А.Баярцэцэг: Яагаад морьтон монгол охин Дэлхийн миссийн титмийг тэргүүндээ зүүж болохгүй гэж…

АНУ-ын Вашигтон хотноо зохион байгуулагдаж буй 66 дахь удаагийн Дэлхийн миссийн тэмцээнд А.Баярцэцэг эх орон, элгэн түмнээ төлөөлөн оролцож байгаа билээ. Тэрээр яг 14 хоногийн өмнө “Морьтон монгол охин ямар байдгийг харуулчихаад ирье” хэмээгээд “хүлэг мориндоо мордсон” юм.

А.Баярцэцэг энэ өдрүүдэд мориноосоо нэг ч унаж, бүдэрсэнгүй. Бүр цэнхэр титмийг эх орондоо авчрахаар илүү хурдан давхисаар…

Ингээд морьтон монгол охин А.Баярцэцэгтэй онлайнаар холбогдож, тэмцээнийх нь талаар ярилцснаа хүргэе.

–120 орны охид “Монгол” гэдэг нэрийг мартахааргүй цээжилсэн-

-Танд энэ өдрийн мэнд хүргэе. “Miss World 2016” тэмцээн эхлээд 14 хонож байна. Энэ хугацаанд олон шалгаруулалт боллоо. Таны хувьд энэ бүхэнд маш амжилттай оролцож, бүхий л арга хэмжээ болон шалгаруулалт дээр олны анхаарлын төвд байсныг бид бүхэн онлайнаар үзэж байна. Тэр ч бүү хэл дэлхийн нөлөө бүхий хэвлэл, мэдээллийнхэн таныг онцолж байна. Морьтон монгол охин ямар байдгийг дэлхий нийт харж байгаа болов уу?

-Маш их баярлалаа. “Дэлхийн мисс”-ийн тэмцээн өндөрлөхөд тавхан хоног үлджээ. Энэ тав хоногт амжилтаа улам ахиулж, цэнхэр титмийн эзэн болохын тулд бүхий л чадлаараа хичээж байна. Гэхдээ үүнээс гадна дэлхий дахинд эх орноо, элгэн түмнээ илүү ихээр сурталчилж, таниулахаар хичээж байгаа шүү.

Манай улсаас оролцож байсан миссүүд өмнө нь авьяасын шалгаруулалтад шилдэг 10-т шалгарч байгаагүй юм билээ. Тийм болохоор миний амжилт монголчуудын хувьд нэгэн том ахиц дэвшил болсон байх гэж бодож байна.

-Өнгөрсөн арваннэгдүгээр сарын 29-ний өдөр таны төрсөн өдөр болсон. Тэр өдөр дэлхийн өнцөг булан бүрээс ирсэн өөр хэл ус, соёлтой охид монгол хэлээр “Төрсөн өдрийн мэнд хүргэе” хэмээн дуулахыг сонсох үнэхээр сайхан байсан шүү. Та бидэнтэй тухайн үеийн сэтгэгдэлээсээ хуваалцаач?

-Миний 26 насны төрсөн өдөр маш гайхалтай, хэзээ ч мартахааргүй сайхан боллоо. Тэр өдөр АНУ-д суугаа манай улсын Элчин сайдын яамнаас Дэлхийн мисст оролцож байгаа 120 орны охидод маань зориулаад төрсөн өдрийн торт бэлэглэсэн.

Зохион байгуулагчдаас бүх охидоор “Төрсөн өдрийн дуу”-г монголоор дуулуулъя гэдэг санал гарсан юм билээ. Тэр өдрөөс хойш бүх охид “Монгол” гэдэг нэрийг мартахааргүй цээжилсэн. Бас нэгэн гайхалтай бэлэг бол би төрсөн өдрөөрөө авьяасын үзүүлбэрийн шилдэг 21-т шалгарсан явдал байлаа.

-“Дэлхийн мисс”-ийн тэмцээнд илбэ үзүүлж байсан тохиолдол байгаагүй-

-Авьяасын үзүүлбэрийн шилдэг 10-т шалгарсан охид ихэнх нь дуулж бүжиглэж байсан. Таны үзүүлбэр бусад орны охидын үзүүлбэрээс юугаараа ялгарч байв. Шүүгчид хэрхэн дүгнэсэн бэ?

-Авьяасын үзүүлбэрийн шилдэг 21-т багтсан үзүүлбэрүүдийг үзээд сууж байхдаа “Би шүүгч байсан бол энэ охидын алийг нь сонгох бол. Тэд ямар мундаг юм бэ” гэж бодож суусан шүү. Бүгд их мундаг байсан. Мэргэжлийн дуучин, бүжигчдийн тэмцээн үзэж байгаа юм шиг санагдаж байсан шүү.

Харин миний үзүүлбэрийн тухайд бүжгээ илбэ, уран бичлэгтэй хослуулсан нь бусдаас ялгарч, онцгой байсан болов уу. Өмнө нь “Дэлхийн мисс”-ийн тэмцээнд илбэ үзүүлж байсан тохиолдол байдаггүй юм билээ.

Ер нь миний үзүүлбэр маш олон сонирхолтой зүйлтэй байсан. Галын үзүүлбэр, хувцас сольдог үзүүлбэр, цаасыг өөр зүйл болгож хувиргах, уран бичлэг, бүжиг зэргийг хослуулаад. Хоёр минутын хугацаанд маш олон зүйлийг нэг дор үзүүлсэн нь шүүгчдийн сонирхлыг татаж, хөгжөөж чадсан байх гэж бодож байна.

