Бруней улс ижил хүйстнүүдийг цаазлахгүй. Тус улсын удирдагч, султан Хассанал Болкиах Шариатын хатуу хуулийг мөрдөж эхэлснээс хойш нэг сарын дараа телевизээр ард түмэндээ хандаж хэлсэн үгэндээ энэ тухай дурдлаа.
Брунейн султан цаазын ялаас татгалзах шийдвэрээ сунгаж байгаагаа зарлаад НҮБ-ын эрүү шүүлтийн эсрэг конвенцийг хүлээн зөвшөөрч буйгаа мэдэгдсэн байна.
Бруней улс өнгөрсөн дөрөвдүгээр сард Эрүүгийн хуульдаа өөрчлөлт оруулж, ялтныг Шариатын хуулиар шийтгэхээр болсон нь олон улс даяар шүүмжлэлд өртсөн юм. Энэ хуулийн дагуу ижил хүйстэнтэйгээ ойртсон, нөхрөө хуурсан, хүчирхийлэл үйлдсэн бол чулуугаар цохиж хөнөөдөг.
Шариатын энэ хууль Брунейд хэрэгжиж эхэлсэнтэй холбоотойгоор Жорж Клуни, Элтон Жон нарын алдартнууд султаны эзэмшлийн зочид буудлуудаар үйлчлүүлэхээсээ татгалзсан байна. “Жэй Пи Морган”, “Дойчэ Банк” зэрэг томоохон байгууллагууд ч ажилтнууддаа мөн ийм үйлдэл хийхийг уриалжээ.
Нефтиэр баялаг энэ жижиг улс Шариатын хуулийг 2014 оноос эхлэн улс орондоо алгуур нэвтрүүлсэн Зүүн Азийн анхны улс болсон юм. Султан Хассанал Болкиах цаазын ялаас татгалзаж байгаа ч Эрүүгийн шинэ хуулиа хэвээр хадгална гэж мэдэгдсэн байна.