Социализмын үеэс л ёгт утгатай, “чимхсэн” бүтээлүүдээ “Тоншуул” сэтгүүлд хэвлүүлж үзэгчдийн танил болсон урлагийн гавьяат зүтгэлтэн, шог зураач Ц.Байды ээлжит үзэсгэлэнгээ дэлгэжээ. Шилтэй цэнхэрт өвдөг шороодчихоод “Нэг л мэдэхэд уначихсан байх юм” хэмээн өөрийгөө цагаатгаж зогсоо эр, зо рилгоо умартан архины шилэнд тухалж, гүн нойронд дарагдсан баатрыг “Сэрээд, эх орон чинь дуудаж байна” хэмээн дуудах морь, лонх олоод сониучирхсан бамбаруушаа “Хүн болох чинь дутаа юу, тэнэг ээ” хэмээн загнах ээж баавгай зэрэг бид бүхэнд хэзээний танил болсон зургуудаа Ц.Байды үзэсгэлэнд зориулан томруулж зуржээ. Үүнээс гадна шог зураачийг арай өөр талаас харуулах байгалийн зургууд энд байна. МУЭ-ийн үзэсгэлэнгийн танхимд өнгөрсөн баасан гаригаас үзэгчдийн хүртээл болж байгаа “Наран дуулал” үзэсгэлэн энэ долоо хоногийг дуустал үргэлжилнэ. 100 гаруй бүтээл дэлгэсэн үзэсгэлэндээ Ц.Байды 2011-2012 онд зурсан шинэ бүтээлээсээ гадна, гадаад, дотоодын шагнал хүртэн зургуудаа ч багтаажээ. Тэрбээр 1981 онд МУЭ-ийн үзэсгэлэнгийн танхимд “Шог зураг” нэртэй анхын үзэсгэлэнгээ дэлгэж байжээ. “Наран дуулал” түүний 13 дахь бие даасан үзэсгэлэн. Ц.Байды шог зургаар дагнан “Монголын хошин шог зургийн дээжис”, “Хөдөө Бандгай, Хүрээ Даадай” гэх мэт 10 гаруй ном гаргасан билээ.
Х.УЯНГА /MONGOLNEWS.MN/
