Улсын драмын эрдмийн театрын сайхан бүсгүйчүүдийн нэг жүжигчин Н.Баярмааг Монголын гурав дахь Жульеттагаар тодрох болов уу гэж найдлага тавьж байсан хүн олон.
Гэвч Мөрөөдлийн театрын жүжигчин О.Дөлгөөнийг Жульеттад тоглуулахаар сонгожээ. Н.Баярмаа царай зүс, авьяас билгээсээ О.Дөлгөөнөөс хол давна уу гэхээс дутахгүй л дээ. Гэвч театрын удирдлагууд 14-хөн настай ч үнэнч хайрын бэлгэ тэмдэг болон мөнхөрсөн Жульеттад шавилхан биетэй бүсгүй илүү тохирно гэж тооцоолсон бололтой.
Юутай ч орчин цагийн Норагаар тодорч, “Алсын удирдлага” киногоороо олон улсын хэмжээнд үнэлэгдээд амжсан авьяаслаг бүсгүйд энэ удаа Жульетта болох хувь дутав. Гэвч Н.Баярмаагийн хувьд жүжигчин бүсгүйчүүдийн мөрөөдөл болсон Жульеттад нэг их шунаагүй бололтой. Н.Баярмаа урьдын адил инээмсэглэл тодруулан гунхаж явна. Нас залуу, цус шингэн байна. Юундаа ч гуних вэ дээ, ард түмэн түүнийг Монгол Жульетта хэмээн харсан нь л хамгийн том үнэлгээ шүү дээ.
www.mnews.mn
