Хогвартс шидтэний сургуулийн аймхай хулчгар нэгнээс Холливуудын хамгийн “хоот” залуу болоод байгаа жүжигчин Мэтью Льюис сүй тавьжээ. Өдгөө 27 настай жүжигчин залуу найз бүсгүй Анжела Жонст өнгөрсөн сард гэрлэх санал тавьсан аж.
Хамгийн сонирхолтой нь хосууд өнгөрөгч нэгдүгээр сард “Wizarding World of Harry Potter” арга хэмжээний үеэр танилцаж, долдугаар сард болзож эхэлсэн байдаг гэнэ. Асар богинохон хугацаанд биесээ таньж улмаар гэрлэх хэмжээнд хүрсэн хос залуус хэдийн сүйн бөгжөө зүүх болжээ.
Жүжигчин Мэтью Льюисыг “Харри Поттер” цувралын Невилл Лонгботтомын дүрээр үзэгчид сайн мэднэ. Төрөлхийн авьяастан Харри Поттерт хамгийн үнэнчээр зүтгэдэг түүний хүүхэд насны төрхийг хэн хүнгүй өхөөрддөг. Булцгар хацар, орсгой шүдтэй зориг муутай Невилл эцэст нь хүүхнүүдийн харааг булаасан хамгийн царайлаг залуусын нэгээр тодроод байгаа бөгөөд Поттерчуудын шүтэн бишрэгч охидын урмыг хугалсан сурагтай.
И.МӨНХЦЭНГЭЛ
Эх сурвалж: www.zone.mn