Дэлхийн супер модель хэмээх хүндтэй алдрын эзэн болсон “Шилмэл загвар” агентлагийн загвар өмсөгч Т.Шинэтуяатай ярилцлаа. Тэрбээр хэдхэн хоногийн өмнө Өмнөд Африкийн Блумфонтейн хотноо зохион байгуулсан World supermodel pageant тэмцээнд оролцоод ирсэн юм. Т.Шинэтуяа “Гэгээрэл” бүрэн дунд сургуулийн аравдугаар ангид сурдаг ажээ.
-Дэлхийн супер модель болсон танд баяр хүргэе. Энэхүү тэмцээнд оролцохоо хэзээ мэдэж, бэлтгэлээ базаасан бэ?
-Юуны өмнө надад итгэл хүлээлгэн урам зориг өгч, дэлхийн супер модель шалгаруулах тэмцээнд эх орноо төлөөлөн оролцох боломж олгосон “Шилмэл загвар” агентлагийн ерөнхий захирал Ч.Оюунцэцэг болон намайг тусалж дэмжсэн багш нар, гэр бүл, найз нөхдөдөө баярлалаа гэж хэлье. Дэлхийн супер модель шалгаруулах тэмцээнд оролцохоо нэлээд хэдэн сарын өмнө мэдсэн. Тиймээс тэмцээнд нэлээд эртнээс бэлтгэсэн гэж ойлгож болно. Гэр бүлийнхэн маань надад маш тусалсан. Миний хувьд өдөр болгон багш нараасаа заавар зөвлөгөө авч, агентлагтаа ирж, бэлтгэл хийдэг байлаа. Мөн нүүр будалтын хичээл заалгахын зэрэгцээ гадаад хэлний боловсролдоо маш их анхаарсан.
-Таныг хятад хэлний мэдлэгтэй гэсэн. Англи хэлийг хэдий хугацаанд сурч, тэмцээнд оролцсон бэ?
-Багаасаа хятад хэл сурсан. Тэмцээнд оролцохоос өмнө англи хэл сурдаг байсан ч Өмнөд Африк руу явна гэдгээ мэдсэнээс хойш илүү эрчимтэй хичээллэсэн. Үүний үр дүнд тэмцээний үеэр гадаад хэлний тал дээр санаа зовох зүйл гараагүй.
-Дэлхийн чанартай тэмцээнд гадаадын загвар өмсөгчид бүтэн баг авч явдаг юм билээ. Таны хувьд Өмнөд Африкийг зорихдоо ямар бүрэлдэхүүнтэй явсан бол?
-“Шилмэл загвар” агентлагийн гүйцэтгэх захирал Б.Тамир, түүний гэргий менежер Б.Мөнхцэцэг болон загвар өмсөгч Т.Батцэцэг эгчтэй хамт явсан. Энэ хүмүүс надад маш их тусалсан.
-Тэмцээний шалгаруулалтын үеэр орон орны миссүүд нэг өрөөнд байрлаж, илүү дотно нөхөрлөдөг. Та ямар улсын миссүүдтэй нэг өрөөнд байрлав?
-Ботсвана, Англи, Шинэ Зеланд улсын мисстэй нэг өрөөнд байрласан. Тэмцээний шалгаруулалтын үеэр миссүүдийн бүх зүйлийг ажигладаг. Хүмүүстэй харилцаж буй байдал, биеэ хэрхэн авч явж байгааг харахаас гадна өөр олон зүйлийг ажиглаж шалгаруулалтыг дүгнэдэг.
-Шалгаруулалтын үед төлөвлөж, хийж байсан зүйлсээ бүгдийг нь гаргаж чадсан уу?
-Орон орноос ирсэн сайхан бүсгүйчүүд бэлтгэлээ маш сайн хийгээд ирсэн байсан. Энэ нь тэмцээний шалгаруулалтын үеэр харагдсан л даа. Би ч гэсэн чадлынхаа хэрээр бэлтгээд очсон болохоор мөчөөгөө өгөөгүй. / инээв/ Миний хувьд хамгийн түвэгтэй шалгаруулалт нь зураг авахуулах байлаа. Олон жил ажил-ласан туршлагатай моделиуд биеэ барилгүй, чөлөөтэй зураг ава хуулж байсан. Бүгд л хичээж шалгаруулалтад оролцсон бо-лохоор эн тэнцүүхэн өрсөлдсөн дөө.
