Орос, Америкийн сансрын нисэгч Е.Тарелкин, О.Новицкий, К.Форд нар ирэх аравдугаар сарын 15-нд Олон улсын сансрын станц руу 32 “найзын” хамт хөөрөх болжээ. “Союз” хөлгийн шинэ “гишүүнээр” сонгогдсон загаснууд сансрын нөхцөл дэх цацрагт идэвхит орчинд хэрхэн амьдрахыг судлах юм байна.
“Энэ удаагийн туршилт хамгийн сонирхолтой байх болно. Жингүйдлийн орчинд 90 хонохдоо загаснууд Японд үйлдвэрлэсэн өндөр технологийн аквариумд байна. Тусгай программчлагдсан “ухаантай” аквариум загаснуудыг гэрлэн дохиоллын дагуу хооллоно” хэмээн К.Форд ярьжээ.
Удаан хугацаагаар сансрын нөхцөлд байхад хүн, амьтны булчингийн үйл ажиллагаа суларч, жин нь багасаж, ясан дахь эрдэс бодисын хэмжээ буурдгийг эрдэмтэд тогтоосон. Тэгвэл усны амьтад сансарт удаан байхдаа хэрхэн өөрчлөгдөх бол. Саяхан НАСА-гийн эрдэмтэд өт сансарт урт насалдгийг тогтоосон билээ.
Ж.ЭРДЭНЭ
