Өнөөдөр Монгол бахархалын өдөр тохиож буй. Энэ сайхан өдөр нийгэмд чиглэсэн сайхан үйл гүйцэтгэж байгаа жүжигчин Г.Ундармааг Эрүүл мэндийн яамны хамт олон шагнаж, урмын үг хайрлалаа. Жүжигчин Г.Ундармаа дан ганц жүжиглэж, кино дэлгэцээр үзэгчидтэйгээ уулзахаас гадна эмнэлэгүүдийн хүлээлгийн танхимыг тохижуулах буянтай үйлсийг хийж эхлээд хэдийн дөрвөн жилийн хугацаа өнгөрчээ. Тэрээр энэ хугацаанд Өргөө амаржих газар, Улсын нэгдүгээр төв эмнэлэг, Эх, хүүхдийн эрүүл мэндийн үндэсний төв, Сонгино хайрхан дүүргийн эрүүл мэндийн төвийн хүлээлгийн танхимыг “Итгэлийн танхим” төслийнхөө хүрээнд орчин үеийн стандартаар тохижуулсан байна. Одоо жүжигчин Г.Ундармаа Хан-Уул дүүргийн эрүүл мэндийн төвийн хүлээлгийн танхимыг тохижуулахаас гадна тоглоомын өрөө, ариун цэврийн өрөөг тохижуулах ажилдаа хэдийн оржээ.
Эрүүл мэндийн яамны Төрийн нарийн бичгийн дарга Д.Очирбат хэлсэн үгэндээ “Жирийн иргэний хувьд ийм олон “Итгэлийн танхим”-ыг бий болгож буй нь үнэхээр сайшаалтай юм. Г.Ундармаадаа үнэхээр талархаж байна. Бид ч гэсэн ирэх оны төсөвтөө хүлээлгийн танхимыг тохижуулах талаар тодорхой төсвийг тусгаж өгөхөөр ярилцаж байгаа. Мөн Ундармаатайгаа хамтран ажиллах болно” хэмээсэн юм.
Жүжигчин Г.Ундармаа “Монголын хувьд хэдий хүн ам цөөтэй ч уран бүтээлчид маань чадлынхаа хэрээр л гаргасан бүтээлээ зах зээлд борлуулахыг хичээдэг. Миний хувьд иргэний үүргээ ухамсарлаад татвараа байнга төлж, өөрийнхөө болоод нөхрийнхөө орлогийн 20-30 хувийг “Итгэлийн танхим” байгуулах үйлсэд зарцуулж байна. Би энэ ажлаа дөрвөн жил хийлээ. Цаашдаа ч хийх болно. Одоо бол дан ганц хүлээлгийн танхим тохижуулахаас гадна оффис, бусад өрөөнүүдийг нь тохижуулж байна. Энэ хугацаанд 100 гаруй аж ахуй нэгж, хувь хүмүүсийг хамруулжээ. Одоогоор Хан-Уулын дүүргийн эрүүл мэндийн төвийг тохижуулж байна. Би амжилттай яваа хүн бусадтайгаа амжилтаа хуваалцах хэрэгтэй гэж боддог” гэсэн юм.
М.Ариунцэцэг
Breakingnews.mn