-Та энэ үзүүлбэрээ хэнээр дэглүүлсэн бэ?

-Энэ үзүүлбэрийг маань илбэчин н.Билэгт дэгэлж өгсөн. Бүжгийг Герман улсад бүжиг дэглээчээр ажилладаг н.Шинэцэцэг бэлдүүлсэн. Билэгт, Шинэцэцэг хоёртоо үнэхээр их баярлаж байгаа шүү. Одоо шилдэг 10-т шалгарсан үзүүлбэрүүд дээр санал авч шилдгийн шилдгийг шалгаруулна.

-Энэхүү аппликейшнээр санал авч ШИЛДЭГ авьяасын үзүүлбэрийг шалгаруулна-

-Хоолны шоунд оролцох охидыг хэрхэн сонгосон бэ. Таны хийсэн будаатай, хийцтэй цай шүүгчдэд болон оролцогч охидод их таалагдсан гэсэн. Та хоолныхоо материалыг хаанаас, хэрхэн бэлтгэсэн бэ. Хийцтэй цай хийсэн болохоор асууж байгаа юм л даа?

-Бид хоолны шоунд тив тивээрээ хуваагдан өрсөлдсөн. Ази тивээ төлөөлж Индонез, Шри Ланка, Япон, Монголын миссүүд оролцсон. Бид 30 минутын хугацаанд зохион байгуулагчдын өгсөн орцуудаар нэг, нэг хоол хийх даалгавар авсан.

Миний хувьд хамгийн энгийн бөгөөд шүүгчид өмнө нь идэж байгаагүй өвөрмөц хоол хийе гэж шийдсэн. Ингээд хүмүүсээс “Ямар хоол хийх вэ” гэдэг санал авсан. Манайхан цуйван, бууз, хуушуур, хийцтэй цай хийгээч гэдэг санал хэлсэн.

Ингээд бэлэн болгоод ууталчихсан байдаг борцтой хийцтэй цайг Монголоос авчруулсан даа. Шүүгчид хийцтэй цайг маань амсч үзчихээд 20 секунт орчим “Яг юу амсчихав аа гэсэн шиг” бодлогоширч байсан. Тэгснээ “Ямар гоё юм бэ. Ийм хоол өмнө нь хэзээ ч амсаж байсангүй. Өвөрмөц амттай юм” гээд л дахин дахин хийж уугаад /инээв/. Охид ч гэсэн “Би амсч үзье” гээд их л сонирхож, яаж хийдэг талаар асууж байсан шүү. Энэ шоунд Карибын тэнгисийн охид түрүүлж, бид II байрт орсон.

-Би хамгийн гол, төв цэгээс эх орон, элгэн түмэнтэйгээ мэндчилнэ-

-120 орны охидоор эх хэлээрээ төрсөн өдрийн дуу дуулуулаад л, монгол хийцтэй цайгаа уулгаж уулга алдуулаад л. Та үнэхээр морьтон монгол охин ямар байдгийг харуулж байна шүү. Мөн финалын өдөр та хамгийн эхний эгнээнд бүжиглэхээр болсон гэсэн. Эхний эгнээнд бүжиглэх охидыг хэрхэн сонгодог юм бэ?

-Авьяасын шалгаруулалтыг үзэж байгаад финалын өдөр эхний эгнээнд бүжиглэх охидыг сонгодог юм билээ. Эхний эгнээд бүжиглэх охидын ихэнх нь бүжигчин, бүжиг дэглээч охид байна лээ.

Эхний эгнээнд бүжиглэсэн 10 улсын охин нээлт, хаалт гээд бүхий л үзүүлбэр дээр хамгийн түрүүнд алхана. Тэгэхээр монголчууд маань “Манай мисс хаана байна. Монгол хэзээ гарах бол” гэж хайх хэрэггүй. Би хамгийн гол, төв цэгээс эх орон, элгэн түмэнтэйгээ мэндчилнэ. Бид дэлхийн өнцөг булан бүрт хамгийн тодоор харагдана.

-Тийм үү. Ямар гоё юм бэ. Ингэхэд тавхан хоногийн дараа 2016 оны Дэлхийн мисс тодорно. Монголчууд бид “Дэлхийн мисс”-тэй улс болохын тулд яг одооноос танд яаж туслах вэ?

-Та нарын минь санал яг одоо надад маш их хэрэгтэй байна. Би үлдсэн шалгаруулалтуудад өөрийнхөө бүхий л нөөц бололцоог дайчилж, хичээнэ.

Хэрвээ бид санал хураалтаараа тэргүүлж чадвал шилдэг 10 миссийн нэг болно. Тийм болохоор та бүхний минь санал маш чухал шүү. Дэлхийн нөлөө бүхий хэвлэлүүд “Монголын мисс санал хураалтад тэргүүлэх боломжгүй” гэж бичиж байгаа. Учир нь, манай улс цөөхөн хүн амтай тул энэ шалгаруулалтад тэргүүлэх магадлал бага гэж үзэж байгаа юм билээ.

Бид цөөхүүлээ хэдий ч нэг сэтгэлээр нэгдэж зүтгэвэл боломжгүй зүйл байхгүй шүү дээ. Яагаад морьтон монгол охин Дэлхийн мисс болж болохгүй гэж. Хамтдаа “Дэлхийн мисс-2016” титмийг эх орондоо авчирцгаая, финалын өдөр амжилт дүүрэн уулзацгаая.

-Ярилцсанд баярлалаа. Танд амжилт хүсье.

-Баярлалаа.