Илүүдэл жингүй байх хичнээн сайхан. Гэхдээ зүгээр л туранхай байгаад болчих юм биш ээ. Ээ, бурхан минь эмэгтэйчүүд бидний гоо сайхны асуудал ямар олон бэ? Гэхдээ л булчинлаг, чанга биетэй байхыг хүсэхгүй бүсгүй байна гэж үү дээ… Хэтэрхий туранхай гуяыг хэрхэн биежүүлж, чангаруулж болох дасгалуудыг хүргэж байна. Ганцхан сар өдөр бүрийг тууштай зориулаад байвал харагдахуйц үр дүнд хүрэх болно. Удахгүй “нимгэн нойтон” хувцасны улирал ирж байгааг ч хэлэх үү.
1. Хана налаад сууж босох-Толгой, мөр, нуруугаараа хана налаад хөлөө хананаас 50см зайтай зогсоно. Өвдөгөө хөдөлгөлгүйгээр дээш доошоо сууж босно. Суухдаа өвдөгөө 90 градус тэгш өнцөгт болгоорой. Тэр байрлалаа 30 секунд барина.
2. Шатаар өгсөгч-Шатныхаа урд хажуулдаж зогсоод эсрэг талынхаа хөлийг гишгүүр дээр тавьж өгсөж буй мэт өндийнө. Өөрөөр хэлбэл тэр хөл дээрээ бүх биеийн жингээ өгнө гэсэн үг. 2 талдаа тус бүр 30 удаа давтана. Гуяны дотор талын булчинд ачаалал өгнө.
3. Урагш давш– Хөлдөө мөрний хэмжээтэй зай авч зогсоно. Урагш том алхаж доош сууна. Алхсан хөл чинь шалтай паралель болох ёстой. Дээшээ босоод нөгөө хөлөөрөө давтана. Тэнцвэрээ сайн барих хэрэгтэй. Хөл тус бүрт 20 удаа хийгээрэй.
4. Бөмбөг шахах Сандал дээр цэх суугаад өвдөгнийхөө завсар бөмбөг хавчуулна. Бөмбөг байхгүй бол дэр байж болно. Тэгээд өвдөгөө чангалаад бөмбөгөө шахаж, тэр чигтээ 30 секунд барина. Үүнийг 10 удаа давтаж хийгээрэй. Гуяны дотор талын булчинд ачаалал өгөх ёстой шүү.
