Өнөөдөр домогт дуучин Майкл Жексон амьд сэрүүн байсан бол 54 нас хүрэх байлаа. Түүнийг өнөөдөр дэлхий даяар дурсан санаж байна. Хөгжмийн ертөнцөд домог болсон дуучин Майкл Жесконы тухай үнэн, худал түүхүүд одоо хүртэл хүмүүсийн сонирхлыг татсаар байгаа. Тэртээ 1993 оны хоёрдугаар сарын 10-нд ярилцлагын хатан хаан Опра Уинфритэй ярилцжээ. Энэ ярилцлага Майкл Жексоны дотоод ертөнцийн хаалгыг бусдад дэлгэсэн юм. Майкл Жексон таны төсөөллөөс өөр амьдрал туулсан…
Опра: Би энэ нэвтрүүгийг бэлтгэж байхдаа таны бүх бичлэгийг үзсэн. Бурхан намайг гэрчилнэ биз, бүгдийг нь. Тэр бичлэгүүдийг харж суухад та зүгээр л дахин төрж, амилчих шиг болох юм. Харин тайзны ард тийм аз жаргалтай байж чаддаг байсан уу?
Майкл: Тайз миний орон гэр байсан. Тайзан дээр өөрийнхөөрөө байдаг байсан ч буухаараа хичнээн гунигтай болдог байсныг маань хэн ч мэдэхгүй.
Опра: Нээрээ гэж үү?
Майкл: Тийм ээ.
Опра: Бүр анх дуулж эхэлснээсээ авахуулаад л тийм гунигтай байсан хэрэг үү?
Майкл: Гуниглаж, ганцаардаж явсан үе минь… Нэр алдар гэж юмтайгаа эвлэрэх хэцүү байсан. Ах нартайгаа хөгжилдөж, дэрээр байлдаад л сайхан байсан үе бий… гэхдээ л ганцаардлаас болоод үе үе уйлдаг байсан.
Опра: Хэдэн настай байхдаа?
Майкл: Өө, их бага байсан. Найм, есөн нас болов уу даа.
Опра: Өөрөөр хэлбэл дөнгөж нэрд гарч байхдаа?
Майкл: Тийм.
Опра: Бүх дэлхийд, бид бүгдэд та харагдаж байснаасаа огт өөрөөр амьдарч байсан байх нь. Бага байхдаа би таны ах Жэки Жэксоны эхнэр болохыг мөрөөддөг байлаа. Та нарын амьдрал бидэнд үлгэрийн юм шиг санагддаг байсан гэж би хэлэх гээд байна л даа. Бүгдээрээ л тэгэж амьдрахыг хүсдэг байсан ш тээ!
Майкл: Сайхан байсаан. Алдар нэртэй байх сайхан л даа. Дэлхийгээр аялаж, хүмүүстэй танилцана. Гайхалтай. Нэг их гомдол тавиад баймааргүй ч нэр алдарт бас өөр тал бий. Бэлтгэл сургуулилтад маш их цаг зарна, өөрийгөө энэ бүхэнд бүрэн зориулах хэрэгтэй болно. Хүүхэд нас гэдэг юм надад байгаагүй юм байна гэдгийг одоо л би ойлгож эхэлж байна. Гурван цаг хичээлээ давтчихаад, бүр орой унтах хүртлээ студид дуу бичүүлдэг байсан. Ажилламааргүй, тогломоор байгаагаа бодох бүр нулимсаа гартал гомддог байснаа санаж байна.
Опра: Би багадаа хүүхэлдэйгээр тоглоод л, яриад л байдаг байлаа. Хүүхэд болгонд гадаад ертөнцөөс өөрийгөө тусгаарласан мөрөөдөл, төсөөллийн орчин бадйаг шүү дээ. Танд тийм юм байсан уу?
Майкл: Үгүй. Тийм болхоор одоо үүнийгээ нөхөж олж авмаар байна. Яагаад миний эргэн тойронд хүүхдүүд байгаа юм гэж хүмүүс гайхдаг. Тэдний ачаар би “Диснэй лэнд”, тоглоомны төв гээд бага насандаа амсаагүй мэдрэмжээ авч байна. Миний бага нас бол ажлаас ажил, концертоос концертийн хооронд өнгөрсөн. Тоглолтгүй үед студийн бичлэг, телевизийн шоу, ярилцлага, гэрэл зураг авахуулах гээд завгүй байсан.
Опра: Майлк Жексон, дараалсан дөрвөн хиттэй хөвгүүн бусад хүүхдүүдээ өөр амьдралтайгаасаа болж уйлж суудаг байсан байх нь ээ?
Майкл: Шоу- бизнест би дуртай байсан, одоо ч тэр. Гэхдээ хүссэнээрээ хөгжин цэнгэж чадахгүй байсан үе бий. Энэ л гол гонсойлгодог байлаа. Нэг удаа бид Өмнөд Америк явах болчихоод ачаа хөсөг, унаа тэрэг бүх юм бэлэн. Харин би хаашаа ч явмааргүй, бусдаасаа нуугдчихаад ганцаараа уйлж суусан.
