Дэлхийн нэрт дуучин, 53 настай Мадоннагийн «M.D.N.A» аялан тоглолтын талаар цуу яриа өдрөөс өдөрт нэмэгдсээр байна. Тэрбээр ирэх сарын долоонд Москвад, есөнд Санкт-Петербургт тоглолтоо хийх юм.
Хэвлэл мэдээллийн хэрэгслүүд Мадоннагийн аялан тоглолтыг зохион байгуулагчдаас мэдээлэл авч нийтэлжээ. Эх сурвалжуудын баталснаар нэрт дуучин Мадонна ДНК-гаа хулгайд алдахаас маш их эмээдэг гэнэ.
Хүний ДНК-ийг үс, хумс, арьс гээд ямар ч эд, эсээс илрүүлж болдог. Тиймээс дуучны хувцас солих өрөө, зочид буудлын өрөө гээд очсон газар бүрийг нь цэвэрлэж, ариутган, ямар ч ул мөр үлдээхгүй байх тусгай бригад ажилладаг аж. Харин энэ багийнхны найдвартай эсэхийг хэрхэн шалгадаг, тэд дуучны хөлийг хурууны хумсны үлдэгдлийг ч хулгайлахгүй гэсэн баталгаа хаана байгаа талаар огт мэдээлсэнгүй.
Түүнчлэн тэрбээр зочид буудлын өрөөний дотоод засалд ч асар өндөр шаардлага тавьдаг аж. Нэрээ нууцалсан нэгэн эх сурвалжийн мэдээлснээр дуучны хоноглох өрөө гэр орныг нь санагдуулах ёстой гэнэ. Тиймээс Мадоннагийн орох өрөөний зохион байгуулалт, дотоод засал чимэглэлийг зохион байгуулагчид өөрчилдөг. Өрөөний ханын цаас, даавуу зэрэгт ч мөн онцгой шаардлага тавина. Тухайлбал Мадонна цагаан өнгийг илүүтэй таашаадаг. Мөн Мадонна тоглолтын үеэр шүтэн бишрэгчидтэйгээ уулзахаас татгалздаг. Тиймээс тайзан дээр зөвхөн дагалдан яваа багийн гишүүд л гардаг.
Цэцэгсийн ямарыг нь таашаадаг, эс таашаадгаа Мадонна зарим баримтаар өөрөө баталж өгчээ. Тухайлбал, өнгөрсөн жилийн есдүгээр сард Венецийн кино наадамд үзүүлэх «W.E» киноны хэвлэлийн бага хурлын үеэр нэгэн сэтгүүлч түүнд хадаасан цэцэг бэлэглэжээ. Гэтэл Мадонна цэцгийг ширээн доогуур хийж, энэ цэцэгт дургүй гэдгээ чангаар зарласан
Харин Мадоннагийн дуртай цэцгийг хүмүүс интернэтэд тавигдсан видео бичлэгээс олж мэджээ. Тэрбээр байраа зөвхөн цагаан, ягаан сарнай, сараана цэцгээр чимдэг аж. Гэхдээ цэцэг бүрийн иш 15 см урт байх ёстой. Гэхдээ л өө сэв эрдэг гэрийн эзэгтэй цэцэг бүрийнхээ уртыг хэмждэг эсэх нь тодорхойгүй.
Түүнчлэн Мадонна аялан тоглолтын үеэр тав тухтай, тайван байдлыг чухалчилдаг байна. Түүний райдер-листэд (хүлээн авагч талд тавьсан хүсэлтийн жагсаалт) хүүхдүүдэд нь зориулсан тусгай өрөө, өрөөнд нь болон тайзны ард авч ирэх цагаан хоол, олон улс руу чөлөөтэй ярих боломж зэрэг ордог аж. Үүнээс гадна Мадонна иудейн шашны дагуу цагаан өнгийн нэхмэл даавуу, лаа зэргийг жагсаалтдаа бичдэг.
Дуучин бүсгүй тамхины утааг тэвчдэггүй. Тиймээс түүний ажиллаж буй газар бүрт тамхи татдаггүй орчин бүрддэг гэхэд хилсдэхгүй. Мөн өглөөгүүр йог болон спортоор хичээллэж байх үед нь саад хийхэд дургүй гэнэ. Гэхдээ дуучин бүсгүйн хамгийн хачирхалтай зуршил нь 00-ын суултуураа байнга солиулдаг явдал юм. Тэрбээр өдөр бүр шинэ, ариутгасан суултуур шаарддаг бөгөөд сантехникчид орой бүр түүнийг нь авч, өглөө шинийг сольж өгдөг гэсэн яриа байдаг. Мадоннагийн хувийн нууцыг чандлан хадгалах, ариун цэврийг дээд зэргээр сахихын тулд хуучин суултуурыг шөнө бүр устгадаг гэнэ. Учир нь хуучин суултуурыг устгахгүй бол дуудлага худалдаанд орж, нэр хүндэд нь сөргөөр нөлөөлнө хэмээн тэрбээр үздэг.
Дашрамд сонирхуулахад дуучин Мадонна гэр бүлийнхээ амьдралын аюулгүй байдалд ч хэт их санаа тавьдаг донтой. Жанни Версачег нас нөгчсөний дараа тэрбээр Майами дахь харшийг нь тэнгисийн булантай холбосон хонгил ухуулах захиалга өгсөн гэдэг. Энэ хонгилд нь гулгуур завь хадгалагддаг бөгөөд гэнэтийн халдлага болсон үед аврах зорилготой аж.
Э.Мөнхзаяа
