Зонхилон тохиолдох БЗДХ-уудад тэмбүү, заг хүйтэн, шээс бэлгийн замын хламидын халдвар, трихомониаз, шээс бэлгийн замын мөөгөнцөр, нянгийн гаралтай үтрээний үрэвсэл, бэлгийн херпес, бэлгийн үү зэрэг өвчнүүд орно.
Заг хүйтэн өвчин нь “Neisseria Gonorrhoeae” гэдэг нянгаар үүсдэг. Шээс, бэлгийн замын эрхтэнг гэмтээдэг ба ховор тохиолдолд нүдний салст, залгиур хоолой болон хошногоны салст бүрхэвчийг гэмтээнэ.
Халдвар дамжих зам
Халдвартай хүнтэй хамгаалалтгүй бэлгийн хавьталд орсон үед бэлгийн замаар дамжин халдварлана. Халдвартай эхээс нярайд халдвар дамжина.
Илрэх шинж тэмдэг
Халдвар авснаас хойш дунджаар эрэгтэйд 3-5, эмэгтэйд 5-10 хоногийн дараа шинж тэмдэг илэрнэ.
Эрэгтэйчүүдийн 90-95%-д шинж тэмдэг хурц илэрч, шээсний сүв загатнах, хорсох, шээхэд өвдөх зовиур илрэх ба шээсний сувгаас шар ногоон өтгөн идээ гарч, шээсний сүв улайж хавагнан үрэвсэнэ.
Эмэгтэйчүүдэд ихэвчлэн шинж тэмдэггүй, балархай хэлбэрээр тохиолдоно. Зарим тохиолдолд бэлэг эрхтэн орчим эвгүй оргих, загатнах зовиур илэрч, умайн хүзүүний сувгаас бага хэмжээний салсархаг идээрхэг ялгадас гарна.
Хүндрэл, үр дагавар
Уг өвчин нь эмчилгээ хийлгээгүй тохиолдолд эрэгтэйчүүдэд төмсөг, төмсөгний дайвар, түрүү булчирхайн үрэвсэл үүсгэх ба үргүйдэлд хүргэдэг.
Эмэгтэйчүүдэд умай, умайн гуурсан хоолой, өндгөвч зэрэг бага аарцгийн хөндийн эрхтний үрэвсэлт өвчин үүсгэж үргүйдэл, умайн гадуурх жирэмслэлт зэрэг хүндрэл үүсгэдэг.
Заг хүйтний халдвартай жирэмсэн эхээс нярайд халдвар дамжиж, заг хүйтний гаралтай нүдний салстын үрэвсэл үүсэх ба эмчилгээ хийлгээгүй тохиолдолд нүдний эвэрлэг гэмтэн улмаар сохрох аюулд хүргэнэ.
Өглөөний сонин
