- “Плэйбой” сэтгүүлийн анхны дугаарын хавтсыг Мэрилин Монро “чимжээ”. Энэ зургийг авахуулсаныхаа төлөө Монро ердөө 50 доллар авсан байна. Харин Плэйбой сэтгүүлийн эзэн Хью Хэфнер зурагчнаас нь 500 доллараар авч байжээ.
- Олны дунд маш нэр алдартай байсан хэдий ч Монро харьцангуй бага “гонорар” авдаг жүжигчин байжээ. Жишээлэхэд, “Жентельменүүд шаргал үст бүсгүйчүүдийг сонгодог” кинонд түүнтэй хамт тоглосон Жейн Рассел түүнээс 10 дахин их хөлс авсан байдаг.
- Мөн дуусгаж амжилгүй өөд болсон “Нэг зүйл болох л ёстой” кинонд тоглосны хөлсөнд 100 ам.долларын шагнал авсан. Харьцуулахад, тэр үед нэр алдраараа Монрогийн хаана ч хүрэхгүй байсан Тейлор Клеопатра харин нэг сая доллар хармаалжээ.
Монрогийн хамгийн их дуулиан тарьсан тоглолт нь 1962 онд Ерөнхийлөгч Кеннедийн төрсөн өдрөөр дуулсан дуу гэж үздэг. Дууг их өдөөн хатгасан, айлгүй маягтай дуулсан төдийгүй олны анхаарал татсан шалиг гэмээр даашинз өмссөн байсан гэж тухайн үеийн үзэгчид хэсэгтээ ярьжээ. Хожим энэ даашинзыг Кристи дуудлага худалдаагаар 1,26 сая ам.доллараар зарсан байдаг.
- Америкийн Реклам сурталчилгааны холбоо 1953 онд Монрог Америкийн хамгийн рекламын бүсгүйгээр тодруулжээ. Тэрээр Америкт үйлдвэрлэсэн тураах тос, нарнаас хамгаалах түрхлэгээс эхлээд нисэхийн компани, шар айрагны хүртэл маш олон рекламанд тоглосон байдаг.
- Монро нэг ч удаа Оскарт нэр дэвшиж байгаагүй ч 1960 онд “Жазд зөвхөн бүсгүйчүүд тоглоно” кинонд бүтээсэн дүрээрээ “Алтан бөмбөрцөг” авсан байдаг.
- Мэрилин Монрогийн дүрийг кинонд Эшли Джадд, Мира Сорвино, Келли Гарнер, Мишель Уильямс нарын олон жүжигчид бүтээсэн. Харин Мишель Уильямс нь Монрод хамгийн их дөхөж очсон учраас “Алтан глобус”-ын эзэн болсон юм.
- Монрог хамгийн алдартай дуурайгч нь Америкт амьдардаг Сьюзан Гриффитс юм. Тэрээр алдарт Монрогийн нэрээр олон сая доллар халаасалж чадсан азтай нэгэн. Хачирхалтай нь тэрээр 21 нас хүртлээ Монрогийн тоглосон ганц ч киног үзэж байгаагүй байдаг. Тэрээр Монротой төстэй гэдгээ мөнгө олж болно гэдгийг мэдэх хүртлээ гоо сайхны дэлгүүрт худалдагч, цайны газар зөөгч хийдэг байжээ. Харин одоо элдэв хүлээн авалт, арга хэмжээ, шоунд “хулхи” Монро хамгийн багадаа цагийн 1,5 мянгаас 4000 доллар хүртэл хөлс авдаг гэнэ.
- 1959 онд Монро нь Америкт айлчилж байсан Зөвлөлтийн удирдагч Хрущевтой уулзжээ. Гэхдээ ном, сонин уншдаггүй, зурагт үздэггүй, улс төр огт сонирхдоггүй Монро Хрущевыг хэн болохыг мэддэггүй, мэдэхийг ч хүсдэггүй байж. Гэтэл оросууд АНУ-ыг Мэрилин Монро, Кока Кола хоёроор л мэддэг гэж хэлсэн нь ихэд таалагдсан учраас баярласандаа ийнхүү очиж уулзжээ. Тэд Достоевскийн “Ах дүү Карамазовынхан” романы тухай ярилцсан байдаг. Аз болоход Хрущев урлаг, утга зохиолын талаар тун маруухан мэдлэгтэй хүн байсан бөгөөд Достоевскийн энэ хүнд романыг уншсан нь юу л бол.
- Монрогийн дуртай зураач нь Франсиско Гойя байжээ. Тэрээр “Би түүнийг маш сайн мэднэ. Түүний хүүхэд байхдаа зүүдэлдэг байсан зүйлсийг би ч бас зүүдэлсэн” гэж ярьдаг байж.
- Дэлхийн хоёрдугаар дайны үед Монро нисэхийн үйлдвэрт ажилладаг байсан. Тэрээр шүхрийн чанарыг шалгаж, онгоц будах ажил хийдэг байжээ.
П.УНДРАА
PHOTONEWS.MN