Түүний энгэрт наалдаж, эрхэлж хэвтэх сайхан ч ганцхан л юм нь “жаргалын садаа” болоод байна уу? Заримдаа эмэгтэй хүнтэй хамт амьдардгаа, хүний эр нөхөр болсноо мартаад, ганц бие “хөвгүүн”-ийхээ эрх дураараа аашийг гаргаад байгаа эрчүүдийг яаж номхотгох вэ?
Гэртээ эхнэрээ хүлээж байгаа гэдгийг үл ойшоож, ихэнх цагаа бусад эрэгтэй найзуудтайгаа өнгөрөөх, аль эсвэл гал зуухаар тамхиа асааж, аяга тавгаа тэр чигт нь орхих зэрэг “ганц бие эрийн зуршил”-ууд бүсгүйчүүдийг залхааж орхидог. Тэд хамтран амьдрагчтай, хань ижилтэй болсон ч яг л гэртээ ганцаараа амьдардаг юм шиг аашилдаг. Хамтдаа хайртын чинь энэ занг засах гээд оролдоод үзье.
Хүнийг өөрчилнө гэдэг хэцүү…
Хэн нэгнийг өөрчлөхийг оролдох нь бүдүүлэг хэрэг хэдий ч хүн орчин нөхцөлдөө дасан зохицож, зарим нэг зүйлээ хязгаарлаж чаддаг байх хэрэгтэй. Юуны өмнө түүнд цаг хугацаа олго. Олон жилийн турш ганцаараа амьдарсан хүнд, шууд л хэн нэгэнтэй хамтран амьдрахад суралцах адармаатай байгаа. Эрчүүдийн энэ тал дээр гаргадаг түгээмэл алдаа бол бүсгүйгийнхээ санал бодлыг асуухгүйгээр, өөрийнхөө хүслээр асуудлыг шийдэх. Тэд мөнгөө хэрхэн зарцуулах, амралтын өдрүүдэд юу хийх зэргээ хэнээс ч асуулгүйгээр төлөвлөөд сурчихсан байдаг учраас өөр нэг хүнээс хамааралтай байж сурахад жаахан удна. Түүний зуршлыг болиулж, өөр шинэ зуршилтай болгоход, чиний зан араншингаас хамаарч 6-12 долоо хоног лав шаардагдана.
Өөрийнхөө “вант улс”-ыг нураахгүй гэсэндээ…
Өөрсдийнхөө хэн болохыг, юу хүсдэгээ мэддэг, түүнийгээ илэрхийлж чаддаг хоёр хүний хооронд хамгийн эрүүл харилцаа бий болно. Ийм хүмүүс бие биедээ өөрийнхөө талаар илэн далангүй ярьж, нэг хүн шиг болж чадна. Зарим хүмүүс хостой болохыг, өөрөөл хүнтэй бүхнээ хуваалцахыг өөрөө өөрийгөө алдаж эхлэхийн нэр гэж ойлгодог. Тиймээс түүний гаргаж байгаа энэ зан нь ухамсаргүйгээр өөрийнхөө өмнөх амьдралыг хадгалж, аварч үлдэх гэсэн оролдлого байж болох юм. Өөрөөр хэлвэл тэр бие даасан байдлаа алдахгүй гэсэндээ “Би хүнтэй гэрлэсэн ч өөрийнхөөрөө бүхнийг хийх болно” хэмээх бодолд дийлдээд байна гэсэн үг юм. Гэхдээ энэ бол эр хүн бүрт байдаг зан бөгөөд, муу юм биш юм.
Сурсан юмыг сураар бооход…
Түүний ингэдгийн бас нэг шалтгаан нь эрх жаалын “муу зан” сурснаас байж болох юм. Ээж нь, эсвэл хуучин найз бүсгүй нь үргэлж идсэн аяга тавгийг нь хураачихдаг, хувцсыг нь угааж, өөрт нь бүх эрх чөлөөг олгодог байсан болохоор тэр таныг ч бас тэдэнтэй адил гэж бодоод яваа байх. Цаад учир шалтгааныг ойлгох нь түүний зуршлыг засахад тус болно.
“Ганц бие эр” биш болсныг нь түүнд хэрхэн ойлгуулах вэ:
– Өөрийнхөө хүслийг мэдүүл. Түүнээр бодлоо таалгахыг оролдоно гэдэг утгагүй зүйл. Өөртөө үнэхээр юу хэрэгтэй байгааг үргэлж түүнд мэдэгдүүлж байх хэрэгтэй гэдгийг санаарай. Түүний хийж байгаа үйлдэл чамд ямар мэдрэмж төрүүлж байгааг нь эвтэйхэн ойлгуулж, түүнийг өөрийнхөө үйлдлийг ухамсарлахад нь тусла. Уурлаж, хашгичиж, буруутгах нь зуршлаа засахад нь нөлөөлөхгүй.
– Харилцааны эхэн үед түүнд ийм зуршлууд байгаа эсэхийг анзаар. Учир нь шинэхэн хосын хувьд бие биенийхээ хүслийг хүлээж авах чадвар нь илүү байдаг.
– Таны хэлснээр хийсэн жаахан ч гэсэн үйлдлийг нь урамшуулж магт. Хувцсаа орон дээр шидлэлгүй, шүүгээндээ хийсэн байвал үнсэлтээр шагна. Тэр зөв юм хийж байгаа гэдэгтээ итгэлтэй болно.
– Хэрэв эрүүл аргаар, хэд хэдэн удаа түүнийг өөрчлөх гэж оролдсон ч нөлөө үзүүлэхгүй байвал тэр үнэхээр танд тохирох хүн мөн эсэхийг бодоод үзээрэй. Магадгүй та түүнийг яг байгаагаар нь хүлээж авч чадахгүйдээ ингэж байгаа ч байж мэднэ. Эсвэл тэр үнэхээр таны бодож байгаачлан хэтрүүлээд байгаа байх. Харилцаанд том асуудлыг авчирдаг хүчин зүйлс ихэвчлэн жижигхэн байдаг гэдгийг санаарай.
