Өчигдөр МАХН-ын төв байр цагаан ордонд МУ-ын 21 аймгаас ирсэн иргэд “Ард түмэндээ үнэнийг хэлье” хэвлэлийн бага хурлыг хийлээ. Өнгөрсөн дөрвөн жилийн хугацаанд МУ-ын 21 аймагт ашигт малтмалын хайгуул болон ашиглалтын лиценз зах замбараагүй олгогдсоноос болж хөдөө орон нутгийн маань иргэд амьдрах газаргүй болсон талаар тэд мэдээлсэн юм. Канад, АНУ, БНХАУ, ОХУ, Солонгосын компаниуд ашигт малтмал бүхий газруудыг өмлөн цоолж, горхи булгийг хатааж, гол мөрнийг ширгээ байгаа гэнэ. Өмнөговь аймгийн иргэн Ж.Мөнххүрэл “Далайн эргийн орнуудад цунами гэж сүрхий гамшиг болдог.
Яг үүн шиг Өмнөговьд эх газрын цунами болж байна. Ашиглалтын лиценз бүхий компаниуд Өмнөговийн бүх сумдаар зай завсаргүй сүлжилдэж тэнгэрт тулсан тоос шороог босгож байна. Үүнээс үүдэн тэнд нь мал хүн нь амьдрах аргагүй болж амны усгүй болоход хүрлээ. Ард иргэдийг амьдарч байгаа газраас нь хөөж тууж мөнгө төгрөг өгч хуураад эх нутгийнхаа төлөө тэмцэж боссон иргэдийг барьж хорьдог жишиг тогтжээ. Гэвч ард иргэд энэ бүхэнд хэтэрхий тайван хандаж байна. Тэднийг уриалан оройлон оролцох хүн хэрэгтэй байна” гэв. Үүний дараа Баянхонгор аймгаас ирсэн иргэн А.Одончимэг мэдээлэл өглөө. Тэрээр Монголын төрд байгаа эрх баригчид МУ-ыг тэжээн тэтгэх эрдэс баялгийг 2,7 сая ард иргэдээ хуваан өгөх бус хорин хүнд л хуваан олгож өөрсдөө хагартлаа баяжиж байна. Баянхонгор аймагт GLO болон Монголын алт гэдэг компани 14 сумын газар нутгийг дайран урсаж хүн ардыг нь тэжээн тэтгэдэг Байдраг голын сав газарт алт олборлоод эхэллээ. Энэ бүхнийг нь эсэргүүцэн тэмцсэн ард иргэдийг тэд шүүхэд өгөөд хоёр шатны шүүхээр ялалт байгуулсан. Ард түмнийхээ эсрэг гарсан шүүхийн тогтоолоор далайлган тэд газар орныг минь сэндийчэн бузарлах ажилдаа бүрч их хүч нэмэгдүүлэн ажиллаж байна гэв.
Харин Увс аймгаас ирсэн иргэн Ж.Батсүх сүүлийн үед Бөхмөрөн сумын Хар алт бригадын тэмцэл хэвлэл мэдээллийн хэрэгслээр хангалттай цацагдсаны хүчинд ард иргэд маань газар нутагтайгаа үлдэж чадсан. Хэрвээ нийт Монголын маань ард иргэд ингэж тэмцсэн бол эх нутгаа ийм аймшигтай болтол сүйтгүүлэхгүй байх байсан. МУ-д ашигт малтмалын лиценз ямар замбараагүй олгогдсон бэ гэдгийг ард түмэн төдийлөн мэдэхгүй байна. Ганцхан жишээ дурдахад л Япон нөхөртэй Номундарь гэгч хүүхэн ганцаараа 100 гаруй хайгуул ашиглалтын лицензийг эзэмшиж байна. Түүнийх нь долоо нь ураны лиценз байна гэлээ. Эх орон газар нутаг маань ингэж сүйрч балран доройтож байхад эрх баригчид маань энд сандал суудлын төлөө үхэн хатан тэмцэлдэж байна. Та бүхэн юу хийсэн талаараа ард түмэндээ үнэнийг хэлэх цаг болсон гэв. 21 аймгаас ирсэн иргэд маань 10 м урттай, 6 м өргөнтэй тэмээний ноосон эсгийгээр Монгол орныхоо газрын зургийг гурав хоногийн турш урлаж хэрхэн сүйдсэн талаарх мэдээллийг заан үзүүлсэн юм.
