Зөрүүд хүмүүсийг зайнаас ажиглаад байхад их зугаатай санагддаг. Харин тулж харьцах үед тэдний бууж өгдөггүй зан, хүнд авир нь ядрааж эхэлдэг. Зөрүүд хүн өөрийн ололт амжилтуудаа зөрүүд байсны хүчинд олж авсан гэж үзэх хандлагатай байдаг. Гэхдээ шийдэмгий, шаргуу зан нь зоосны зөвхөн нэг тал нь шүү дээ. Харин нөгөө талд нь уян хатан бус байдал, амьдралдаа бүтээлчээр ханддаггүй, шинэ зүйлийг туршихаас татгалздаг гэх мэт сөрөг талууд бий.
Амьдрал, зөрүүд, сэтгэл зүй, алдаа, дутагдал
Бид хүүхэд насандаа томчуудын хэт их хяналтанд эсэргүүцэл үзүүлж, өөрийнхөө үзэл бодлыг хамгаалахыг хичээж байдаг тэр үеэс эхлэн бидний зөрүүд зан бүрэлдэж эхэлдэг. Том болохын хэрээр ямар ч асуудал дээр өөрийн бодолдоо үнэнч байх тэрхүү эрмэлзэл нь хүмүүстэй харьцах харьцааг багагүй муутгаж орхидог.
“Өөрийнхөө лууг номхоруул” нэртэй алдартай номны зохиогч Хосе Стивенс зөрүүд зан гэдэг араатны эсрэг долоон төрлийн зэвсгийг хэрэглэхийг санал болгож байна.
Уян хатан байж сураарай.
Биеийн уян хатан байдал зөрүүд зангаас чинь болоод багагүй хөшдөг юм шүү. Чиний эрүү, хүзүү, нуруу, өгзөг болон хөлний булчин байнга чангардаг нь сэтгэл зүйн хөшүүн байдлаас шууд хамаардаг. Тиймээс, биеэ уян хатан байлгаснаар өөртөө болон орчлонд гарч буй өөрчлөлтүүдийг мэдэрч, зохих ёсны хариу үйлдэл хийх чадварыг эзэмшдэг. “Би мэдэхгүй” гэсэн байр суурийг баримтлаж үзвэл оюун ухаанаа уян хатан болгож болно. Аливаа асуудалд яаран дүгнэлт гаргалгүйгээр төвийг сахиж, тодорхой хугацаа өнгөрсний дараа шийдвэр гаргаж байгаарай.
“Тийм”, “За” гэж хэлж сураарай.
Зөрүүд хүмүүс ихэнхдээ хувь заяаны өглөгч саналуудад итгэдэггүй. Сонголт хийх эрхийг өөртөө авч хадгалахын тулд тэд “үгүй” гэдэг үгийг халхавч болгон ашигладаг. Зөрүүд зангаа номхоруулахын тулд аль болохоор “тийм”, “за” гэсэн үгийг хэлж, шинэ хоол амсах, шинэ хөгжим сонсох, шинэ хүмүүстэй танилцах боломжийг өөртөө олгоорой. Байр сууриа хамгаалж үлдэснээс адал явдалд орох нь илүү үнэ цэнэтэй ч байж мэднэ шүү.
Өөрийн бодол санаагаа нээлттэй илэрхийлж байгаарай.
Зөрүүд хүнээс өөрт таалагдахгүй байгаа ямар нэгэн зүйлийг хийхийг хүсвэл тэр дотроо эсэргүүцэх болно. Үр дүнд нь дуугүй ажил хаялт нь үл ойлгоцол, маргаанд хүргэдэг. Зуслан дээр ажиллах эцэг эхин саналын хариуд амралтын өдрүүдээр явахгүй байх ямар нэгэн шалтгаан хэлж, утсаа дуугарч байсныг “сонсоогүй” гэж байснаас шууд хүсэхгүй байгаа тухайгаа хэлвэл дээргүй юу? Ямар нэгэн зүйлийг хийх хүсэлгүй байгаагаа шууд хэлвэл харилцан буулт хийж, хэн хэний сэтгэлд нийцсэн шийдвэрт хүргэх нөхцлийг бүрдүүлэх болно.
Хүний үзэл бодлыг сонсоорой.
Зөрүүд хүн өөрт нь хандаж хэлсэн үгийг ойлгохыг хичээдэггүй. Ийм байдал ямар ч үл ойлголцлыг улам гүнзгийрүлж, урт хугацааны зөрчилдөөн болгон хувиргадаг. Хэрвээ чи өөрийгөө “дүлий” болсон гэдгээ ойлгож байгаа бол дараах дасгалыг ойр дотны хүнтэйгээ хийж үзээрэй. Тэр хүний дургуйг нь хүргэдэг эсвэл санааг нь зовоодог чиний зан байдлыг чамд хэлэг. Түүнийг яриад дуусмагц, чи түүний үгийг давтаад “… гэдгийг ойлгож байна” гэж хэлээрэй. Түүний яриаг бүү тасалдуул, бүү эсэргүүц. Энэхүү дасгалын үр дүнд чамд таалагдахгүй байгаа үгсийг хүртэл сонсох чадвартай болдог юм.
Чамаас илүү хүн байдаг гэдгийг хүлээн зөвшөөрөөрэй.
Тийм ээ, чамаас илүү мэдлэгтэй, ур чадвартай хүмүүс бас байдаг юм шүү. Мэргэжлийн хүмүүсийн санаа бодлыг сонссоноор чи ч илүү их хөгжих болно. Өөр хүний давуу байдлыг хүлээн зөвшөөрөхийн тулд чи бусдаас дор орно гэдэг айдаснаасаа ангижраарай. Чи төгс төгөлдөр байх албагүй шүү дээ.
Өөрчлөлт шинэчлэлтийг дэмжээрэй.
Зөрүүд хүн орчлон ертөнцийн өөрчлөлт хувиралтаас болоод сэтгэл санаа нь тавгүйтэж эхэлдэг. Учир нь бага байхад нь эцэг эх нь анхааруулаагүйгээс болоод байнга гэнэтийн өөрчлөлтуудтэй тулгардаг байсан. Харин одоо ийм хүн өөрийн дадал зуршлыг хатуу барьдаг учраас багахан хэмжээний зүйлүүд хүртэл амьдралын хэв маягийг нь нилээдгүй өөрчлөхөд хүргэдэг. Тиймээс, чи бямба гарагийн өглөө төлөвлөгөөгөө орвонгоор нь өөрчлөх гээд үзээрэй. Өөрийн зөн совиндоо итгэж, шууд ундрах хүсэлдээ хөтлөгдөхийг хичээн амралтын өдрүүдээ өнгөрөөгөөрэй.
Өөрийн алдаа дутагдлыг хүлээн зөвшөөрч сураарай.
Өөрийн буруу гаргасан шийдвэрүүдээсээ цаг тухайд нь татгалзаж, ашиггүй, сэтгэлд таараагүй ажлыг дуустал нь хийх гэж зүтгэх хэрэггүй. Аль эсвэл чи нэр, нүүрээ алдана гэдгээс айдаг юм уу? Алдаагаа хүлээн зөвшөөрч, засварласнаар харин ч их хүндэтэл, сайшаалыг хүртэх болно гэдгийг санаж яваарай.
