Найз залуудаа хаягдах, бүтэлгүй дурлалтай учрах, сэтгэлийн шархтай хоцрох гээд хайр дурлалтай холбоотой олон асуудлууд бидний эргэн тойронд эрээлжилдэг. Хөнгөхөн дурлаж хурдан үерхээд салсан тохиолдолд нөгөө этгээдээ мартах амархан байдаг боловч сэтгэлд гүн орон зай үлдээсэн, хүч энергиэ багагүй хугацаанд түүний төлөө зарцуулчихсан үед шархаа нөхөж, түүнийг мартахад маш их, бүр маш их хичээл зүтгэл хэрэгтэй болдог билээ.
Дараах зөвлөгөөнүүдийг дагаснаар түүнийг бүрмөсөн мартана гэж амлаж чадахгүй ч гэлээ санах сэтгэл чинь багасаж, аажим аажимаар урьдны “өөртөө” ороход чинь туслана гэдэгт итгэлтэй байна.
Түүнийг мессэнжер, утасныхаа жагсаалтаас БҮҮ хас.
Та хоёр дөнгөж салчихсан, эргэж нийлэхгүй гэдгээ хэн хэн нь мэдэж байгаа. Тиймээс чи түүний утасны дугаар, мессэнжер хаягийг нь устгахаар зэхэж байгаа биз дээ? Гэхдээ хонгор минь, тийм зүйл хийгээд хэрэггүй ээ. Маш олон охидууд түүний гэсэн бүх юмыг устгаж, өгсөн бэлэгнүүдийг нь гаргаж хаявал сэтгэл санаагаа цэвэрлэгдэнэ гэж андуурдаг. Нэг хэсэгтээ нүдэнд харагдахгүй, санаа амар байх ч гэлээ сэтгэлд чинь орон зайгаа үлдээсэн учраас эд зүйлсийг нь үрэн таран хийлээ гээд мартагдахгүй. Харин ч санаандгүй байдлаар түүний өмсдөгтэй адилхан цамц харах, мессэнжерт орж ирэх, гэнэт чам руу залгахад гарч ирэх утасны дугаарыг харах бүрт сэтгэл чинь хөндөгдөж түүнийг мартаагүй, одоо ч гэсэн хайртай юм байна гэж бодогдуулж мэднэ. Тиймээс “Хайр” гэж тэмдэглэсэн дугаарыг нь устгалгүй зүгээр л нэрээр нь тэмдэглээд орхичих. Чи жинхэнэ хайртайгаа учирахын тулд салсан гэдэгтээ, түүнийг мессэнжер хаяг, утасны дугаартай гэдэгт нь дасах ёстой.
Түүнийг ярьж мартах аргыг сонго.
Салсан л бол түүнийг аль болох дурсахгүй, бодохгүй, ярихгүй байвал хурдан мартагдана гэж хэзээ ч биелэх боломжгүй зүйлийг хэрэгжүүлэх гээд хэрэггүй. Харин ч түүний сайн талыг ярьж, тохиолдсон инээдтэй зүйлээ найзуудаа хөгжөөхийн тулд хэрэглэх нь хурдан мартах тунчиг эрүүл арга юм шүү. Харин түүний тухай ярихдаа тэр цаг үедээ очихыг хүсэх биш, түүнтэй өнгөрөөсөн цаг хугацаа нэгэнт өнгөрсөн сайхан дурсамж болж дээ гэдэг хандлагаас яриарай. Огт ярихгүй хүмүүс л хамгийн сэжигтэй байдаггүй гэж үү? Түүнийг зүгээр л инээмсэглэн “Өө, түүнээс салаад би олон зүйлийг ойлгодог болж билээ” гэж ярьдаг охин байгаарай.
Цаг заваа үрэх зүйлтэй бол.
Түүнтэй өдөр болгон шахуу уулзсаар байгаад өдрийн хуваарьт чинь “Хайртайгаа уулзах цаг” ёс юм шиг ордог болчихсон байсан биз дээ? Харин тэр цагийг гэртээ сууж өнгөрөөгөөд байхаар түүнээс салчихаад л амьдрал сонирхолгүй, уйтгартай болчихлоо гэсэн бодол төрдөг. Үнэн хэрэгтээ чиний салалт бус түүнтэй өнгөрүүлдэг байсан цаг хугацаанд хийх зүйлгүй байгаа болохоор л амьдрал нэгэн хэвийн, онц гойд зүйлгүй мэт санагддаг байна. Тиймээс цагаа хий дэмий/Утга учиргүй шоудалт мөн орж байгаа/ өнгөөрөхийн оронд өөр зүйлд зориулж эхэл. Цагийн ажил, спортын секц, салса бүжгийн дугуйлан, шинэ хобби гээд гадуур гарч, хүмүүстэй харилцах, гол нь чамайг зөв тийшээ хөтлөх юу ч байсан болно.
Байгаль дэлхийгээс хүч ав.
Хэрвээ найз нөхөд чинь чамайг ойлгохгүй, сэтгэлийг чинь хангалттай засахгүй байгаа юм шиг санагдаад байвал байгаль дэлхийгээс хүч, энерги аваарай. Учир нь байгальд гарахаар хүн олон зүйлийг эргэцүүлж, юмсыг илүү өргөнөөр харж, амьдрах сайхан гэдгийг мэдэрдэг. Хамгийн чухал нь байгальд гарахаар л шууд өөдрөг, эрч хүчтэй болох юм шиг өөрийгөө хүчлэлгүй, зүгээр л зөнд нь орхи. Тэгвэл гайхамшиг өөрөө чамд нэг л мэдэхэд ирэх болно. Амжилт хүсье хонгор минь. Чи заавал чадна.
