… Намрын уйтай төр хийг ширтэх, нүдээ аних, дэрнээсээ өндийх, эсвэл цонхоор харахын төдий өнгөрсөнд аваачих жаргалтай дурсамжийг хамтдаа бүтээсэн. Дараа нь эргэж уулзахгүйгээр салж одсон “хэн нэгэн”. Хэзээ ч юм хамгийн дотно мэт санагдсан хүмүүс “бидний мэдэх хэн нэгэн” төдийд хувирах. Цагаан дэвсгэр дээр огтлолцох, бас үл огтлолцох зураасууд. Хэтэрхий танил. Тэр зураасууд нийлж нэгэн зургийг бүтээх, зураг эргээд хэн нэгний нүүр, мөр, гараар тарах. Энэ бол Австралийн дуучин Готье, Шинэ Зеландын залуу од Кимбра нарын хамтран дуулсан “Somebody That I Used To Know” дууны өгүүлэмж юм.
Ногоон тивийн чартуудыг тэргүүлж буй Готьегийн дуунууд инди поп урсгалд багтах авч Бразилийн нэрт гитарчин Луиз Бонфын өнгө аяс, “Pet shop Boys” хамтлагаас эхтэй арт-поп, электро хөг мэдрэгдэнэ. 2011 оны наймдугаар сард Готье “Maing Mirrors” хэмээх гурав дахь цомог, “Somebody that I used to know” нэртэй хит дуугаа гаргасан. Өдгөө 31 настай дуучны энэ уран бүтээл Австрали, Австри, Бельги, Канад, Герман, Шинэ Зеланд, Польш, Швейцарь, Их Британи, Америкийн хит парадын жагсаалтыг тэргүүлсэн юм. Готье буюу Ваутер Де Баккер Бельгид төрж, Австралид өссөн. Одоогоос 10 жилийн тэртээ тэрбээр Мельбурнийн “The Basics” хамтлагийн гишүүн болж, хөгжмийн ертөнцөд хөл тавьсан юм. 2003 онд “Boardface”, 2006 онд “Like Drawing Blood” нэртэй цомог гаргасан нь Австралийн хөгжмийн ертөнцөд шинэ од мэндэлж буйн гэрч болсон юм. Түүнээс хойш таван жилийн дараа Готьегийн “Making Mirrors” цомог “төрж”, Де Беккерийн шинэ уран бүтээл Австралийн хит дууны жагсаалтыг найман долоо хоногийн турш тэргүүлжээ.
Шинэ дуу өмнөх рекордыг эвдэхийн тулд удаан “дунших” хэрэгтэй гэж тэрбээр үздэг. Тиймдээ ч дараагийн “бөмбөгөө тэслэх” хүртэл Де Бэккерт цаг хугацаа хэрэгтэй. Ваутерыг хөгжимчин болоход “Depeche Mode”, Питер Гэбриэл, Кейт Буш, Курт Кобейн нарын одод чухал үүрэг гүйцэтгэсэн гэдэг. Чухам тэдний л дуунууд сонирхлыг нь татаж, хожмоо уран бүтээлд нь нөлөөлсөн хэмээн тэрбээр дурсдаг. “Аан, энэ нөгөө дууг дуулдаг залуу” гэсэн тодорхойлолтыг тэрбээр олонтаа сонсдог ч үүнд сэтгэл хангалуун бус байдгаа илэрхийлсэн. “Хэн нэгний мэдэх хэн нэгэн биш, уран бүтээлч, хөгжимчин Готье байхыг би хүсдэг” хэмээн Де Беккерт нэгэнтээ өгүүлжээ.
Шинэ хуучин ертөнц, давах ёстой хийгээд давах ёсгүй хил хязгаарыг өөртөө багтаасан дуу огт санаандгүй төрдөг гэж дуучин ярьсан. Магадгүй, намрын уйтай төрх, нүдээ анихад л харагдах зураасууд, дэрнээсээ өндийхөд сонсогдох чимээ, эсвэл цонхоор харахын зуурт сэтгэлд хоногших тэр зургаас л “Somebody That I Used To Know” төрсөн байж мэднэ
ГОТЬЕ: НҮЦГЭН БАЙХДАА ТЭНЭГ ХАРАГДААГҮЙДЭЭ БАЯРЛАДАГ
-Та австрали хүний хувьд “Saturday Night Live” нэвтрүүлгийн талаар юу мэдэх вэ? Та энэ шоуг үзэж байсан уу?
-Тэнэг сонсогдож байж магадгүй л дээ, гэхдээ Австралид байхдаа би энэ нэвтрүүлгийн талаар нэг их мэддэггүй байсан. Энэ нэвтрүүлгийг тэнд тогтмол гаргаж ч байгаагүй. Гэхдээ би шоунд оролцож, хожим нь жүжигчин болсон хэд хэдэн хүнийг мэднэ.
-“Somebody That I Used to Know” дуугаа амжилт олно гэж итгэж байв уу?
-Энэ дуу гайгүй олон хүнд хүрчихнэ гэсэн итгэл бол байсан. Гэх дээ Их Британийн хит парадыг тэргүүлнэ гэж огт бодоогүй шүү. Одоо байгаа урс гал, чиглэлд баригдалгүй, зөвхөн өөртөө л зориулж уран бүтээл хийх ёстой гэж энэ амжилтын дараа би боддог болсон.
-Дууныхаа клипэнд Кимбра та хоёр зургаа бараг нүцгэн авахуулсан шүү дээ. Камерын өмнө нүцгэлэх ямар санагдав?
-Анх удаа нүцгэн зургаа авахуулж байгаа гэхэд дажгүй шүү. Клип бэлэн болсны дараа үзээд тэнэг хүн шиг харагдаагүйдээ үнэхээр баярласан. Гэхдээ нүцгэн залуу, бүсгүй хоёр дуулж байгаа дүрс бичлэг хүмүүсийн сонирхлыг тэгтлээ их татна гэж бодоогүй (Эл ярилцлагыг өгөх үед “Somebody That I Used to Know” дууны клипийг “Youtube”-д 156 сая удаа үзсэн байсан).
-Кимбра та хоёр яаж танилцсан юм бэ?
-Хэдэн жилийн өмнө намайг олсон юм аа. Мельбурнийн нэг клубт тэр миний дуунуудаас дуулдаг байсан. Танил маань Кимбрагийн дуулж байгаа бичлэгийг надад өгсөн юм. Тэр үед Кимбра 17 настай, Мельбурнд дөнгөж ирээд байж л даа. Тэгээд л нэг удаа түүний дуулдаг клубт очиж танилцсан. Дараа нь хамт дуулахаар болсон юм.
-Таны дуунуудтай холбоотой сонин хачин тохиолдол гарч байсан уу?
-Манай гитарчин Марки “Playboy mansion”-ы нэг үдэшлэгт очиж л дээ. Тэгэхэд Бруно Марс “Somebody That I Used to Know”-г тоглоод, Бритни Спирс найзуудтайгаа бүжиглэж байсныг ярьсан. Инээдтэй, сюрреалист маягийн зураг нүдэнд бууж байгаа биз.
Х.ОД /Mongolnews.mn/