1: Харилцан бие биенээ хайрлах чанарыг
Хэн нэгэн танд “Хайраараа гэрлэдэг хос гэж бараг байдаггүй юм” гэж хэлсэн бол сэтгэлээр унахаа түр азнаарай бүсгүй минь. Хэдий орчин үед эд хөрөнгө, гарал угсаа харж гэрлэлтээ батлуулах явдал байгаа нь үнэн ч дийлэнх эрчүүд харилцан бие биедээ хайртай байх явдлыг №1 гэрлэлтийн шалгуур хэмээн үзэх нь хэвээрээ байгаа аж. 1980-аад оны дун үед ихэнх эрчүүд итгэл даах чанарыг тэргүүнд тавьж эхнэрээ сонгодог байжээ. Харин одоо хайр сэтгэл нэгт тавигдах болж.
2: Итгэл даах чанар
Та хэрэв хэн нэг эрийг нөхрөө болоход тохирсон хүн гэж үзэж байгаа бол түүнд өөрийгөө хэр итгэл даахуйц эмэгтэй болохыг харуулах хэрэгтэй. Учир нь эрчүүд итгэлцэл дээр тулгуурласан харилцаандаа хамгийн сэтгэл өндөр байж, үнэнч ханддаг. Байгаагаар нь хайрлаж, өөрийнх нь талд үргэлж зогсож чадах эмэгтэйд тэд аз жаргалтайгаар сүйн бөгжөө зүүлгэдэг юм. Итгэл даах чанар бол анхнаасаа хайрлаж эхлэх үнлэс суурь ч байж мэднэ.
3: Сэтгэл санааны тогтвортой байдал
Хуйсагнуур, хувирамтагай, уйдамтгай зан чанартай бүсгүйг эрчүүд эхнэрээрээ сонгохгүй ба сонгосон ч үргэлж санаа нь зовнисоор бүр залхаж гүйцнэ. Тиймээс хэрэв танд өмнө нь олон эрчүүдийг сольж байсан, хэн нэгнийг хуурч эсвэл хэн нэгнээс амархан уйдаж байсан түүх байгаа бол түүнийгээ өөрийн ирээдүйн нөхөр болох хүндээ хэлэхгүй байсан нь дээр юм. Эсвэл бага зэрэг эерүүлж хэлж болох юм. Учир нь эрэгтэй хүн таны талаар иймэрхүү муу мэдээллийг мартдаггүй сул талтай.
4: Боловсрол ба оюун ухаан
Оюун ухааны түвшин бол эрчүүдийн эхнэр болох хүнээсээ хайх тэргүүн шалгууруудын нэг аж. Сайн боловсролтой эмэгтэйчүүдийн эрэлт хэзээ хэзээнийхээс илүү ихсэж байгаа. Эрчүүд алсын хараатай учир ирээдүйн хүүхдийнхээ потенциалыг өндөр байлгахыг хүсдэг. Түүнээс гадна тэд хэдэн жилийн дараа “том гар” болохын тулд өөрийнх нь сайн “шадар сайд” болж чадахуйц, мөн нэр хүндийг нь унагаахгүй байхаар хүнийг эхнэрээрээ сонгох нь их болжээ.
5: Сайхан зан ааль
Энэ бол сайн эхнэрт байх ёстой зайлшгүй шинжүүдийн нэг. Тайлбар хийх нь илүүц биз ээ.
6: Найрсаг, нөхөрсөг зан
Гэр бүлээрээ хоорондоо нөхөрлөх нь “моод” болоод байгаа гэхэд хилсдэхгүй. Угаасаа ийм нөхөрлөл нь хосуудын харилцааг улам бат бөх болгодог нь батлагдаад байгаа. Чөлөөт цагаа ч эхнэртэйгээ хамт хөгжилтэй өнгөрүүлэх боломжтой болдог учраас тэр. Тиймээс эрчүүд ч, эмэгтэйчүүд ч мөн адил олонтойгоо эв эетэй, найрсаг байж чаддаг өөрөөр хэлвэл зожиг биш, яриа хөөрөө сайтай зан чанарыг ирээдүйн ханиасаа хайдаг аж.
