Би хоёр дахь охиноо төрүүлэх үедээ нэлээн жин нэмсэн. Анх жирэмсэн болж байсан үеэ бодвол өөртөө илүү их анхаарал хандуулж юу хүссэнээ хамаагүй их идэх болсон нь нөлөөлсөн л дөө. Тэгээд ч олон жилийн дараа төрж байгаа болохоор хүн болгон л анхааралаа хандуулж би ч дүрдээ итгээд барагтай л бол хөдлөхгүй эрхлэж хэвтсээр анх 56 кг байсан хүн чинь төрөх дөхөхөд 68 кг, төрсний дараа 76 кг болтолоо таргалсан даа. Мэдээж энэ бол бахархаад байх зүйл биш. Хурдан тэнхэрнэ гэж шөл ууна, дээрээс нь сүү оруулна гээд гурилан бүтээгдэхүүн байнга иднэ, сүүтэй цайг бол халуун сав саваар нь ууж гарна. Ингэсээр би дэндүү их таргалсан.
Эмэгтэйчүүд жирэмсэн болсноор бүдүүнчүүдийн эгнээнд орох нь олон. Жирэмсэн байхдаа хэт их жин нэмсэн бүсгүйчүүлийн олонх нь жин ихтэй хүүхэд төрүүлэх бөгөөд цаашид насан туршдаа илүүдэл жинтэй үлддэг. Ийм ээжээс төрсөн хүүхэд багтраа, харшил, зүрхний өвчин эмгэг, чихрийн шижин, хорт хавдар тусах магадлал өндөр байдаг. иймээс илүүдэл жин нь ээжид төдийгүй төрөх хүүхдийн цаашдын эрүүл мэндэд хүртэл хор хөнөөлтэй юм. Ерөнхийдөө жирэмсний жин нэмэлт нь жирэмсний өмнөх жин, хөдлөгөөний идэвхи, бодисын солилцооны эрчмээс ихээхэн хамааралтай. АНУ-ын Эрүүл мэндийн Институтын зөвлөж байгаагаар тарган эмэгтэйчүүд жирэмсэлбэл жирэмсний хугацаанд дээд тал нь нийт 11.2 кг, хэвийн жинтэй бол 16 кг, харин жин багатай бол 18 кг нэмж болно гэжээ. Үүнээс хэтэрбэл эмгэг болно гэсэн байна.
Тэгэхлээр жирэмсний үед жингийн илүүдэлд орохгүйн тулд яах вэ?
Хоёр хүн хооллож байна гэдэгт хэт бүү авт. Энэ ойлголт нь харьцаагүй, замбараагүй хэрэгцээ шаардлагыг буй болгодог. Жирэмсний эхний 3 сард эх хэвийнхээс ердөө 350-450 ккалыг нэмэх ёстой, Энэ нь ердийн хооллолтон дээр ганц зүсэм хачиртай талх, аяга сүү, багаахан жимс л нэмнэ гэсэн үг.
Идэж буй хоол хүнсээ хяна. Түргэн хоол, чихэрлэг хүнс, гаазтай чихэртэй цай ундаанаас 10 кг нэмэх нь эрүүл хооллолтоор 10 кг нэмэхээс огт өөр зүйл. Тэгэхлээр эхчүүд жингээ хянахын зэрэгцээ хэрэглэж буй хоол хүнснээсээ ундаа, жүүс, чихэрлэг боов зэргийг бүр мөсөн хасах хэрэгтэй. Мөн хоолны завсар зайнд иддэг шарсан төмс, чихэр, жигнэмэгийг хэрэглэхгүй байх хэрэгтэй. Учир нь энэ бол илүүдэл өөх л болохоос өөр юу ч биш. Хооллолтондоо жимс, ногоо, самар, эрүүл өөх тос, буудайн гурилан бүтээгдэхүүн, оливын тос, авокадо байнга хэрэглэж бай. Эрүүл сонголт бол эрүүл мэндийг авчирна. Шарсан хайрсан, хуурсан, даршилсан лаазалсан, хэт боловсруулсан, цагаан гурил, элсэн чихрээс зайлсхий.
Өдөр бүр дасгал хийж бай. Жирэмсний 3 дах сараас фитнес клубт тогтмол хамрагдаж болно. Ерөнхийдөө хөдөлгөөнгүй байдлаас зайлсхийж, алхах, шогших, усанд сэлэх зэргээр байнга идэвхитэй байдлыг эрхэмлэж бай. Үүний зэрэгцээ өөх тос, чихэрлэгийг багасга.
Жингээ тогтмол хянаж бай
Сэтгэл санаагаа тайван амгалан байлгаж, сэтгэлийн хямралаас ангид байхыг хичээ. Жирэмсний хугацаанд иогийн дасгалаар хичээллэж, жирэмсний үеийн дасгал хийх, хөгжим сонсох зэргээр цагийг өнгөрөөж бай.