-Загварын ертөнцөд өөрийн гэсэн орон зайг бүрдүүлсэн загвар өмсөгч Т.Батцэцэгтэй хамт явсан нь танд их тус дэм болов уу?
-Т.Батцэцэг эгч надад маш их тусалсан. Өдөр бүр шалгаруулалтад хамт оролцож, зөвлөгөө авсан. Бид Өмнөд Африкт очоод орчинтойгоо танилцахын зэрэгцээ олон сайхан зураг авахуулсан.
-Тэмцээний ялагчийг зарлах мөчид танд ямар сэтгэгдэл төрсөн бэ?
-Тайзан дээр шилдэг 16 оролцогчийг тодруулсан. Түүний дараа хаалтын шалгаруулалт болж, үлдсэн оролцогчид бүжиг хийсэн юм. Дараа нь хөтлөгчид шилдгүүдийг зарлаж эхэлсэн. Тухайн үед миний нэрийг дуудахгүй байсан болохоор санаа зовж, айж байлаа. Тэгж байтал гэнэт “Mongolia” гэж хэлэхэд нь сэтгэл маш их хөдөлсөн. Тэр үед эх орноороо дуудуулах ямар сайхан, бахархмаар байдгийг мэдэрсэн. Ер нь тэмцээнд оролцохдоо түрүүлэхийн төлөө явсан ч титэм зүүнэ гэж төсөөлөөгүй. Тийм болохоор дэлхийн супер модель хэмээн дуудуулсан тайз надад хэзээ ч мартагдахааргүй сайхан дурсамж үлдээлээ.
-Супер модель болсон баярт мэдээгээ хамгийн түрүүнд хэнтэй хуваалцав?
-Ч.Оюунцэцэг захирал руугаа ярьсан. Дараа нь гэр бүлийнхэндээ сайхан мэдээг дуулгасан.
-Та цаашид энэ чиглэлээрээ дагнан ажиллана гэж бодож байна уу, эсвэл өөр мэргэжил эзэмшихээр төлөвлөсөн үү?
-Загварын чиглэлээр ажиллана, бас өөр мэргэжил эзэмшихээр суралцана. Эдийн засаг, бизнесийн чиглэлээр мэргэших бодолтой байгаа.
-Нью-Йоркт төвтэй “Trump Models” агентлагтай гэрээ байгуулах эсэхээ шийдсэн үү?
-Гэр бүлийнхэн болон агентлагийнхантай ярилцаж байгаад шийдвэрээ гаргана. Хэрвээ шийдвэл алхаа, бие болон гадаад хэлний мэдлэгээ сайжруулж байгаад явна даа.
-Чөлөөт цагаа хэрхэн өнгөрүүлдэг вэ?
-Би багаасаа уран гимнастикаар хичээллэсэн болохоор одоо ч гэсэн чөлөөт цагаараа хичээллэдэг юм. Мөн сургуулийнхаа сагсан бөмбөгийн шигшээ багт тоглодог. Усан спортоор хичээллээд жил гаруй болж байна. Эхлээд сэлж суръя гэж бодсон, сүүлдээ энэ спортоор гүнзгийрүүлэн хичээллэхээр болсон. Бас чөлөөт цагаараа дүү нарынхаа хичээлийг хийлгэдэг.
-Гэр бүлийнхнээ танилцуулна уу?
-Би аав ээж, хоёр дүүтэйгээ амьдардаг. Аав ээж маань хувиараа бизнес эрхэлдэг. Намайг загварын агентлагт суралцах санааг анх аав надад хэлсэн. “Эмэгтэй хүн биеэ зөв авч явж сурах хэрэгтэй” гэж зөвлөснөөр загварын агентлагт хөл тавьсан.
-Эмэгтэй хүний хамгийн дотнын зөвлөгч нь ээж байдаг. Тэмцээнд оролцоход ээж нь юу гэж зөвлөсөн бэ?
-Тэмцээний бүх үед надтай хамт байсан хүн ээж минь. Шалгаруулалт бүрт утсаар ярьж, урам зориг өгч байсан ээждээ маш их баярлалаа, бас хайртай.
Б.Сэлэнгэ