7: Сайн эрүүл мэнд
Үр хүүхэд, ач зээгээ тойруулаад, хэдэн арван жилийн турш ханилсан эхнэр/нөхөртэйгөө аяга цай хувааж уухыг хүсдэггүй хүн гэж хэн байх вэ? Үүнийг л “амар сайхандаа жаргах” гэдэг байх. Харин ингэж өнө удаан жаргалтай гэрлэлтийг бий болгохын тулд эхнэр нөхрийн аль аль нь эрүүл энх байх хэрэгтэй. Тиймээс ч эрчүүд гэргий болох эмэгтэйнхээ эрүүл мэндийг нэн чухалд үздэг юм байна.
8: Үзэсгэлэнтэй байх
“Эр хүн сармагчингаас жаахан дээр л байхад болно. Харин эмэгтэй нь гоо сайхан байх хэрэгтэй” гэсэн хэн зохиосон нь үл мэдэгдэх сургааль бий. Өдөр ирэх тусам бүсгүй хүний үзэсгэлэн гоо эрчүүдийн хувьд чухал болжээ. Энэ нь тэдний хүүхдүүдээ хөөрхөн байлгах гэсэн хүсэлтэй ч мөн холбоотой аж. Гэвч зөвхөн том алаг нүд, өндөр хамар, зузаан уруул гоо сайхны шалгуур мөн гэж үү? Эрчүүд үүнд нэгэн дуугаар үгүй гэж хариулна. Учир нь эрчүүдийн хувьд сайхан эмэгтэй байна гэдэг өөрийнхөө давуу талуудыг мэддэг, түүнийгээ тодотгодог, өөрийнхөө гадаад үзэмжинд анхаарал тавьдаг байх нь чухал аж.
9: Хүүхэдтэй болохыг хүсдэг байх
Үр удмаа үлдээх бол эрчүүдэд байдаг төрөлхийн хүсэл юм. Тэд хүүхдэд хайртай, өөрөөс нь хүүхэдтэй болохыг хүсдэг эмэгтэйг эхнэрээрээ сонгодог.
10: Чин сэтгэл ба аж ахуйч байдал
Ямар ч зүйлийг чин сэтгэлээсээ хамгийн сайн хүртэл нь хийх гэсэн эрмэлзэл эрчүүдийг татдаг гэвэл та итгэх үү? Мөн хоол сайн хийдэг, цэвэр цэмцгэр эмэгтэйд тэд гэрээ даатган үлдээж болно хэмээн үзэж, эхнэр болох хүнээсээ аж ахуйч чанарыг их бага хэмжээгээр хайдаг. Орчин үед карьер хатагтай нар ихсэж, заавал гэрийн ажил сайн хийдэг байх нь жинхэнэ эмэгтэй хүний шалгуур байхаа больсон хэдий ч эрчүүдийн хувьд ядаж товч оёж, цамцыг нь сайхан индүүдчихдэг бүсгүйг эхнэрээрээ сонгох хүсэл нь хэвээрээ байгаа гэнэ. Гэвч энэ шалгуурын эзлэх байр нь орчин үед улам л багасч байгаа нь феминист бүсгүйчүүдийн хувьд сайн хэрэг.
Эдгээр 10 шинж чанарыг эхнэр болох хүнээсээ хайдаг хэдий ч эрчүүдийн хувьд хамгийн тэргүүн бөгөөд хүчтэй нь бие биедээ хайртай байх явдал юм. Хайраараа гэрлэсэн хосууд хамгийн бат бөх байдгийн учир нь хайр гэдэг өөртөө итгэл, сэтгэл, халамж, тэсвэр хатуужил, хүндэтгэлийг бүгдийг нь багтаачихсан байдаг болохоор тэр. Бие биедээ сэтгэлтэй л бол үлдсэн 9 чанарыг ямар ч нөхцөл байдалд бий болгож чадна.
Харин та ямар эрийг нөхрөө болгохыг хүсдэг вэ?
Эдгээр 10 шинж чанарыг эхнэр болох хүнээсээ хайдаг хэдий ч эрчүүдийн хувьд хамгийн тэргүүн бөгөөд хүчтэй нь бие биедээ хайртай байх явдал юм. Хайраараа гэрлэсэн хосууд хамгийн бат бөх байдгийн учир нь хайр гэдэг өөртөө итгэл, сэтгэл, халамж, тэсвэр хатуужил, хүндэтгэлийг бүгдийг нь багтаачихсан байдаг болохоор тэр. Бие биедээ сэтгэлтэй л бол үлдсэн 9 чанарыг ямар ч нөхцөл байдалд бий болгож чадна.
