Интернэтэд Нью-Йорк хотын байр байдлыг харуулсан сонирхолтой гэрэл зургууд тавигджээ. Тэдгээрийг харах юм бол АНУ-ын энэ томоохон хот цаг хугацааны явцад хэрхэн өөрчлөгдөж байсныг ажиглах боломжтой. Urbanpeek.com сайт дээр дэлгэгдсэн анхны зураг бол 1876 онд хийгдсэн анхны хар, цагаан зураг юм. Түүн дээр олны хөл холхисон, чимээ шуугиантай боомт хот дүрслэгджээ. Эрэг ачааны болон зорчигч тээврийн хөлөг онгоцуудаар дүүрэн агаад XIX зууны хоёрдугаар хагаст тийшээгээ дэлхийн өнцөг булан бүрээс цагаачид хэрхэн ирж байсныг илтгэнэ. Тэр үед дэлхийн хамгийн том дүүжин гүүр болох Бруклины гүүрний бүтээн байгуулалт дөнгөж эхэлж байсан аж. Мөн хаа нэгтээ тэнгэр баганадсан барилгууд сүндэрлэж байгаа нь харагдана. Тэр үед хотын хамгийн өндөр барилга нь Трайбек орчмын шовх оройтой сүм байв.
1932 онд авагдсан дараагийн гэрэл зураг дээр Бруклины гүүрний ажил өндөрлөж, баруухан талд нь түүнээс дутуугүй үзэмжтэй Манхэттены гүүр бараг бэлэн болсон нь харагдах аж. Нэг жилийн өмнө Тавдугаар өргөн чөлөөнд дэлхийн хамгийн өндөр барилга болох Empire State Building баригдаж дуусчээ. Энэ барилгын нийт өндөр 443.2 метр юм. 1930-аад онуудад дэгдсэн Их хямрал Америкийн олон хотыг сүйрүүлж орхисон ч Нью-Йорк түүнд бага өртжээ.
1988 оны гэрэл зураг дээр аж үйлдвэрийн хот хэрхэн АНУ тэр ч бүү хэл дэлхийн санхүүгийн нийслэл болсон нь харагдах аж. Тэнгэр баганадсан барилгуудын тоо замбараагаа алджээ. Мэдээж хэрэг, тэдэн дундаас Дэлхийн худалдааны төвийн ихэр цамхагууд илүү торойж харагдана.
2013 оныг зөгнөсөн дүр зураг дээр тэдгээрийн суурин дээр Эрх чөлөөний цамхаг сүндэрлэх нь үзэгдэнэ. Энэ цамхагийг есдүгээр сарын 11-ний алан хядлагын үеэр амиа алдсан хүмүүсийн гэгээн дурсгалд зориулж босгож байгаа билээ. Барилгын ажил нэг жилийн дараа дуусахаар төлөвлөгджээ. Нийтдээ 104 давхар уг барилга дэлхийн бөмбөрцгийн баруун хэсэг дэх хамгийн өндөр байшин болох юм.
www.wikimon.mn
