“Дэлхийн мисс 2019” гоо бүсгүй шалгаруулах 69 дэх удаагийн тэмцээн Их Британийн нийслэл Лондон хотноо болж өнгөрлөө. Энэ жил Ямайка улсын мисс, 23 настай Тони-Энн Сингх дэлхийн миссийн титмийг хүртсэн бол дэд байранд Францын гоо бүсгүй Офели Мезино, гуравдугаар байранд Энэтхэгийн гоо бүсгүй Суман Ратансингх Рао нар шалгарчээ.
Сонирхуулахад, миссийн тэмцээний түүхэнд 2019 он онцлох жил болж байна. Учир нь, энэ жилийн Дэлхийн мисс, Мисс юниверс, АНУ-ын мисс, АНУ-ын өсвөрийн мисс, Мисс Америк тэмцээнүүдэд бүгдэд нь хар арьст гоо бүсгүй түрүүлжээ.
Тони-Энн Сингх Дэлхийн миссийн титмийг зүүсэн Ямайкийн дөрөв дэх гоо бүсгүй болжээ. Хамгийн сүүлд, 10 жилийн өмнө Ямайка улсаас Дэлхийн мисс тодорч байсан юм. “Дэлхийн мисс 2019” тэмцээний отгон мисс Тони-Энн Сингхийн тухай сонирхолтой баримтуудыг хүргэж байна.
1. Өдгөө 23 настай Тони-Энн Сингх Ямайка улсын Морант-Бей хотод төрсөн бөгөөд түүнийг 9 настай байхад гэр бүл нь АНУ-д цагаачилж ирсэн аж. Тэрбээр Флоридагийн их сургуулийг феминологи, сэтгэл судлалын чиглэлээр суралцаж төгсчээ. Тэрбээр “Тогтвортой өөрчлөлт гаргахыг хүссэн” гэж ярьсан бөгөөд гоо бүсгүй болох нь амжилтын жагсаалтынх нь төгсгөлд л бичигдэж байсан гэжээ.
2. Тэрбээр эмч болох зорилго өвөртөлж, анагаахын салбарыг сонгосон ч хөгжим түүний амьдралд том орон зайг эзэлдэг гэжээ. Тони-Энн Сингх Дэлхийн миссийн тэмцээний үеэр шүүгчдэд зориулж Уитни Хьюстоны I Have Nothing дууг дуулан, хоолойн цар хүрээгээ гайхуулсан юм. Шүүгч Пирс Морган түүнээс хөгжмийн салбарт карьер хөөх сонирхолтой байгаа эсэхийг нь асуухад боломж гарч ирвэл татгалзахгүй хэмээн хариулсан байна.
3. Гоо бүсгүйн хувьд хамгийн том үлгэр дуурайл, урам зориг, баатар болдог хүн нь түүний ээж хэмээсэн байна. “Ээж минь байгаа бүхнээ надад зориулсан. Өмсөж эдлэхээс эхлээд өөрийнхөө хүсэл мөрөөдлийг хүртэл миний төлөө золиосолсон. Тиймээс л надад өнөөдөр энэ суудалд суух боломж гарсан юм” гэж Тони-Энн Сингх ярьсан байна.
4. Тони-Энн Сингх бол эмэгтэйчүүдийг чадавхижуулахын төлөө тэмцэгч юм. “Би өөрийгөө дэлхийг өөрчлөхийн тулд урагш тэмүүлэн зүтгэж буй эмэгтэйчүүдийн нэгэн онцгой төлөөлөл гэж боддог” гэжээ. Тэрбээр Ямайкийн миссийн тэмцээний үеэр “Би миссийн титмийг хүртсэн ч, эс хүртсэн ч эмэгтэйчүүдийг үргэлжлүүлэн дэмжиж, урам зориг өгч, хамтран ажилласаар байх болно” гэж ярьж байв.
5. Хар арьст бүсгүйчүүдийн гоо үзэсгэлэн дэлхийг байлдан дагуулсан 2019 онд Тони-Энн Сингх өөр нэг өвөрмөц амжилтыг тогтоожээ. Тэрбээр Дэлхийн миссийн ялагч болсон гоо бүсгүйчүүд дундаа насаар эгчмэдэд тооцогдож байна. Гоо бүсгүйн тэмцээний 69 жилийн түүхэнд 23-аас дээш насандаа Дэлхийн мисс болсон 13 гоо бүсгүй байдаг бөгөөд тэдний нэг нь Тони-Энн Сингх болжээ. Сонирхуулахад, өнгөрсөн жилийн Дэлхийн мисс Ванесса Понсе ялагчдаас насаар хамгийн эгч буюу 26 насандаа Дэлхийн тэргүүн мисс болсон юм.
.ub.life
