Тод гэрэлтэх од буюу TOP LINE

TOP LINE хамтлагийн гишүүнээр Бөх, Сүрлэг, Наранцогт, Хөхбилүү зэрэг дөрвөн залуу өөр өөрийн авьяас, дуу хоолой, ааг зоригоороо нэгдэж, хүмүүсийн сонорыг баясган, захгүй дуу урлагийн ертөнцийг эзэгнэн, аргамаг хүлэг шиг түрэн орж иржээ. 2017 оны 10-р сард энэхүү хамтлаг нь байгуулагдсан бол “Зүүдний дагина”, “Тэр бүх мэдрэмж” зэрэг чанарлаг бүтээлээрээ шинэ урлагийг эхлүүлж, цахиур хагалан цахилж явна.
“Зүүдний дагина” дуу нь 20-иод жилийн өмнө Японы хит дуу байсан төдийгүй улмаар 20 гаруй улсын хэлэнд дуулагдаж, одоо ч гэсэн аялгуу донж нь цуурайтсаар. Түүнчлэн TOP LINE хамтлаг нь монгол хэлэнд дахин дуулснаар урлагийнхныг шуугиулж, сонсогчдын хайр хүндэтгэл, шүтээн бишрэлийг олжээ. Тус дууг дуулснаараа Youtube дээрх жагсаалтад гурван долоо хоног дараалан тэргүүн байранд байсан бөгөөд одоо драмын тоо нийт 4 саяыг давж, урлагийн хүрээн дэх шинэ өндөрлөгийг бий болгож, чансаа өндөр дуулалт, жавхаалаг дүр төрх, онцлог клипээрээ хүмүүсийн сайн үнэлгээг олоод байгаа.
– “Зүүдний дагина” дууг дахин сэргээн дуулснаараа ийм алдарт хүрч, олны хайр бахархлыг олно гэж бид бодоогүй. Гэхдээ энэ хамтлагийн маань нэрэнд нийцэж байгаа юм байна хэмээн бэлэгшээнэ. Манай хамтлагийн нэрийн хувьд тэргүүн зэргийн буюу шилдэг эгнээ гэх утгатай. Энэ нь хүн бүхэн өөрийн хийж байгаа ажлынхаа хүрээ цард хамгийн тэргүүн зэрэгт, хамгийн шилдэг байхыг хүсдэгтэй холбоотой. Бид хэдий урлаг соёлын аянд анхлан хөл тавьж байгаа ч гэсэн дорвитой бүтээлээрээ заавал ялгарч гарахыг боддог. Үүнийхээ төлөө хүчин зүтгэсээр яваа гэж хамтлагийн ахлагч Хөхбилүү ярив.
Тус хамтлаг байгуулагдах болсон шалтгаан нь үнэндээ их энгийн. “Олуулаа бол хүчтэй”, тийм ээ. “Олуулаа хүчтэй” энэ үг, энэ мэдрэмж TOP LINE хамтлагийг өнөөдрийн амжилтад хүргэжээ. Тийн бус, Өвөр Монголын урлагийн дээд сургуульд үндэсний бүжгийн мэргэжлээр сурсан Бөх, Өвөр Монголын Хөдөө Аж Ахуйн Их Сургуульд сурч буй Сүрлэг, Өвөр Монголын Багшийн Их Сургуулиас төгссөн Наранцогт, Өвөр Mонголын Их Сургуулиас төгсөн “Есөн” дуулаачийн сургалтын төв ажиллуулж буй Хөхбилүү гэсэн дөрвөн залуу зуузай холболгүй тус тусдаа замнасан бол яах бол?
Дуу, уралгүйгээр дуулим орчлонд амьдрах уйтай. Дуу, урлагийн ид шидэд хөтлөгдөх гэдэг мөн хэн бүгдийн санасан зориг, бодсон хүслээр болох юм биш хойно TOP LINE хамтлаг юутай ч энэхүү яруу эгшиглэнт заяанд оногдсон нь бахархалтай. Харин хамтлагаа яаж авч явах тухай Тэнэгэр, Мөнгөнсүх зэрэг багшийнхаа санал зөвлөгөөгөөр хамтлаг гэдэг юу болох, яаж орших, хэрхэн уран бүтээл туурвих, яаж хамтран ажиллах зэрэг талд үнэнч зүтгэл, ухаан хөдөлмөрийг нь гүнзгий хүртсэн байна. Тэд багш нарынхаа заасан ёсоор, мэдрүүлсэн зүйлсээр нь өөрийн дуу хоолойгоо хэрхэн өрөөлтэйгээ нийцүүлэх, өөрсдийн дутагдал буюу давуу талаа хэрхэн хамтлагтаа зохицуулж тохируулахад уйгагүй хөдөлмөрлөж, бага бус хугацаа зарцуулан байж хамтлаг гэх нэгэн агаар мэт орчинд хамтдаа байж чадаж байгаа юм.
Дуу, урлаг эдгээр залуусын хувьд амьдралын нэг хэсэг, оюуны тэжээл байлаа. Тэд дууны чанар чансаанд маш их анхаардаг. Ялангуяа бичлэгт орохоосоо өмнө маш их бэлтгэл хийдэг аж. Хийсэн уран бүтээлдээ хайртай байж хүний хайр хүндэтгэлийг хүртэх болно гэж тус хамтлагийнхан сэтгэл нэгддэг.

Харин ирээдүйн хүсэл мөрөөдлийнх нь талаар сонирхоход “Эвтэй байж хүчтэй байх гэхийг баримталж,  дорно дахин, өрнө дахины том том тайзанд тоглох хүсэлтэй” гэж байв.