Шастины нэрэмжит Клиникийн III эмнэлгийн Нүдний тасгийн эрхлэгч Ж.Баттуяатай ярилцлаа.
-Манай улсад нүдний өвчлөл хэр байна вэ?
-Бусад оронтой харьцуулахад тийм ч өндөр биш л дээ. Иргэд нэг үеэ бодвол эрүүл мэнддээ анхаардаг болсон байна. Мөн нүдний оношлогоо, эмчилгээ хөгжиж байна.
-Хамгийн түгээмэл нь ямар өвчин байна вэ?
-Нүдний болор цайх, даралт ихсэх өвчин хамгийн түгээмэл байна. Манайхны нүдний өвчлөл наслалттай их холбоотой. Өвчлөгсдийн 60-70 хувь нь өндөр настнууд байдаг. Нас өндөр болох тусам нүдний болор цайх хандлагатай болно. Тухайн хүний өөрийнх нь анатомийн бүтэц, удамшил бас нөлөөлнө..
Мөн нүдний даралт ихсэх өвчин байна. Энэ нь харааны мэдрэлийг гэмтээж байдаг. Монгол хүний хувьд хаалттай өнцөг хэлбэрээр илэрдэг. Үүнээс урьдчилан сэргийлэх бүрэн боломжтой. Ер нь нүдний өвчлөлүүд наслалттай холбоотой байдаг учраас 40-өөс дээш насны хүмүүс жилд нэгээс хоёр удаа урьдчилан сэргийлэх үзлэгт хамрагдаж байх хэрэгтэй. Түүнчлэн насанд хүрэгчдийн дунд торлог буюу шар толбоны өвчнүүд түгээмэл байна. Энгийнээр хэлбэл, энэ нь нүдний арын хэсгийн өөрчлөлтүүд гэсэн үг.
-Манайд энэ өвчнүүдийг эмчлэх боломжтой юу?
-Зарим өвчний эмчилгээг дэлхийн түвшинд хийж байна. Тухайлбал, Монгол Улсад болрын мэс заслыг олон улсын хэмжээнд стандартын дагуу хийж байгаа. Өөрөөр хэлбэл, дэлхийн брэнд болсон хиймэл болруудыг суулгаж байгаа. Ер нь болор цайна гэдэг бол эргэж сэргэх боломжтой сохролт. Бид энэ өвчлөлийг бууруулах, цаашлаад устгах үндэсний хэмжээний зорилготой ажиллаж байна.
Харин торлог, шилэнцрийн мэс засал хараахан хөгжөөгүй байна. Боловсон хүчнээ бэлдээд явж байна. Тоног төхөөрөмжийн хувьд ч шийдэх асуудлууд бий. Хэрвээ эрүүл мэндийн санхүүгийн тогтолцоо зөв гольдрилдоо орчихвол шийдэгдэх болов уу гэж бодож байна.
-Хагалгаанд орох хүмүүсийн тоо ихсээд байгаа нь өвчлөл ихсээд байгаагийнх уу, эсвэл хүмүүс эрүүл мэнддээ анхаардаг болоод урьдчилан сэргийлэх гэж ирээд байна уу?
-Энэ бол маш чухал асуудал. Үнэхээр өвчлөл ихэссэн гэдгийг улсын хэмжээний статистик тоо харуулах байх. Манай үйлчлэх хүрээ нэмэгдээд байгаа нь энэ цаг үед боломжийн үйлчилгээ үзүүлээд нэр төртэй ажиллаж байгаатай бас холбоотой болов уу гэж ойлгож байна. Түүнээс Монгол Улсад нүдний өвчлөл ихсээд байна уу гэдгийг ЭМЯ-наас тодруулах нь зүйтэй. Ямар ч байсан хагалгаанд орсон хүний тоо жил ирэх тусам өссөнийг эндээс харж болно. /хүснэгт үзүүлэв/
-Сүүлийн үед хотжилт, цаг агаарын дулаарал, идэж ууж байгаа зүйлээс шалтгаалан олон төрлийн шинэ өвчин гарч ирж байна гэж ярьдаг. Энэ бүхэн бас нүдний өвчлөлд нөлөөлж байгаа юу?
-Энэ бүхэн тодорхой хэмжээгээр хамааралтай. Хүн ямар нэгэн өвчин тусна гэдэг хүрээлэн байгаа орчин, өөрийнх нь амьдралын хэв маяг, хооллолт зэргээс шалтгаалдаг. Одоо цагт бүх хүн компьютер дээр ажиллаж байна. Хөгжилтэй холбоотой энэ бүх зүйл хүний эрүүл мэндэд янз бүрээр нөлөөлж байна.
Хамгийн гол нь манай иргэд эмийг их дураараа хэрэглэдэг. Аптекаас дураараа антибиотик авна. Гэхдээ бие нь зүв зүгээр байхад антибиотик ууж зүрхлэхгүй дээ. Тэгсэн хэрнээ нүдний дусаалга антибиотикийг тоохгүй шууд нүдэндээ дусаана. Оноогүй эмчилгээ юунд ч хүрч болно. Тэгэхээр нүдний дусаалга, эм зэргийг өөрт нь тохирч байна уу, эсрэг заалттай байна уу гэдгийг мэдсэний үндсэн дээр хэрэглэх хэрэгтэй гэж зөвлөх байна. Товчхон хэлэхэд энэ бол иргэдийн эрүүл мэндийн боловсролтой холбоотой асуудал.
-Хүмүүс линз их зүүдэг болсон. Хараанд линз, нүдний шилний аль нь илүү тохиромжтой вэ?
-Тухайн хүний л сонголт. Сөрөг нөлөө гээд байх юм байхгүй. Хамгийн гол нь хараандаа тохируулах хэрэгтэй. Манайхан нүдний шил сонгохдоо хүрээнд нь болоод сонголт хийдэг. Үнэн хэрэгтээ нүд хоорондын болоод хүүхэн харааны зай, хамрын өндөр зэргийг нүдний шил худалдаалдаг газрын мэргэжилтнээр тохируулж зүүх ёстой. Харааны эрүүл ахуйн дэглэмийг сахивал аль нь ч гаж нөлөө байхгүй.
Г.Долгорсүрэн