Би тийм л хүн юм шиг байгаа юм.
-Хамгийн сүүлд 15 жилийн өмнө тоглолтоо хийсэн байх шүү?
-Тийм шүү. 2000 онд шүү дээ.
-“Киви”-гээс өөр уран бүтээлчдийн продьюсерээр ажиллах бодол бий юу. Үнэхээр танд таалагдахаар авьяастай хүүхдүүд гарч ирвэл хамтран ажиллахад бэлэн үү?
-Би С.Хишигжаргалтай хамтран ажиллаж байгаа шүү дээ. Цомог нь бэлэн болох гэж байна. Одоохондоо ямар нэгэн хамтлаг, дуучидтай хамтран ажиллая гэхээр санхүүжилт хэцүү байна л даа.
Нэг клип хийлгэхэд л хамгийн багадаа 5-10 сая төгрөг шүү дээ. Дээр нь манай зах зээл жижиг. Нөгөө уран бүтээлчдийн чинь ард ар гэр, амьдрал бий. Ингээд л гацдаг. Түүнээс биш би хамтарч ажиллах дургүй биш. Ажиллахад бэлэн. Гэхдээ манай залуус одоо их туйлбаргүй байна л даа. Хэсэг байж байгаад л янз бүрийн шалтаг тоочоод л яваад өгчихдөг.
-Сүүлд ямар дуу зохиож, ямар дуучнаар дуулуулав?
-Сүүлийн үед шинэ юм хийж бараг амжихгүй байна. 25 жилийн өмнө хийж байсан “Тал нутаг” гэж дуугаа сэргээж Б.Сарантуяагийн тоглолтон дээр шавь Хишигжаргалтайгаа дуулсан. Уг нь шинэ дөрөв таван дуу байна. Гэхдээ хэнээр дуулуулахаа хараахан шийдээгүй байна. Бодсон зүйлүүд бол байна. Гэхдээ эхлээд хийчихээд дараа нь ярья.
-Анх продьюсерийн ажил сонирхож эхлэхэд нь Б.Долгион ахын нөлөө хэр их байсан бэ?
-Байлгүй яахав. Тухайн үед Б.Долгион ах “Уруулын будаг” хамтлагийн продьюсерээр ажилладаг байсан шүү дээ. Тэр үедээ л хоолойны тавилт, хоолойны бичлэг, клипэнд нь ч чиг өгөөд л явдаг байлаа. Энэ нь надад их нөлөө болсон байх л даа. “Nature Sound” студи, дуучин Б.Дашдондог маань ч их нөлөөлсөн. Тэнд ажиллаж байхдаа л би “Киви” хамтлагийг олж авсан. Б.Наранзун ч тусалж байсан. Олон хүмүүс, найзууд маань тусалж байсныг хэлэх хэрэгтэй.
-“S music” Хөгжмийн сувгийн захирлаар ажиллаж байсан. Одоо “Сансар” кабелийн телевизэд харъяалагддаг юмуу?
-Үгүй ээ. Б.Долгион ах харъяалагддаг. Би бол чөлөөт уран бүтээлч. Энэ нь ч амар юм. Туслаач, дэмжээч, хамтран ажиллая гэсэн хүмүүст чадах чинээгээрээ зөвлөгөө өгч байна. Өчигдөр гэхэд л дуучин Б.Баярцэцэгийн шиэ дууны бичлэг дээр ажиллалаа. Дуучин Э.Болор-Уянгатай хамтрэн ажилладаг.
А.Халиун
Эх сурвалж: “Нийслэл таймс” сонин
