Т.Чамин-Өлзий: Тайзан дээр нүцгэн гарах ч тохиолдол байна, энэ чинь урлаг шүү дээ

Үндэсний хөгжмийг орчин үеийн хөгжимтэй хослуулагч “Бэхи” хамтлагийн ахлагч Т.Чамин-Өлзийтэй уран бүтээл болоод хувийн амьдралынх нь талаар сонирхолтой яриа өрнүүлснээ хүргэе.

Уран бүтээлийн олз омог арвин уу? Сүүлийн үед ямар уран бүтээл дээр ажиллаж байна вэ? 

Үндэсний хөгжмийн “Бэхи” анхны цомгоо сарын өмнө гаргаад байна. Яг одоогоор 11 сард цацагдах телевизийн уралдаант шоунд оролцож байна даа.

Охидын хамтлаг удаан оршин тогтнох нь ховор, гишүүд солигдох нь элбэг хандлагатай байдаг. Танай хамтлагийн тухайд?

“Бэхи” хамтлаг байгуулагдаад дөрвөн жил болсны гурван жилд нь Азийн орнуудаар тоглож явсан байна. Анх хоёр шанз, нэг ятгатай байгуулагдаж байсан бол саяханаас нэг ятга, нэг шанз, нэг ёочин гэсэн бүрэлдэхүүнтэй болоод байна. Ёочинчин Номин маань хөгжимтэйгээ давхар ковер дуу дуулж байгаа.

Гадны болон Монгол үзэгчдийн хүлээж авч буй байдал, сэтгэл хөдлөлд ямар ялгаа анзаарагддаг вэ?

Биднийг анх гарч ирж байхад, ялангуяа ахмад настнууд жаахан дурамжхан, шүүмжлэлтэй байсан нь үнэн. Үндэсний хөгжмийг шалдан нүцгэн, маягтай хэдэн охид тоглож байна гээд л. Гэхдээ нийт масс бол маш сайхан хүлээж авсан. Охидын хамтлаг тул тоглолтын хэлбэрээр биш шоуны хэлбэрээр үзэгчдэд хүрч, босоогоор, үндэсний хөгжмийг орчин үеийн хөгжимтэй хослуулан тоглосон маань зөв алхам болсон.

Гадны орны үзэгчид шанзыг маань биширдэг байсан. “Зүгээр л модоор, гараар хийсэн мэт зэмсгээр дэлхийд алдартай хөгжмүүдийг тоглож болдгийг” цаашлаад Монгол орон, Чингис хааны талаар асууж сонирхдог байлаа.

Ахмад настнууудын “шалдан нүцгэн” гэх шүүмжийг хүлээж авах талаар бодов уу? Хамтлагийн имиж гээд л тоохгүй өнгөрөв үү? 

Мэдээж ахмадуудынхаа зөвлөгөө, шүүмжийг хүлээж авалгүй яах вэ. Монголдоо, оролцох тоглолтоосоо хамаараад хувцсаа сонгоно. Харин олон улсад бол охидын хамтлаг “Заавал богино хувцастай, секси байх ёстой” гэх шаардлагыг тавьдаг. Тайзан дээр нүцгэн гарах ч тохиолдол гарч болно, энэ чинь урлаг шүү дээ.

Тэгэхээр таргалахгүй, гоё сайхан байх гэдэг асуудал нэн чухал биз?

Тэгэлгүй яахав. Аль болох өөрийгөө, арьсаа амраахыг чухалчилдаг. Фитнессээр хичээллэцгээдэг.

Хамтлагийн нэр бас их өвөрмөц, хатадтай холбон бодож өгсөн үү?  

Дээд гэсэн утгатай Бэхи нэр маань Чингис хаан алтан ургийн гавьяа байгуулсан хатаддаа хүндэтгэн өгдөг байсан цол хэргэм. Ажил үйлс, уран бүтээл маань түүхэнд үлдсэн сайхан хамтлаг байгаасай гэж бэлэгшээн, мөрөөдөж өгсөн юм.

Чамин-Өлзий гэх нэр өнгөрсөн зун нэгэн хов жив ч гэмээр хэрэгт холбогдон яригдах болсон. Гэрэл зурагчин Ч.Өнөртүвшин гэх залууг ЦЕГ-ын Цахим гэмт хэрэгтэй тэмцэх тасагт өгсөн гээд л. Яг юу болсон юм бэ? 