Опра: Саяхан таныг Пепсигийн рекламанд тоглохдоо бага насныхаа хүүхдийн дүрд цагаан арьстан гаргахыг шаардсан гэсэн?
Майкл: Ямар тэнэг юм бэ? Миний сонссон хамгийн маанаг явдал наадах чинь байна даа. Рекламанд миний царайг ашиглаж байгаа. Ер нь яалаа гэж цагаан жаал минй дүрд тоглох юм. Би хар арьст америк хүн, би үүгээрээ арьсныхаа өнгөөр бахархдаг. Миний дүрд ази хүүхэд тогловол ямар вэ? Энэ балай ярианд эрүүл саруул ухааны өчүүхэн ч гэсэн хэсэг байна уу?
Опра: Алга, за тийм байдаг байж. Таны тухай хамгийн их хэлэлцдэг сэдэв рүү оръё. Энэ бол таны арьсны өнгө. Бага залуудаа ондоо байсан тань үнэн. Маш олон цуу яриа байдаг л даа. Хар арьстан байх нь танд таалагддаггүй учраас арьсаа цайруулсан хэрэг үү?
Майкл: Миний мэдэж байгаагаар арьс цайруулагч гэж байдаггүй. Би тийм юмыг энэ насандаа хараагүй, мэдээгүй. ..
Опра: Намайг багад тийм юм зардаг байсан даа. Бүгдээрээ л “арьсаа цайруулаарай” гээд л. Гэхдээ тань шиг болоход сая литр зарцуулах хэрэгтэй байсан биз.
Майкл: За яахав, хамаг учрыг нь хэлье. Арьс гууждаг, түүнийг зогсоож болдоггүй өвчтэй байсан юм аа, би. Окей? Гэхдээ хүмүүс миний тийм байхыг хүсдэггүй байдлаар маань төсөөлөн зохиож ярихаар сэтгэл өвдөөд байх юм.
Опра: Тэгэхээр…
Майкл: Энэ бол миний асуудал, миний хянаж чаддаггүй асуудал. Тэгвэл байгаагаасаа илүү бараан болох гэж наранд шардаг хүмүүс хэн юм?
Опра: Гоо сайхны хагалгаанд хэдэн удаа орсон бэ?
Майкл: Цөөхөн, их цөөхан. Тоолъё гэвэл хоёр хуруунд багтана. Гоо сайхны хагалгаанд орсон холливуудынхан нэг зэрэг амралтаа аваад явчихвал хот хоосорно гэдэг байдлаар үүнийг харцгаая л даа.
Опра: Би танаас нэг юм асууя. Олон эхчүүд асууж өгөөрэй гэж хүссэн юм. Та яагаад бүжиглэхдээ дандаа хоёр хөлнийхөө завсарт гараа хавчуулаад барьж базаад байдаг юм бэ?
Майкл: Яагаад гараараа барьж, базаад байдаг юм бэ гэж үү?
Опра: Харин тийм. Дандаа л тэгдэг.
Майкл: Өөрийн эрхгүй, цаанаасаа л. Бүжиглэж байхдаа хөгжмийн аялгууг дүрслэх хэрэгтэй болдог болохоор миний хөдөлгөөнийг хөгжим, аялгуу л удирдаж байгаа хэрэг. Би тэр хавиа барих, шүүрэхийн донтой хүн биш л дээ. Заримдаа би бичлэгээ хараад “Үүнийг би хийсэн гэж үү?” гэж боддог. Би хэмнэл, айзмын боол болдог.
Опра: Та одоо бүсгүй хүнтэй болзож байна уу?
Майкл: За тийм ээ.
Опра: Тэгвэл хэнтэй?
Майкл: Брук Шилдстэй уулзаж байгаа. Бид олны өмнө гарахыг хүсдэггүй учраас голдуу гэрээрээ л уулзах юм даа. Тэр манайд ирнэ, би бас тэднийд очно.
Опра: Та ер нь дурлаж байсан уу?
Майкл: Байсан.
Опра: Брук Шилдст үү?
Майкл: Тийм, бас өөр бүсгүйд.
Опра: Өөр бүсгүйд ч бас гэнэ ээ? Нэг юм асуухыг зөвшөөрөөч. Надад эвгүй байна л даа. Гэхдээ л асууна. Та зандан уу?
Майкл: Би ёс төртэй эр хүн.
Опра: Тэгэхээр та хариулахгүй нь ээ.
Майкл: Надад эвгүй байна.
Опра: Хэзээ нэгэн цагт гэрлээд, үр хүүхэдтэй болох магадлал танд хэр байгаа юм бол гэдэг бидэнд сонин байна л даа.
Майкл: Би үүнийг хийж чадахгүй бол миний амьдрал дутуу дундуур байх болно. Яагаад гэвэл надад гэр бүлийн амьдрал маш их таалагддаг. Би хүүхдэд хайртай. Би үүнийг мөрөөдөж байна. Гэхдээ яг одоо бол хүслээ биелүүлж чадахгүй нь. Би хөгжимтэй гэрлэсэн. Хийж байгаа бүхнээ ажилдаа зориулах ёстой…
Орчуулсан Б.Хатан-Эрдэнэ /24tsag.mn/
