Дэлхийн тэргүүлэх баячуудын нэг, нэрт эдийн засагч Жорж Соросын 82 насны ой өчигдөр тохиожээ. Тэрээр төрсөн өдрөөрөө 42 насаар дүү Тамизо Болтон гэх бүсгүйтэй гэр бүлээ батлуулах болсноо мэдэгдсэнийг “Ройтерс” агентлаг уламжилсан байна. Энэ нь Ж.Соросын гуравдахь гэрлэлт болж байгаа бол Т.Болтоны хувьд хоёр дахь гэрлэлт нь аж.
Тэрээр төрсөн өдрөө Нью-Йорк мужийн Саутгемптон хот дахь зуны өргөөндөө тэмдэглэжээ. Түүний төрсөн өдөр болоод хуриманд нь уригдсан нэг найзынх нь хэлснээр Ж.Сорос сүйт бүсгүйдээ “Graff” пүүсийн урласан цагаан алтан хүрээтэй ягаан өнгийн алтан бөгж бэлэглэжээ. Харин тэд гэр бүлээ батлуулаагүй байгаа бөгөөд хэзээ батлуулах нь тодорхой бус байгаа аж. Хоёр хос анх 2008 онд танилцсан гэнэ. Тухайн үед Т.Болтон хүнсний нэмэлт бүтээгдэхүүнийг интернэтээр худалдаалах бизнес хийж байжээ. Харин одоо мэргэжлээ өөрчлөн онлайнаар йогийн сургалт явуулах компанийг удирдаж байна.
Ж.Соросын жинхэнэ нэрийг Дьердь Шорош гэх ба тэрээр 1930 оны наймдугаар сард Унгарын нийслэл Будапештэд төржээ. Түүний эцэг Тивард Шварц нь Еврейн нийгэмлэгийн тэргүүн байсан бөгөөд 1936 онд овогоо Шорош болгож сольсон гэдэг. Харин 1957 онд Соросынхон хуурамч бичиг баримтаар Их Британид цагаачилжээ. Залуу Жорж Сорос Лондоны эдийн засгийн сургуульд элсэн орж, дөрвөн жилийн дараа амжилттай дүүргэн Лондон дахь нэгэн найзынх нь аав түүнийг Уолт-Стрит дэх брокерийн пүүст урьж ажиллуулсан гэдэг.
Тэрбээр үнэт цаасны арилжааг нэг орноос нөгөө оронд худалдаалж, улмаар дэд Ерөнхийлөгч болтлоо дэвшсэн байна. 1967 онд Ж.Сорос эзэндээ хөрөнгө оруулалтын сан байгуулж, захирлаар нь ажиллах хүсэлтэйгээ уламжилжээ. Түүнээс хойш дөрвөн жилийн дараа тэрбээр “Double Eagle” компаниа байгуулсан гэдэг. Байгууллагаа өргөжүүлж улмаар “Quantum Group” хэмээх алдарт группээ байгуулжээ.
