Их Британид амьдарч байгаа өдгөө 38 настай Саудын Арабын гүнж Сара бинт Талал бин Абдель-Азиз тус улсаас улс төрийн орогнол өнгөрсөн баасан гарагт хүссэн талаар “The Daily Telegraph” сонинд бичлээ.
Гүнж эх оронд нь очвол өөрт нь аюул заналхийлна хэмээн үзэж байгаа гэнэ. Хааны гэр бүлд бий болсон дарамттай харилцааг тэрбээр нуугаагүй бөгөөд түүний дансыг царцаасныг хүртэл хэлжээ. 2007 оноос хойш Их Британид амьдарч байгаа Сара бинт Талал бин Абдель-Азиз одоо хүртэл өөрийн эцэг ханхүү Талал бин Абдель-Азизтай хэрүүлдэж байгаа гэнэ.
Гүнж эцгийнхээ өрсөлдөгч болох үе залгамжлах ханхүү Найеф бин Абдель-Азиз аль-Саудыг дэмждэг байсан учир эцэг охин хоёр маргаантай болсон аж.
Нас барсан ээжийнхээ хөрөнгө 325 сая фунт стерлингийг гүнж авахыг хүсч байгаа юм. Харин Саудын Араб гүнжийг эх орондоо эргэн ирэхийг зөвлөж байгаа ч Сара бинт Талал бин Абдель-Азиз өөрийг нь барьцаална гэж болгоомжилж байна.
М.ДАВАА /INFO.MN/
