Бид бусдыг санаан зоргоор дүгнэж ярьдаг. Энэ бол мулгуу явдал. Өөрийгөө ч мэдэхгүй хүн өрөөлийг яаж мэдэх юм бэ? Чи түүнийг хэдхэн өдрөөр л таньдаг байх. Нэрийг нь мэдэх, зүсийг нь гадарлах, зарим нэг үйлдлийг нь мэдэх төдий. Энгүй уудам тивийн нэгээхэн буланг харахтай адил. Тэгээд яаж түүнийг таньсан гэх вэ? Кино гарч байх үед нэг хаалгаар орж ирээд нөгөө хаалгаар гарахын хооронд хальт харчихаад уг киног үзсэн юм шиг яривал утгагүй биз дээ? Чи өмнө нь юу болсныг мэдэхгүй, дараа нь юу болохыг гадарлах ч үгүй. Хүний амьдрал бол асар баялаг үзэгдэл. Тухайн нөхцөлд илэрч буй дүр төрх бол мөсөн уулын орой шиг хүн-ертөнцийн өчүүхэн хэлтэрхий. Тийм болохоор бусдыг санаан зоргоор дүгнэж, элдвээр ярихыг цээрлэ. Тэгвээс дотоод ухаарал чинь тэлэх болно.
Эх сурвалж http://www.info.mn
