Биеээ хамгийн сайхнаараа харагдуулахын тулд эдгээр типүүдийг санаж яваарай:
1. Том цүнх VS. Жижиг цүнх
Мэргэжлийн стилист шиг биеэ “чимэх”-ийг хүсвэл, цүнхний хүчийг басах хэрэггүй. Цүнхээ буруу сонгох нь буруу хээтэй цамц өмсөхтэй л адил нөлөөтэй. Хувцаслалтын хамгийн чухал дүрэм бол тэнцвэр, пропорц хоёрыг барих юм. Туранхай жижиг биетэй бүсгүйчүүд багаас, дунд хүртэлх хэмжээтэй цүнх барих нь зохистой бол, мяраалаг эмэгтэйчүүд “бяцхан” бүхнээс зайлсхийж том оврын цүнх барих нь зүгээр.
2. Өргөн бүс VS. Нарийн бүс
Хоёр жилийн өмнөөс моодонд орж эхэлсэн нарийхан бүс одоо ч бүсгүйчүүдийн тренди сонголт хэвээр байгаа. Гэхдээ өргөн бүс ч бас цулгай хувцсыг амь оруулдаг “шид”-ээ алдаагүй. Чамд харин аль нь тохирох бол? Бүсийг сонгохдоо өөрийн цээжин биеийн уртыг бодолцох нь чухал. Хэрэв чи өндөр буюу урт цээжтэй бол өргөн бүс, намхавтар буюу богино цээжтэй бол нарийхан бүс зүүгээрэй.
3. Байрлал, байрлал, байрлал
Сул цамц, даашинзыг, зөв байрлалд бүсэлж өмссөнөөр бүсэлхий өгдөг. Хэрэв чиний бие “алим” хэлбэртэй (биеийн ихэнх жин хэвлий хэсэгт төвлөрсөн) бол хөхний даруулганыхаа доохно бүсэлсэн нь дээр. Тэгвэл гэдэс чинь илүү нарийхан харагдана. Харин дөрвөлжиндүү галбиртай эмэгтэйчүүд ташаан дээрээ, хөх өгзөг томтой бүсгүйчүүд биеийнхээ хамгийн нарийхан хэсгээр бүслээрэй.
4. Хамгийн дуртай хэсгүүдээ тодотго
Галбираа “чимэх” үедээ, биеийнхээ хамгийн дуртай хэсгүүдийг тодотгоход анхаарлаа хандуул. Сүмбэн хурууд, нарийхан гараараа бахархадаг уу? Тэгвэл төрөл бүрийн бугуйвч, бөгж цуглуул. Нарийхан бүсэлхийгээрээ гайхуулмаар байна уу? Дэгжин бүс зүүж, 8 тоо шиг биеээ чим. Алаг нүдтэй юу? Тийм бол чамин цамц өмсөж, ээмэг зүү. Энэ дүрэмд дасаад ирэхээр дэлгүүр хэсэх чиний хувьд их амархан болох болно. Тольны өмнө зогсоод “Миний биеийн энэ хэсэг таалагддаг. Тиймээс би үүнийг тодотгоно” гэж бодож сур. Харин “Би энэ хэсэгтээ дургүй. Тиймээс би үүнийг нууна” гэдэг бодлоо багасга.
5. Өндөр өсгий, намхан улт, энэ хоёрын “завсрын” гутал
Одоо харин бүсгүйчүүдийн хамгийн сайн найз болох гуталны талаар ярилцъя. Ер нь шагай хэсгээрээ өргөн рементэй сандаальнаас зайлсхий. Энэ нь хөлийг богино харагдуулдаг. Хэрвээ чи жижиг, намхан биетэй бол платформ гутал, UGG бүү өмсөөрэй. Мяраалаг бүсгүйчүүд хүний анхаарал татахуйц, тод туфльнээс татгалзан энгийн классик өсгийт, намхан улт, янз бүрийн тоног чимэггүй арьсан гутал өмсвөл биеийн чинь доод хэсэг нарийсч харагдана.
6. Тренд ба галбир
Биеийнхээ галбирыг ч тодотгон, загварын чиг хандлагаас ч хоцрохгүй байх арга бий. Мөрөн дээрх генерал маягийн оруулга, овгор оёдол, чимэглэл нь лийрэн галбиртай буюу цээж хэсгээрээ жижиг, таазаараа том биетэй бүсгүйчүүдэд тохирно. Учир нь ийм гоёл нь мөрөнд “өргөлт” өгч, тэнцвэртэй харагдуулдаг. Харин энэ хавраас эрчимтэй тархаад байгаа “peplum” буюу ташаа хэсэгтээ цацагтай силлуэт нь бүсэлхийг нарийхан, өгзгийг том харагдуулдаг учир дөрвөлжиндүү шулуун биетэй эмэгтэйчүүд сонгох нь зохимжтой.
7. Гоёл чимэглэл ба галбир
Ээмэг, бөгж зэрэг акссесуарынхаа “орц”-ыг тохируулж чадвал биеийн чинь галбир илүү дур булаам харагдах боломжтой! Жишээ нь, хараа булаам ээмэг зүүгээд, гурвалжин захтай цамц өмсчихвөл хөх чинь илүү том харагдана гэдэгт итгэх үү? Нээрээ шүү, үнэхээр тэгдэг юм! Харин чи хэтэрхий “дүүрэн” цээжээ хүний хараанаас хол байлгахыг хүсвэл урт нарийхан кулонтой гинж зүүж, том чулуу, шигтгээнээс зайлсхийгээрэй.
Ганцхан зүйлийг л санаж яваарай хатагтай нар минь! Буруу биеийн галбир гэж байхгүй, харин биеийнхээ галбирыг буруу тодотгосон хувцаслалт л гэж байдаг юм.
Эх сурвалж http://www.info.mn
