“Бөртэ” хамтлагийн ятгачин, Соёлын тэргүүний ажилтан Ч.Мөнх-Эрдэнийг сонсогч фэнүүд нь “Ятга хөгжмийн хатан” хэмээн өргөмжлөх болсоор удаж байгаа билээ. Авьяаслаг ятгачин бүсгүйн ур чадвар, эгшиглэнт уран бүтээлийг Монголд төдийгүй Европын орнуудад өндрөөр үнэлдэг юм билээ. “Ингэн тэмээний нулимс”, “Шар нохойн там”, “Чингисийн хоёр загал” зэрэг киноны хөгжмөөрөө ч тэр хэдийнэ олонд танигдсан нэгэн.
Тэгвэл авьяаслаг ятгачин бүсгүйн нөхөр болох Д.Ганпүрэв нь мөн “Бөртэ” хамтлагийн хөгжимчин бөгөөд тэд хамтдаа нэлээдгүй олон тоглолтыг гадаад орнуудад зохион байгуулж байжээ. Түүний нөхөр Д.Ганпүрэв нэлээд хэдэн хөгжмийнх нь аялгууг зохиосон авьяаслаг уран бүтээлч төдийгүй эхнэрийнхээ арын албаны бүхий л ажлыг хариуцан хийж бүтээсэн бүхнийг нь олонд харуулахыг зорьж явдаг юм билээ.
Харин өнөөдөр “Ятгын хатан хаан”-ы нөхөр өөрийн цахим хуудсандаа энэхүү бичиглэлийг үлдээж, эхнэрийнх нь гавьяа зүтгэлийг үнэлээгүй төр засагт ихэд гомдож явдгаа илчиллээ. “Миний нөгөө тал, энэ амьдралын эсрэг туйл. Тэр нь ч сайхан. Нэг цэнэгтэй болчихвол бид яаж амьдрах билээ. Түүнд саад болох нь гэмт хэрэг, учир нь зууны манлай уртын дууч Н.Норовбанзад, алдарт хуурч Ц. Батчулуун, Төрийн шагналт хөгжмийн зохиолч Ц.Чинзориг нарын хатуу зөвлөгөө хууль мэт, надад тус мэт, сэтгэлд дурсамж болно үлдэж.
Алдартнуудын зааж зөвлөснөөр түүний биеийг нь би мэдэж, авъяасыг нь төр мэддэг байлаа. Ах эгч нарын өмнө түүний авъяасыг зэврүүлэхгүй байх үүргийг би хүлээж аль алийг нь тордож, зүтгэсээр 20 жил боллоо. Харин төр түүнийг мартсанд гайхдаг. Түүнийг тэр үеийн алдартнуудтай харьцуулж ойлгоно уу гэхээс дүү нартай нь уралдуулах нь зохимжгүй. Түүнд асар их хүч, хөдөлмөр, авъяас цогцолсон болхоор манайх гэдэг айлд гэргий гэдэг ойлголт зохидоггүй юм.
