
Амьдралынхаа он жилүүдийг уртасгахын тулд хангалттай унтаж амарч байх чухал. Өдөр бүр тогтсон цагт унтаж босох нь бие махбодыг тэнцвэртэй байлгах нэгэн сайн дадал болдог. Урт наслахад сэтгэлийн амар амгалан хамгаас эрхэм. Харин сэтгэлийн зовнил шаналгааг хөндлөнгийн юм шиг хүлээж авах тийм ч хялбар бишээ. Үүнд туслах ганц арга нь хэцүү асуудлууд дээр аль болох эргэлдэхгүй, тоохгүй өнгөрүүлэх, аливааг хэт ойроор, хүнд тусгаж авахгүй байх чадвар.
Таагүй байдлаа олон дахин бодох хэрэггүй. Өнгөрснөө мартаж чаддаггүй хүн эрт өтөлдөг гэдэг үг бий. Ням гаригийн амралтыг зөвхөн өөртөө зарцуулж, сайхан амрахыг хичээх нь наслалтанд нөлөөлөх бас нэг алхам. Тиймээс угаах цэвэрлэх их ажлаа ажлын өдрүүдэд хуваарилж амжуулаад, амралтын өдрөө ая тухаар бүрэн хангаж байгаарай. Энгийн эдгээр зөвлөмжийг өдөр тутам мөрдөж гэмээнэ сэтгэл амар урт наслах хожмын үйлд үнэхээр тустай.
Урт наслах 6 чагтага юу вэ? гэдгийг Далай лам онцлохдоо
1. “Өндөр уулын оройд гар
2. Сайн хүлэг морь уна
3. Сайхан идээ ундаа зоогло
4. Үеийн нөхөдтэй хүүрнэлд
5. Өчүүхэн нялхастай наад
6. Биед ээлтэй хуучин хувцас өмс” хэмээн айлдсан нь бий.
Далай ламын энэ сургаалыг цаг үетэйгээ дүйцүүлэн бодож хэрэгжүүлвээс эрүүл урт наслахын эгэл нэгэн нууцын эзэн та өөрөө байх болно.