Линда Эвангелистагийн таван настай хүү Августин тэрбумтан эцгээсээ хүүхдийн тэтгэмж авахаар боллоо гэж AFP мэдээлжээ.
Канадын супер модель Линда Эвангелистагийн өргөдөл гаргасны дагуу өчигдөр Нью-Йоркт болсон шүүх хурлаар тэрбумтан Франсуа Хенри-Пиналтыг таван настай хүүдээ тэтгэмж олгох нь зүйтэй гэж шийдвэрлэсэн байна.
Манхэттэний гэр бүлийн шүүхийн шийдвэрийн дагуу Франсуа Хенри-Пиналт хүү Августиндаа сар бүр 46 мянган ам.долларын тэтгэмж өгөх аж. Харин Линда Эвангелиста 24 цагаар ажиллах жолооч, бие хамгаалагч нэмж шаарджээ. Гэвч шүүх түүний өөр хүсэлтийг нь хүлээн авахаас татгалзсан байна.
Өдгөө 46 настай Линда Эвангелиста 1999 онд Францын шигшээ багийн хаалгач Фабиен Бартезтэй гэрлэсэн боловч хүүхэд нь амьгүй төрсний дараа хосууд хоёр тийш болсон аж. Үүний дараа супер модель хэсэг хугацаанд ажлаасаа хөндийрсөн юм.
2005 оноос хойш PPR группийн өв залгамжлагч, Европын топ СЕО (гүйцэтгэх захирал) Франсуа Пиналттай үерхэж 2006 онд хүүтэй болжээ. Гэвч хосууд гэрлэхээсээ өмнө салсан байна. Манхэттэний шүүх топ моделийн хүүг 18 нас хүртлээ эцгээсээ сар бүр тэтгэмж авах ёстой гэж шийдвэрлэсэн юм. Франсуа Пиналт 2009 оноос хойш харилцаатай байсан жүжигчин Салма Хайектэй гэрлэжээ.
Т.Арьяа /Time.mn/
