Өвөрмонгол эртэй гэрлэж, хөөрхөн охинтой болсон дуучин С.Сэрчмаа фэнүүдээ, эх орноо санасан учир нөхрөөсөө өрх тусгаарлан, нутагтаа ирээд байгаа. Дуучин бүсгүй юм л бол “Би үзэгч, сонсогчдоо, Монгол эх орноо санасан учир Монголдоо ирж, уран бүтээлээ хийхээр шийдсэн” хэмээн телевиз, сонины ярилцлага бүртээ дурьдаж, “Хэсэг хугацааны дараа буцаад нөхөр дээрээ очино оо” хэмээн хувийн амьдралаа эвтэйхэн аварч буй.
Тэгвэл дуучин бүсгүй хүсэн хүлээсэн шинэ уран бүтээлийн ажлаа хэдийнэ амжуулж эхэлжээ. Тэрбээр саяхан л дуучин Р.Номин-Эрдэнэтэй хамтран “Өгөх өдөр” төрийн бус байгууллагын дууг дуулсан бол дахин нэг шинэ бүтээлээ үзэгчдэд танилцуулаад байна. “Ханилснаас илүү амраг” олон ангит киноны дуу болох “Сэтгэлийн драм” нэртэй дуу түүний шинэ бүтээлийн тоог нэгээр нэмлээ. Шинэ эрч хүч, шинэ өнгө төрхөөр урлагтаа эргэн ирсэн С.Сэрчмаагийн “Сэтгэлийн драм” бүтээл өчигдрөөс үзэгчдийн хүртээл болоод эхэлжээ.
