Хэвлийдээ хүүхэд тээж яваагаа мэдсэн тэр цаг мөчөөс эхлэн олонх эмэгтэйчүүдийн сэтгэл зүй өмнөхөөсөө өөрчлөгддөг. Өөрийн ирээдүйн төлөвлөгөө, амьдралын хэв загвар, мэдрэмж, гэр бүлийн харьцааны олон шинэлэг, заримдаа шийдвэрлэхэд төвөгтэй асуудлууд урган гарч ирнэ. Хүүхдийг ердөө зугаа цэнгэл, уйтгар ганцаардлыг арилгах зүйл хэмээн ойлгох нь эндүүрэл юм.
Хүссэн, төлөвлөсөн бол жирэмслэлт аз жаргал авчирдаг. Хэрвээ таны анхны хүүхэд бол та зохих бэлтгэл хийх, анхных биш бол өмнө нь мэдээгүй зүйлээ мэдэж авах нь зүйтэй. Таны гадаад төрх болоод жирэмсэн болмогц биед шинээр боловсорч эхлэх дааврын нөлөөгөөр олон өөрчлөлт биед тань илэрч байгааг та мэдрэх болно. Нүүр царай цайрч зөөлөрсөн, эсвэл нөсөөжиж, хөхний хэмжээ томорч чангарсан, бэлхүүсээрээ өдөр ирэх тусам дүүрч байгаа, зан харьцаа өөрчлөгдөн, эелдэг, дөлгөөн, тайван болж хөдөлгөөн эвлэг, тогтуун болсон гэх мэтчилэн.
Гэхдээ энэ өөрчлөлт эмэгтэй хүн бүрт адилгүй байдаг. Ер нь жирэмслэлт ба төрөлт нь эмэгтэй хүний бие махбод, сэтгэл санаа, гоо зүйн хувьд хамгийн эерэг хандлага үзүүлэх ёстой үйл явц юм. Учир нь байгаль эхээс эмэгтэй хүнд л ганцхан заяагдсан тавилан тул бие махбод өөрөө үүнийг маш эерэгээр хүлээн авдаг. Нэг үгээр хэлбэл, таныг хүүхэдтэй болохыг хүлээж байдаг учраас баярладаг гэхэд болно.
Жирэмсэн эмэгтэйн сэтгэл санааны тогтворгүй байдал нь түүний биед боловсрогдож байгаа даавартай холбоотой гэдгийг дахин хэлэх нь зүйтэй. Зарим үед аливаа зүйлд амархан уурлах, бухимдах, баярлах гэх мэтээр сэтгэлийн хөдөлгөөн тогтворгүй, эмзэг болох, уйламхай болох, мөн сэтгэлээр унах, айдас төрөх шинжүүд илэрнэ. Хүүхдээ төрүүлэхээр шийдсэн л бол эдгээр айдас, сэтгэлийн зовнилыг огт ажралгүй, цоо шинэ амьдрал эхэлж байгаа тул гэр бүлийнхээ цаашдын ирээдүйн сайн сайхныг бодож төлөвлөх нь дээр.
Жирэмсний бүх хугацаанд та болон таны нөхөрт сэтгэлээр унах, бас хөөр баяр болох үе олон тохиолдоно. Иймээс гэр бүлийн гишүүд энэ байдалд тэвчээртэй хандаж, аль болох харилцан ойлголцож, бие биедээ тусалж дэмжээрэй. Танд сайн хань таарсан бол хүүхэдтэй болох явдал танай гэр бүлийн харьцааг улам ойр дотно болгох юм.
Анхны хүүхдээ хүлээж байгаа эхнэр, нөхөр хоёрт бүх л зүйл шинэ, анхных байх бөгөөд мэдэхгүй, ойлгохгүй, чадахгүй юм ч их тааралдах тул хэн хэнийгээ үүнд буруутгаж маргалдахаас зайлсхийж, үүний оронд сэтгэлээ илэн далангүй нээж, аль болох хамтран зөвлөлдөж харилцан туслалцахаар чармайх нь зөв. Бүх эцгүүд хүүхэдтэй болмогц урьдахаасаа илүү идэвх үүрэг хүлээдэг. Эцгийн үүрэг хариуцлага нь хүүхэд төрснөөс хойш биш хүүхэд олсон өдрөөс эхэлдэг. Эхнэртээ хэрхэн туслахаа мэдэхгүй эцгүүд туршлагатай хүмүүсээс асууж, бас гарын авлага уншиж судлах нь зайлшгүй хэрэгтэй.
Түүнээс гадна хамгийн чухал зүйл бол эхнэрийнхээ хэрэгцээг олж харж чаддаг, халамж хайраар дутаахгүй байх, түүнд тохиолдож байгаа бүх зүйлд үнэн сэтгэлээсээ анхаарал тавьж, илэн далангүй ярилцах нь зүйтэй. Эцэг хүний үүрэг их өргөн хүрээтэй, харьцангуй хүнд алба учраас зарим эцгүүд гаднах ажилдаа түүртэн эхнэрээ халамжлахаа орхигдуулдаг тал бий.
