Эр хүнээс ялгардаг даавар нас ахих тусам буурдаг. Даавар нь хүний бэлгийн хэвийн үйл ажиллагааг зохицуулж, бодисын солилцоонд нөлөөлдөг чухал эд. Энэ чухал эд багасахаар эрчүүдэд цэвэршилт үүсч эхэлдэг байна.Цэвэршилт эрчүүдэд өөрчлөлт авчирдаг бол уу, сонин юмаа…
Бодисын солилцоо буурснаар биеийн ерөнхий байдал суларч, артерийн даралт ихсэх, зүрх судасны системийн өвчлөл нэмэгдэх, цус харвалт, зүрхний шигдээс болох эрсдэл ихсэх магадлалтай. Хамгийн гол нь эрэгтэй хүний бэлгийн хэвийн үйл ажиллагаанд өөрчлөлт орсноор сэтгэл санаа маш их хямардаг. Тиймээс эрүүл мэндээ сайтар хамгаалж, сэтгэл санаагаа тайван байлгах, аливаад өөдрөг, идэвхтэй хандах зэргээр бие организм болон мэдрэл, оюунаа хамгаалж чадвал энэхүү жам ёсны үйл явцыг тайван, хэвийн даван туулах боломжтой.
Эрчүүдийн цэвэршилт хэзээ эхэлж, хэр удаан үргэлжилдэг бол…
Ихэвчлэн 50-60 насанд эхэлдэг. Харин сүүлийн үед, ялангуяа Монголд энэ нас харьцангуй залуужих болсон нь нийгмийн байдал, цаг агаар, хоол ундны чанар, амьдралын хэмнэл өөрчлөгдөж байтай ч холбоотой. Цэвэршилтийн үргэлжлэх хугацаа янз бүр. Зарим хүнд 3-5 жилд явагдаад дуусдаг бол заримд нь түүнээс ч олон жил явагддаг. Хугацаанаасаа эрт эхэлж, удаан үргэлжлэх нь эр хүнд их хэцүү тусдаг байна. Энэ нь мэдээж эрүүл мэндээ хэр анхаарч арчилж байгаагаас тун их хамааралтай. Цэвэршилт эрт эхлэхэд хүргэдэг хэд хэдэн өвчнүүд байдаг байна. Хамгийн нийтлэг нь түрүү булчирхайн үрэвсэлтэй холбоотой болон дотоод шүүрлийн булчирхайтай холбоотой өвчлөлүүд. Тиймээс эрэгтэйчүүдийн эмнэлэгт хандахад нь нөхрүүддээ туслах хүн гагцхүү гэргий та.
Энэ үед ямар шинж тэмдэг илэрдгийг эхнэр хүн мэддэг байх хэрэгтэй гэнэ, нээрээ бодмоор юм байна…
Нөхрийн тань биеийн байдал суларч, оюуны чадвар доройтох, нойр хөнгөрөх, бэлгийн үйл ажиллагаа хямрах, ууц нуруугаар хөших зэрэг шинжүүд анзаарагддаг. Мөн шөнө олон шээх, дур хүсэл буурах, ядрах, зүрх өвдөх, тамирдах, нүүр ам бадайрах шинж үргэлжилнэ. Үүнийг бөөр, давсагны үрэвсэл хэмээн таамаглаад, эхнэр нь элдэв эм тариагаар дур мэдэн гэртээ эмчлэх нь ч нууц биш. Эдгээр шинж байдал удаан үргэлжилбэл эмчид хандах нь чухал шүү.
Цэвэршилт жам ёсоороо явагдаж байгаа бол үүнд санаа зовох зүйл байхгүй, энэ бол биологийн, насжилтын хууль. Ийм үед эмэгтэй хүний анхаарал халамж ямар ч эм, тарианаас илүү чухал нөлөөтэй гэдгийг эхнэрүүд маань санаарай. Эрчүүд маань сэтгэл санаагаар тайван байж, өөрийгөө хөгширсөнд тооцолгүйгээр идэвхтэй, эрч хүчтэй, баяр хөөр, итгэл, эерэг хандлагтай амьдрах хэрэгтэй. Хамгийн гол нь гэр бүлийн хүмүүсийн хайр халамж хэнд маань ч ус агаар шиг амин чухал юм байдаг хойно, бие нь эрүүл хэрнээ гэр бүлийн хүйтэн, хөндий уур амьсгалаас болоод сэтгэл санаагаар хямарч, энэ нь бэлгийн үйл ажиллагаанд нь нөлөөлсөн олон эрчүүд эмчид ханддаг. Хүүхэд тээж, төрүүлэх биш, бүсгүйчүүд бидэн шиг хүндрэлтэй хэцүү бүхнийг үүрэх биш, энэ хүдэр хадар эрчүүл яав л гэж хэмээн хандваас гэр бүлийн аз жаргал, сэтгэл амгалан амьдрал дундарч сарних талтайг мартах аргагүйсэнж ээ.
