Алдарт Николь Шерзингэр, Pitbull нар молиго үмхүүлсний дараа энэ мэдээнд хэн ч итгэхгүй л байх. Гэхдээ поп супер од Лэди Гага Монголд ирж магадгүй гэсэн сураг гарав. Тэрбээр ирэх сард Монголд албан ёсоор нээлтээ хийж буй “Fashion Channel” сувгийн урилгаар хүрэлцэн ирж магадгүй байгаа аж. Дэлхийд алдартай уг суваг Монголд анх удаа албан ёсны эрхтэйгээр цацагдаж эхлэх гэж байгаа юм.
Уг сувгийг “Univision”, “Sky Media” кабелийн сувгаар HD форматаар цацахаар төлөвлөж байгаа гэнэ. Энэ сарын 25-нд Сингапурт “Fashion channel”-ийнхэн хэвлэлийн хурал хийх үеэрээ Лэди Гагаг Монголд авчрах эсэх талаар мэдээлэх юм байна.
Гаднын томоохон брэндүүд Монголд үйл ажиллагаа явуулахдаа томоохон оддоор түрий барин олны анхаарлыг татаж, эцэст нь өвөрмонгол дуучдаар ам тагладаг жишиг тогтов. Энэ удаад хэрхэхийг хэн мэдлээ. Ямартай ч Лэди Гага ирж ч магадгүй, ирэхгүй ч байж магадгүй гэсэн горьдлого тээгээд л үлдье.
