Поп од Мадонна тавдугаар сарын 31-нд Израилийн Рамат-Гана цэнгэлдэх хүрээлэнд дэлхийг тойрон хийх аялан тоглолтоо эхлэх болно. Тэрбээр энэ удаагийн аяллынхаа хүрээнд Берлин, Амстердам, Барселон, Истамбул, Филадельфи, Бостон, Монреал, Квебек-Сити, Нью-Йорк, Вашингтон, ЛосАнжелес зэрэг хотод 76 удаа тоглохоор төлөвлөжээ. Одоогоор дуучны тоглолтын 1,4 сая тасалбар зарагдаад буй.
Түүнийг дэлхийн олон орны хэвлэл мэдээллийн хэрэгслийн хэдэн зуун сурвалжлагч, уран бүтээлийн 350 хүнтэй баг, мөн охин Лурдес нь дагалдан явахаар болжээ. Мадонна “Хөгжим бол бүхэнд хүртээмжтэй гайхамшигтай урлаг юм. Би хөгжмийн ачаар Ойрхи Дорнодын энх тайвны асуудалд олны анхаарлыг хандуулж, сайн санаат хүмүүсийг нэг дор цуглуулна гэдэгт найдаж байна” хэлсэн байна. Үүний зэрэгцээ Мадонна сүүлийн 20 жил очоогүй Мексик, Австрали болон Өмнөд Америкийн зарим оронд тоглох бодолтой байгаагаа ч илэрхийлжээ.
П.ЭРДЭНЭ /MONGOLNEWS.MN/
