Ядаргаа нь хүн бүхэнд илэрч байдаг нэг төрлийн физиологийн үзэгдэл юм. Биеийн тамирын дасгал, хүнд хүчир ажил хийн энерги эрчим гаргахад эрүүл чийрэг хүн ч их бага хэмжээгээр ядардаг.
Ийм үед хангалттай витаминлаг хоол хүнс хэрэглэж, хөнгөн дасгал хийж, халуун ус ваннд ороод сайхан амрахад ядаргаа тайлагддаг гэдгийг хэн бүхэн мэдэх билээ. Харин дэглэм журам муутай амьдрал, амьдралын хэвшлээс болоод ядаргаа удаан үргэлжилвэл архагшдаг. Энэ нь хэдийгээр өвчин биш ч ажлын чадвар муудах, биеийн эсэргүүцэл сулрах, өвчин эмгэгт илүү өртөх магадлалтай болдог.
Ядаргааг арилгахад зөгийн бал зэрэг шингэц сайтай чихэрлэг бүтээгдэхүүн, мандарин, лемон зэрэг витамин В1, В2 С их агуулагддаг жимс, хоол хүнс хэрэглэж дулаан амрах нь чухал. Ядаргаа архагшин улмаар хэт ядаргаа буюу ядаргааны туйлд хүрдэг. Мэдрэлийн тэнцвэртэй байдал алдагдах, амьсгал давчдах, бие хөрөх эсвэл хөлрөх, суулгах, өтгөн хатах, нойргүйдэх, тайван бус байдалд автах зэрэг олон шинж тэмдэг илэрч болно. Ихэд хүндэрсэн тохиолдолд зүрх болон тархины өвчний суурь болж, гэнэтийн үхэлд хүргэх нь ч бий.
Ядаргаа арилгахад тустай хоол, хүнсний бүтээгдэхүүнийг та бүхэндээ танилцуулья.
Хар гүнжидтэй чихэр:
Хар гүнжидэд В1 В2, Е витамин агуулагддаг ба ядаргаа гаргах, биеийн чалх, биеийн эсэргүүцэл сайжруулах, хөгшрөлтийн эсрэг, судас хатуурахаас сэргийлэх, цусны эргэлтийг сайжруулах зэрэг олон талын ач холбогдолтой. Хоол хүнсэндээ өдөр тутам хэрэглэх нь чухал. Хар гүнжидийг нунтаг болтол нь сайтар нухна. Түүн дээр зөгийн балыг тохируулан хийгээд зөөлөн галаар буцалгана. Чихрийн шингэн мэт болонгуут гаргаж хөргөөнө. Өглөө орой хүлхэж иднэ.
Мандарины жүүс:
Мандаринд витамин В1, С ихээр агуулагддаг тул ядаргаанаас сэргийлэхэд үлэмж тустай. Мандарин 2 ширхэгийг хальсалж, машинаар жүүс хийнэ. Жүүсээ зөөлөн галаар халаагаад халуун дээр нь ууна.
Сармис, зөгийн балны холимог “дарс”:
10 орчим сармисыг хальслаад шилэн саванд хийнэ. Сармисаа далд ортол зөгийн бал хийнэ. 2-3 сарын дараа уухад бэлэн болно. Орой унтахдаа 2 халбага орчмыг ууна.
Мөөгний цай:
Модны мөөг нь витамин В 1 В 2 Д болон минералаар баялаг бөгөөд хоолны дуршлыг нэмэгдүүлэх, биеийн чалх, тамир тэнхээг сайжруулах, ядаргаа арилгахад сайн нөлөө үзүүлдэг. Хатаасан мөөг 2 ширхэгийг жижиглэн хэрчээд халуун ус хийж чимх давс нэмээд сайтар хутгана. Хөргөөд ууна.
Цагаан гааны шөл:
Цагаан гаа олон төрлийн ач холбогдолтойг дээр нэгэнт өгүүлсэн. 50-100 гр орчим цагаан гааг үрж бэлтгээд халуун ус хийж ууна. Бага зэргийн brandy нэмээд ууж болно.
Цулхирын нухаш:
Цулхир ядаргаа, биеийн эсэргүүцэл муудахад хэрэглэхэд үр дүнтэй. Үрж бэлтгээд тэр хэвээр нь идвэл илүү сайн. Чанах болгоход витамин, эрдэс бодисууд амархан арилдаг.
