Оскараас эхлэн өөр бусад үй олон шагналуудын эзэн алдарт жүжигчин Кейт Уинслетийн хувьд зуунд дуурсагдах шилдэг кино Титаник кино нэрийн хуудас нь мэт. Энэ кино түүнд жинхэнэ нэр алдар, дуусашгүй амжилтыг дагуулсан билээ.
1997 онд нээлтээ хийсэн Титаник киноны талаар тэр өнгөрөгч баасан гарагт нэгэн ярилцлагандаа дэлгэрэнгүй ярьжээ.
“Миний амьдралын нэн чухал хэсэг Титаниктай холбоотой. Титаник маш том эргэлтийн цэг байсан. Миний амьдрал үнэхээр нэг л шөнийн дотор орвонгоороо эргэсэн гэхэд хилсдэхгүй” хэмээн тэр ярьсан байна.
“Кино гарахаас өмнө хүмүүс надаас: За Кейт, кино хэрэв амжилттай байвал чи их өөрчлөгдөх байх даа, өөрчлөгдөхгүй байхын тулд юу хийе гэж бодож байна? Тэр бүхэнтэй чи хэрхэн нүүр тулах вэ? гэж асуудаг байсан. Тэгж асуух бүрт нь шал утгагүй санагдаж дургүй хүрдэг байсан. Хариуд нь би үргэлж л “Би өөрчлөгдөхгүй ээ, надад тэр бүхэн яаж ч нөлөөлөхгүй, тэгэхээр тайван бай” гэж хэлдэг байсан. Гэхдээ бүх зүйл үнэхээр нэг шөнийн дотор өөрчлөгдсөн. Би нэг өглөө гэрээсээ гараад сонингийн мухлагаас сонин аваад, дараа нь хүнсний дэлгүүрээс савтай сүү аваад буцаж харьсанаа санадаг. Харин маргааш өглөө нь гэрээсээ гартал үй түмэн паппарацичид гэрийн үүдэнд цуглачихсан намайг бүчиж авсан. Энэ бүхэн зүгээр шоконд ором байж билээ.”
Түүнд кинон дээр хэлэгддэг үгс, мөн Жак Рөүз нарын харилцаа, Жакийн дүр маш их таалагддаг байсан гэнэ.
“Хамгийн анх киноны текстийг аваад дүрд шалгуулж байсан хэд хэдэн жүжигчинтэй би текстийг уншсаныхаа дараа Леог тэр дүрд тэнцээсэй гэж үнэхээр их хүсэж байсан. Мэдээж тэр тэнцэж, бид хоёр хэцүү дүрүүдээ бүтээж эхэлсэн. Титаникт тоглох үнэндээ аймшигтай хүнд байж билээ. Гэхдээ бид хоёр маш сайн найзууд байсан учир үргэлж бие биедээ туслаж байсан.”- Кейт Уйнслет
