МАГАДГҮЙ, КАРЛИ…

Түүний хоолойн тембрийг хүмүүс Тэйлор Свифттэй төстэй гэдэг. Гэвч “Call me, maybe” сингл нь гарснаас хойш хэн чтүүнийг хэнтэй ч зүйрлэж болохгүй гэдгийг ухаарсан юм. Өдгөө 26 настай ч тэр яг л дунд сургуулийн охин мэт харагддаг. Магадгүй энэ нь канадчуудын давуу тал байх л даа. Жастин Бибер (18), Аврил Лавине (27) нарын наснаасаа залуу харагддаг шид түүнд ч бас байдаг. Тийм ээ, би Канадын залуу дуучин Карли Рей Жепсений тухай ярьж байна.

Өнгөрсөн тавдугаар сараас өмнө тэр бүс нутгийн, зөвхөн канадчуудын л мэддэг дуучин байлаа. Харин “Биллбоард”-ын жагсаалтыг гурав дахь долоо хоногтоо тэргүүлж буй “Call me maybe” дуу нь олны хүртээл болсноос хойш түүнийг мэддэггүй хөгжим сонирхогч байхгүй болсон юм, нээрээ шүү.

Тэрбээр 2007 онд “Канадын шүтээн” (Canadian idol) телевизийн шоуны тавдугаар улирлын шалгаруулалтад оролцож, гуравдугаар байранд шалгарсан юм. Тэр жилдээ “Fontana”, “Maplemusic” дуу бичлэгийн студитэй гэрээ байгуулж, 2008 онд “Tug of war” нэртэй анхны студийн цомгоо худалдаанд гаргав. Яг үнэндээ энэ цомог нь тийм ч их дуулиан тарьж чадаагүй.

Харин энэ онд нээлтээ хийсэн “Curiocity” бичил цомог нь шүүмжлэгчдээс өндөр үнэлгээ авсан бөгөөд “About.com”-ийн шүүмжлэгчид таван онооноос 4.5, “Idobi radio” дөрвөн оноо өгсөн. “All music”-ийн шүүмжлэгч Жон О’Брайн “Хэрэв та хөгжилтэй, танд эрч хүч өгөх ямар нэг зүйлийг хайж байгаа бол эргэлзэхгүйгээр “Curiocity”-г худалдан ав” хэмээн бичиж байв. Одоогоор түүний эл цомогт багтсан “Call me, maybe” дуу нь АНУ, Австрали, Ирланд, Их Британийн хөгжмийн чартуудыг тэргүүлж, зөвхөн АНУ-д л гэхэд 3.8 сая хувь зарагдаж, платиниум өргөмжлөл хүртээд байна.

Карли Рей Жепсен 2010 онд “Canadian radio music awards”-аас “Оны шилдэг дуу” (Tug of war), “Much music video awards”-аас “Оны шилдэг видео клип”, “Олны таашаал хүртсэн видео клип”, “Дуулиан тарьсан видео клип” гэсэн гурван шагнал хүртсэн. Канадын дуучид АНУ-ын, улмаар дэлхийн хөгжмийн ертөнцөд дуулиан тарих нь тийм ч элбэг үзэгдэл биш. Аврил Лавине, Жастин Бибер зэрэг залуус харин эл жишгийг эвдэж, зүгээр ч нэг од биш, бүр супер од болцгоосон. Тэдний залгамж халаа нь магадгүй, Карли байх.

Т.ЖИГҮҮР