Монголын загварын ертөнцийн өнгө төрхийг тодорхойлдог топ таван дизайнерын нэг Д.Отгонжаргал өнгөрсөн тавдугаар сард Азийн шилдэг дизайнеруудын оролцдог “Asian Fashion Festival”-д оролцон Гранпри шагналын эзэн болсон билээ.
Тэрээр Азийн зочин 20 дизайнерын эгнээнд багтан коллекцио дэлгэн ийнхүү өөрийн өнгө төрхөөрөө ялгаран Азийнхны загварын ертөнцөд цахиур хагалсан юм. Дизайнер Д.Отгонжаргал 2013 оны арванхосрдугаар сард “Нью Йоркийн загварын долоо хоног”-т өөрийн коллекцио дэлгэж байсан билээ. Тэрээр 2014 онд өөрийн би? Даасан “O Couture” загварын товчоогоо үүсгэн байгуулж тэр жилдээ дэлгэсэн гоёлын даашинзын коллекциороо ийнхүү Азид тэргүүлсэн юм.
Хийж бүтээх эрч хүчтэй авьяаслаг дизайнер бүсгүй олон улсад өөрийнхөө загваруудыг толилуулж байсан юм. Өөрийн гэсэн өнгө төрхийг бүтээлээрээ харуулдаг Д.Отгонжаргал дизайнер дээдсийн хүрээнийхний хувцсыг урладаг ч хэтэрхий даруухан нэгэн билээ.
Өнгөрсөн жил өөрийн бие даасан “O Couture-2015 fashion show”-гаа амжилттай зохион байгуулсан бөгөөд энэ жил дахин “O Couture-2016 high fashion show” хийхээр бэлтгэл ажилдаа орсон гэнэ шүү.
Түүний энэхүү шоуг дээдсийн хүрээнийхнийг хүсэн хүлээдэг болсон юм. Тэр ч утгаараа тэрээр загварын шоундаа олон гэнэтийн бэлгүүдээ дэлгэхээр зэхсэн сурагтай. Сүүлийн үед томоохон загварын шоуг өнжих болсон тэрээр нэг тэрбум төгрөгийн үнэтэй гоёлын даашинз урлаад завгүй байгаа талаар бор шувуу нисэх болсон юм. Энэ нь ч үнэний ортой гэнэ. Тэрээр Азийн загварын шоунд гранпри хүртэн Азийн дээдсийн хүрээнийхний гоёлыг урлаад эхэлсэн гэнэ. Нэг тэрбумын даашинзыг тэрээр Хонг Конгийн тэрбумтны өв залгамжлагч найз бүсгүйнхээ захиалгаар урлаж байгаа гэнэ. Нэг тэрбумын үнэтэй даашинз ямар байх бол оо. Өөрийн эрхгүй харахсан гэдэг бодол төрж байна шүү. Энэхүү даашинзын талаар сураг тавихад дизайнер Д.Отгонжаргал ирэх арванхоёрдугаар сарын 3-нд болох “O Couture-2016 high fashion show”-н дэлгэн үзүүлэхээр төлөвлөж байгаа гэнэ шүү.
Монголын дизайнерууд маань дэлхийн загварын салбарт хүч түрэн орж ирж байгаа нь Д.Отгонжаргал дизайнераас харагдаж байна. Монгол жүжигчид Холливудад хөл тавьсны нэгэн адил монголын дизайнерууд Холливудын алдартнуудын хувцсыг урлах цаг ойрхон болжээ. Азийн шилдэг дизайнер Отгонжаргал тэр замыг нээж олон дизайнерыг араасаа дагуулна гэдэгт итгэлтэй байна.