Айдас түгшүүр, санаа зовнил
Ер нь ихэнх гэр бүл сүүлийн саруудад хүүхдийнхээ талаар санаа зовж эхэлдэг. Түүнийг ямар нэг эмгэгтэй төрчихвий, би ямаршуухан эцэг эсвэл эх байх бол, мөн хүүхдээ унагаачихвал яанаа гэх мэтчилэн элдвийн зүйлд санаа зовно. Түүнээс гадна “их өвдөх болов уу”, “Би аймаар чанга орилох болов уу”, “Намайг дүлэхэд өтгөн, шээс гарчихвал яана аа”, “Би ухаанаа алдаад, эвгүй байдал гаргачих вий дээ”, “Өөрийнхөө хүсээгүй зүйлийг л битгий хийгээсэй” гэх мэтчилэн бодох нь бүх эхчүүдэд адилхан төрдөг бодол. Төрөлт хэвийн зүйлс учраас өөртөө итгэлтэй байж зоригжуулах хэрэгтэй.
Эсэн мэнд эрүүл амаржаад явж байгаа эх олон л байна шүү дээ. Та тэдний л нэг байх болно. Элдэв айдас төрүүлэх бодолд толгойгоо гашилгах нь түгшүүрийг нэмэгдүүлэхээс өөр сайн зүйлд хүргэдэггүй.
Бэлгийн харьцаа
Олон эхчүүдийн ярианаас энэ үеийн бэлгийн харьцаа бусад үеийнхээс илүүтэй сайхан байсан гэж сонссон. Энэ нь үнэхээр тийм л байх ёстой юм. Учир нь жирэмсний бэлгийн даавруудын нөлөөгөөр хүлээн авах мэдрэмж сайжирч, бэлгийн хүсэл амархан төрдөг. Биеийн зарим хэсгээр хөх, бэлэг эрхтэн зэрэг нь их эмзэг мэдрэмтгий болно. Харин сүүлийн саруудад бага зэргийн ядрал, огиулж бөөлжүүлэх, хэвлийн томролтоос болж таны бэлгийн сонирхол буурах тал ажиглагдана. Бэлгийн харьцаа хийснээр үтрээнд халдвар орж, хүүхдэд муугаар нөлөөлдөг гэсэн ойлголт хүмүүст байдаг. Харин энэ нь бэлгийн ариун цэврийг сахиагүй, нэгээс илүү хүнтэй бэлгийн харьцаанд ордог гэр бүлд л хамаарагдах асуудал болохыг нотолсон байна.
Үнэхээр эхнэр, нөхрөөсөө өөр хүнтэй харьцдаггүй, бие биенийхээ итгэлийг алдахыг хүсдэггүй үнэнч гэр бүлүүд эмчийн зөвлөсөн болон өөрсдөдөө тохиромжтой байрлалыг сонгон жирэмсний ямар ч үед бэлгийн харьцаа хийж болно. Бэлгийн харьцаа нь умайн агшилтыг сайжруулж, аарцгийн хөндийн булчингийн хөгжилд сайн нөлөөтэй юм. Өмнө нь та зулбаж байсан бол доошоо усархаг ялгадас гарч байгаа үед сав үе үе чангараад байгаа үед зайлсхийгээрэй.
Жирэмслэлт ба хөдөлмөр зохицуулалт
Хэрвээ та ажлынхаа нөхцөл байдлыг хүнд гэж тооцдог бол, биеийн хүчний ажил хийдэг бол, гадаад орчны бохирдол ихтэй, хортой утаа униартай, мөн химийн төрөл бүрийн бодис, эмийн бодистой харьцаж ажилладаг бол жирэмсэн байх хугацаандаа ажил төрлөө зохицуулах шаардлагатай. Гэхдээ жирэмслэлт нь хэвийн зүйл учраас түүнийг хэтрүүлэн айдас төрүүлэх нь утгагүй зүйл болно. Үр хөврөл анх үүсч буй болохоосоо эхлэн эрүүл орчин, нөхцөл байдлыг шаардах бөгөөд үүнийг хангаснаар эрүүл хүүхэд төрдөг. Харин эрүүл бусаар амьдарч сурчихсан хүмүүст сэрэмжлүүлэх нь зүйн хэрэг юм.
Иймээс хэвлий дэх хүүхдийн тань, мөн ирээдүйн эх таны эрүүл мэндэд төвөг, хор хөнөөл учруулахгүй бол ажлаа хийж, хамт олонтойгоо байх нь зөв. Олонх тохиолдолд 32 долоо хоногтойгоос жирэмсэн эхчүүдийг ажлаасаа чөлеөлөгдөхийг зөвлөдөг. Учир нь энэ үед уушги, зүрх, бөөр, элэг гэх мэт амьдралын чухал эрхтнүүд дээд цэгтээ хүртэл ачаалалтай болдог. Мөн нуруу нугалам, булчин шөрмөсний ажиллагаа хоёр дахин нэмэгдэнэ. Хэт орой болтол удаан хугацаагаар ажиллаж, нойр хомсдох, үүнээсээ болж толгой өвдөх, нойргүйдэх, ядарч сульдах шинжүүд илрэх нь жирэмсэн болон төрөх үеийн хүндрэлд хүргэж, улмаар эх хүүхдийн амь насанд аюул учруулж болно.
