Урлаг соёл хийгээд загварын бүсгүйчүүд муур, нохой тэжээх хоббитой гэхэд болохоор. Топ модель Д.Болормаа, О.Уянга, “Киви” хамтлагийн дуучин П.Алтанцэцэг, “Sweetymotion” хамтлагийн дуучин Э.Ганболор, “Гурван охин” хамтлагийн дуучин Д.Солонго зэрэг бүсгүйчүүд тэжээвэр нохдоо өөрөөсөө ч дутуугүй хайрладаг бол дуучин Нара, “Aqua fitness” төвийн захирал Б.Уянга нар хөөрхөн мууртай юм билээ.
Бүсгүйчүүд л болсон хойно, өвөр түрийд нь орж эрхэлсэн өхөөрдөм амьтдаа гоёж гангална гэж жигтэйхэн. Дуучин Нара муурныхаа хувцасны загварыг өөрөө гаргаж, гял цал болсон үнэтэй хүзүүвчээр чимээд зарим нэг хүнд “Хулганаа хүртэл хувцаслачихгүй дээ” гэж шүүмжлүүлсэн удаатай. Тэгвэл энэ юу ч биш. Д.Солонго, Э.Ганболор хоёрын хувьд өөрсдөө яаж хувцаслана, нохойныхоо гоёлыг ч мөн ижилсүүлдэг хоббитой.
“Киви” хамтлагийн П.Алтанцэцэг харин тохой хүрэхгүй жаахан нохойгоо “Хожуу учрал” дууныхаа клипэнд тоглуулж, бүр гар цүнхэнд хүртэл хийж орхисон зоримог эзэн. “Усны гүнж” гэгддэг Б.Уянга цагаан муураараа бүр имиж хийгээд сэтгүүлийн нүүрийг чимэх зураг авахуулдаг хамтрагчаа болгосон гэхэд хилсдэхгүй.
Энэ мэт тэжээвэр амьтдаараа имиж, бас гоёл хийх дуртай оддын тоо өдрөөс өдөрт нэмэгдэх бололтой. Мэдээж хэрэг, тэд гадаадын алдартай оддын адилаар нохой, муурандаа зориулж загвар зохион бүтээх, тохилог сууц болон тоглоомын талбай барихаас гадна нэрийг нь сийлсэн гоёл чимэглэл ч гаргахыг үгүйсгэх аргагүй.
Р.Есүй /Shuud/
