Загварын ертөнцөд “Монгол Райн” хэмээгдэн хэсэгтээ л од болж явсан загвар өмсөгч С.Эрдэнэцогт мэргэжил нэгт С.Төгстэй ханилснаас хойш олонд танигдах болсон. Найз бүсгүйтэйгээ хамт онгоцонд нисч явахдаа гэрлэх санал тавьж, бяцхан охиноо төрсний дараа зүрхэн тушаа газартаа “Сийлэн” хэмээх содон нэрээр нь шивээс хийлгэсэн гээд л түүнийг тойрсон элдэв сенсааци дүүрэн.
Гэвч шөнийн цэнгээний газарт тайчигч бүсгүйтэй олны өмнө элдвээр аягласан зураг нь хэвлэлд тархаад удаагүй байхад загвар өмсөгч С.Төгс түүнээс салж буйгаа албан ёсоор мэдэгдэж байлаа. Тэр ч байтугай, охиноо төрсөн цагаас хойш шоу цэнгүүнээс огт салаагүй эр нөхрөө өдийг хүртэл тэвчиж амьдарсандаа харамсаж буйгаа илэрхийлсэн. Үүнээс хойш загвар өмсөгч С.Эрдэнэцогт “усанд хаясан чулуу” шиг ор тас мартагдсан төдийгүй одоо нэгэн фитнесс клубт дасгалжуулагч багшаар ажиллаж яваа.
Харин мань эр саяхан загварын ертөнцийн талаархи нэгэн сонирхолтой дүгнэлтээ олон нийтэд ил болгож, зарим нэгний дургүйг хүргээд авлаа. “Загвар гэдэг бол царайлаг үгүй нь хамаагүй. Угаасаа өндөр нуруу, тэгээд мөр тааз тэнцүү, хөл уртхан, майга биш л бол… Миа царайг нь өвөрмөц царай гээд аргалчихна. Нэг гараа халаасандаа хийгээд нөгөө гараа сул хаяад дээр доор хамаагүй, аль нэг булан руу бодлогошронгуй харж зургаа даруулахыг л “high fashion” гээд байгаа юм шүү дээ. Сурч бодож ядаад байх юм юу ч байхгүй. Царцаа Намжил шиг хэдэн поз цээжлээд л болоо. Ерөөсөө л ээж ааваас ирсэн өгөгдлөө л ашиглана шүү дээ. Миа бол миагаараа, үнэхээр гоё бол миа байя гэсэн ч зурган дээр гоёороо л гарна шүү дээ, дуракууд аа. Загвар гэдэг чинь сураад мэдсэнээрээ лаг модель болчихдог эд биш, миний ажигласанаар…” хэмээн тэрбээр илтэд бардамхан бичжээ. Угийн “төрсөн” хүн ч цаанаа л өөр байдаг юм байна даа.
С.Цахиур