“Мисс Монголия-2009” тэмцээний тэргүүн мисс, “Азийн модель” агентлагийн гүйцэтгэх захирал Х.Бадамгэрэл гоо үзэсгэлэн, мөрөөдлийнхөө нууцаас дэлгэжээ. Түүний гоо үзэсгэлэнгийн нууц сайхан шүднээс гадна даруу төлөв зан чанар, зөөлөн ааль гэнэ. Энэ талаар нэгэн хэвлэлд өгсөн ярилцлагандаа “Хүмүүс үс сайхан бол зүс сайхан гэж ярьдаг. Харин миний гоо сайхны нууц миний шүд. Гэвч сүүлийн үед ааш зан маань зөөлөн даруу болоод байгаа. Би их хатуу, хурц ааштай хүн л дээ. “Тэгэх ёстой” гэж ярьдгаас биш “Тэгвэл яах бол” гэж тээнэгэлздэггүй. Шийдвэрийг цаг тухайд нь хурдан гаргадаг. Бусад нь миний шийдвэрийг зөвшөөрвөл ажлаа хурдан эхлээд, хурдан дуусгахыг хүсдэг нэгэн байсан. Харин энэ зан авирыг хайр дурлал миний зөөллөсөн.
Манай найз залуу их романтик. Надад үргэлж гэнэтийн зүйл бэлддэг. Эрчүүд эмэгтэй хүнийг алхам тутамд нь зөөллөж, баярлуулж байх нь зүйтэй болов уу. Харин мөрөөдөл гэвэл сайн ханьтай, хоёроос гурван насны зөрүүтэй таван хүүхэдтэй болно. Нэг охин, бусад нь хөвгүүд байна гэж төлөвлөсөн. Сайхан цэвэр агаарт, бүх зүйлдээ сэтгэл хангалуун амьдарна. Өглөө бүр нөхөр, хүүхдүүдийнхээ цайг бэлтгэж, тэднийхээ аз жаргалтай инээмсэглэлийг харна. Амьдралынхаа туршид загвар өмсөгч, мисс шиг амьдарна гэдэг хэцүү. Эмэгтэй хүн учраас хань, үр хүүхэдтэй болно. Тэдэндээ илүү цаг зарцуулж байж, эргээд аз жаргалыг мэдэрнэ шүү дээ. Би дэлхийн топ дөрвөн тэмцээний нэг “Мисс интернэйшнл” тэмцээнд оролцоод ирсэн. Тэндээс их зүйл сурсан. Тиймээс харамсах зүйл байхгүй. Тэмцээнүүдийн санал ирдэг. Боломжтой гэсэн тэмцээндээ оролцдог” хэмээн ярьжээ.
Тэрээр одоогоор “Азийн модель” агентлагийн гүйцэтгэх захирал хийхээс гадна бизнесийн удирдлагын ухаанаар магистрт сурч байгаа аж.
Б.Дэжид
