Бидний амьдралд маш олон учрал тохиол бий. Тэдгээрээс бид заримдаа хэчнээн хүсээд ч биелшгүй хайр, дурлал, шохоорхолтой учирдаг нь жам. Амьдралаараа дэнчин тавиад ч хамаагүй түүний л дэргэд байвал өөр юу ч хэрэггүй гэж бодож суух үе бишгүй. Заримдаа бүр хэзээ ч хүсээгүй, энэ л хүн биш шүү гэж бодоод байхад зөрж байгаа юм шиг тааралдаад байх нь ч олон.Гэхдээ л амь амьдралаа алдаад ч хамаагүй зөвхөн түүнтэйгээ л хамт байвал боллоо гэсэн гал халуун хайр дурлал заримдаа бүтээгүй нь дээр байдаг ч юм шиг. Эргээд харахад, бидний найз нөхөд, эсвэл бид өөрсдөө ч тэр эргүүлгийн нэгэн хэсэг нь болоод “Тэр хайр бүтээгүй нь дээр байж дээ” гэж өөрсдөдөө хэлээд ч сууж байх юм билүү.
Сайн найз охин минь архинд хамаг мөнгөө үрчихдэг залууг өөрчлөгдөнө, хүүхдээ бодоод засарна гэж 5 жил хүлээсэн л юм даа. Бүх тэвчээрээ бараад эцэст нь, “Ийм хайр бүтдэггүй юм байна” гэж өөртөө хэлээд тэр эрийг орхисон. Найз маань хожимдсон ч гэсэн ухаантай шийдвэр гаргасан гэж би боддог юм. Одоо тэр минь охинтойгоо хангалуун сайхан амьдарч байгаа. Эр хүний гар харалгүй, хэн шөнө дөлөөр хаалга балбах бол гэж эмээлгүй яваа. Харин нөхөр нь “Бөмбөгөр”-ийн хашаанаас хог түүдэг ажилтай болсон байна лээ. Ийм хайр мэдээж, бүтээгүй нь дээр байсан юм.
Өөр нэг жишээ байна. Ажлын газрын эмэгтэй маань эхнэртэй хүнд дурлачихаад яахаа мэдэхгүй суусныг ч би мэднэ. Цаад залуу нь нялх хүүхэдтэй эхнэрээ орхиод өөрийг нь дагаад ирчихсэн болохоор бусдын нулимсан дээр жаргаж болдоггүйн зовлонг тэр бүсгүй яс махандаа шингэтэл ойлгосон гэдэг. Анх танилцаж, хайртай дуртайгаа мэдэлцэх хүртлээ түүнийг ардаа ам бүлтэйг нь мэдээгүй явснаас ийм зовлонгийн эхлэлийг тавьчихсандаа тэр бүсгүй гэмшихийн ихээр гэмшсэн дээ.
Салъя гэхээр нөгөө залуу нь явж өгдөггүй, өдөр, шөнөгүй утас нь хангинаж хүүхдийн уйлах чимээ, эмэгтэй хүний орилох дуунд зүрхээ зүсэгдтэл шаналсан гэсэн. Хэчнээн хайртай байлаа гээд буруу замаар ирсэн хайр хувь тавилангийн эргүүлэгт ял болж хувирах нь мэдээж. Ийм хайр бүтээгүй нь дээр байдаг юм. Тиймээс ч найз маань тэвчээр заан байж өнөөх эрийг өөрөөсөө холдуулж, сая нэг амсхийсэн юм даа.
Дээрхийн адил олон зуун жишээ бидний амьдралд эргэлдэж байна. Бүтэх учиртай хайр байдаг байхад бас бүтээгүй нь дээр байдаг учрал, тохиол гэж бий. Энэ бүхнийг ялгаж, салгаж чадвал зөв амьдрал өөрөө биднийг шагнах биз ээ.
