Жүжигчин Р.Анхням бол Монголын дэлгэцийн урлагийн тод нэгэн од юм. Бүтээсэн дүр бүрээ жинтэйхэн гаргаж чаддаг үзэсгэлэнтэй даруухан энэ бүсгүй “Уурхайчин” клубын дасгалжуулагч Баярсайхантай гэр бүл болсоор цөөнгүй жилийг үдлээ. Өмнө нь буудлагын спортын мастер Н.Мөнхбаяртай гэр бүл болж байсан түүний нөхөр ч бас даруухан, салбартаа нэр хүнд сайтай нэртэй тамирчин.
Жүжигчин Р.Анхнямын хувьд өөрийн Рагчаагийн Анхням нэртэй нүүр номоороо дамжуулж хувийн амьдралаа, амьдралд тохиолддог асуудлуудыг хэрхэн шийдвэрлэснээ харамгүй хуваалцдаг. Түүний энгийн даруухан, ухаарал шингээсэн бичвэрүүд нийгмийн сүлжээнд маш олон хүнд таашаагддаг билээ. Тэрбээр сүүлд “ Муу үгсийг битгий хөгжөөгөөрэй. Үгийг хэлэх тусам эрчим нь улам хүчтэй болдог. Тэгэхээр сайн үг ч ялгаагүй хэлэх бүр эрчим нь хүчтэй болно. Өөрийн хүний гэлтгүй үр хүүхдүүдийг дандаа сайн сайхнаар ерөөж байгаарай. Би байхгүйгээр чи, чи байхгүйгээр би оршихгүй. Сүйрлээ, сөнөлөө, баларлаа, ёо, ёох гэх мэт сөрөг үгнүүдийг болж л өгвөл хэрэглэхгүй хэргэлмээр санагдвал ҮЙЛС НЬ ДЭЛГЭР, САЙХАН ЮМ БОЛЛОО гэх мэт эерэг үгээр орлуулж хэрэглэж хэвшээрэй. Өвөө эмээ маань тэгдэг байсан шүү дээ. Тэр цагт цаг үе, хүмүүсийн сэтгэл ч тайван байсан. Бүгдээрээ ч бас тайван байцгаая л даа.” хэмээн нийтэлжээ.