Намайг Макаод ажиллаж байх үе буюу хоёр жилийн өмнөөс л “Танай хамтлагийнхны зургийг авмаар байна. Хамтарч ажиллая” зэргээр фэйсбүүкээр тасралтгүй бичдэг байсан. Хамтлагийн ахлагч гэдэг утгаараа “Монголд очоод эргээд холбогдъё” гэсэн хариу хэлсэн.

Харин өнгөрсөн зун цахим орчинд “гаж донтон” зэргээр яриа гарсан байсан тул уулзахаас татгалзсан чинь шууд л “Ална, араа харж яваарай. Миний танилын хүрээ өргөн шүү” зэргээр дарамтлах болсон. Эмэгтэй хүн гэдэг утгаараа маш их айдастай, дарамттай байсан тул цагдаад хандах нь зүйтэй гэж бодож байлаа. Энэ талаар өөрийн фэйсбүүк хуудсандаа нийтэлсний дараагаар маш олон охид надтай холбогдож, намайг улам цочирдуулсан. Учир нь доромжлуулсан, дарамтлуулсан, хүчиндүүлсэн охидын тоо санаанд багтамгүй олон байлаа. Ингээд л хуулийн байгууллагад хандсан. Сүүлд нэг удаа очиж мэдүүлэг өгсөн. Хохирогч болсон охид мэдүүлэг өгөөд явж байгаа.

Аль хэдийн эрүүгийн хэрэг үүссэн хойно Өнөртүвшингийн ах, ээж гэх хүмүүс утсаар ярьж, уулзах санал тавьсан, би айдастай байгаа тул татгалзсан. Тэд “гомдлоо буцаачихаач, манай гэр бүлд асуудал үүсээд байна” гэсэн зүйл ярьж байсан ч инээдтэй нь Өнөртүвшин фэйсбүүктээ миний талаар хуурамч мэдээлэл тараасаар л байсан.

Өөрийн чинь гэр бүл төлөвлөлтийн талаар сонирхож болох уу?

Монголдоо хийсэн бүтээсэн уран бүтээлүүдтэй болчихоод гэж явсаар өнөөдрийг хүрлээ. (инээв) Олон жил үерхсэн найз залуутай ч албан ёсоор гэр бүл болоогүй, хүүхэд төрүүлээгүй байна.

Охидын хамтлагийн гишүүн эрт хүүхэд гаргах нь их зориг шаардах байх тийм үү? 

Хамтлагийн маань продюсерээр Долгион ах ажилладаг. Бидэнд тийм шаардлага тавьдаггүй. Харин би охидтойгоо давхар гэрээ байгуулж, ерөнхийдөө хүүхэд, гэр бүлийн асуудлыг уран бүтээлээсээ салгаж ойлгохыг зөвлөдөг, охид маань ч санал нэг байдаг. Ёочинчин Номин маань хүүхэд, гэр бүлтэй. Ариунтунгалаг бид хоёр одоогоор амжаагүй байна.

“Шанзны гурвал”, “Бэхи” хамтлагуудын хооронд үл ойлголцол байдаг юм шиг анзаарагддаг. Өөрөө “Шанзны гурвал”-ыг байгуулж байсан байх аа?

“Шанзны гурвал”-аа байгуулаад удаагүй байсан. Охидын хамтлагт үл ойлголцох асуудал зөндөө байдаг. Нөгөө хоёр гишүүн маань асуудал үүсгэсэн болохоор хамтлагаасаа гарсан. Хамтлагийн дотоод асуудлын талаар би тэгтлээ ярих дургүй.

Бурхангүй газрын бумба галзуурна гэгчээр биднийг гадаадад тоглож байхад миний тоглосон уран бүтээлүүдийг тоглоод, шанзны гурав олонд танигдсан байна лээ. Түүнийг нь мэдэхгүй тул “Шанзны гурвал гоё” гэх сонсогчид бас их олон болсон байна. Сүүлд “Үнэн худлын дэнс” нэвтрүүлгээр асуудал бас тодорхой болсон л доо.

Ярилцсанд баярлалаа, уран бүтээлийн амжилт хүсье.
Ц.Анх


Т.Чамин-Өлзий: Тайзан дээр нүцгэн гарах ч тохиолдол байна, энэ чинь урлаг шүү дээ
Жиргэх
Манай хуудсанд LIKE дарж нэгдэнэ үү
Түлхүүр үгс: ,

Сэтгэгдэл бичих

АНХААРУУЛГА: Уншигчдын бичсэн сэтгэгдэлд MISS.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 7711-0505 утсаар хүлээн авна.